Napokon je gotovo. Moram priznati da je na trenutke bilo naporno. Jedino kaj se poklopilo da su ovi zadnji svetki i prazniki bili baš za vikend. Pa je faljelo vremena za oporavak. Najljepše je kad su ti svetki i prazniki krajem vikenda. Onda moreš svetkovati ili praznikovati h tjednu i vikend ti ostane da si počineš. Najgorše od svega je pretjerivanje. To na stolu mora biti jesti i piti ko … e, sad se nemrem zmisliti s čim bi to usporedil.

Kak je to zgledalo zadnjih niti 10 dana starog ljeta? Nabrojal bum samo ono službeno. Prvo smo h onom tjednu prije Božića imali službeni domjenak u uredu. Naručilo se nekakvo meso, mesne prerađevine, riba i prilogi, a naravno i piti, a bilo je i kolača. Hrane smo se praf prijeli, ali je več od pol bilo ostalo. Tak da smo toga i drugi dan imali za gablec i još je bilo ostalo. Pa je došel Božić. Da ne moramo doma nekaj posebno kuhati (iako je žena unaprijed priredila svega naj se najde) prešli smo tastu čestitati imendan.

Onda su me uspeli nagovoriti da prejdemo do šogorovih možda budućih tasta i punice. To su vam malo komplicirani rodbinski odnosi i za one teri se h to baš ne razmeju da pojasnim. Moj šogor (brat od moje žene) ima curu koja je potencijalna kandidatkinja za njegovu ženu, što bi ujedno značila da bi onda postala moja šogorica. Ona ima mamu i tatu, koji će u slučaju da se moj šogor oženi sa svojom sadašnjom curom njemu postati punica i tast. Sad, nadam se, sve razmete.

Uglavnom hvečer smo prešli k njima (potencijalnom šogorovom tastu i punici). I tam je na stol došlo jesti več nego kaj se pojesti moglo. I kad smo se nametali svega po redu pohvalil sam domaćine na odličnoj hrani i tome kak su nas prijeli i u šali sam rekel da je to predjelo bilo zbilja odlično i da bi sad mogli spiti koji gemišt dok ne dojde glavno jelo. I na to šogorov možda budući tast ni pet, ni šest nego se zdigel od stola i del peči još mesa.

E, onda je bila mala pauza sa službenim domjencima sve do onoga gde smo se svi mi kaj pišemo h ovim novinama, ali i ostali suradnici našli skupa. Nebum sad o tome u detalje išel, samo bum vam rekel da je na kraju ostalo klope na stolu za još jednu poštenu feštu. Slično je bilo i na dočeku. Priredili smo zbilja minimalne količine kako mesnih prerađevina, tako i kolača. Ipak je bolje tak, nego da nečega bude premalo. Ostanjke od Novoga ljeta sam si denes još za gablec zel. Da se ne hiti. I tak vam ja saki put pojedem kaj ostane, znate ono da se ne hiti.

Gracii se te stvari oko ovih svetki dopadaju. Naročito nakit za bor. Ili preciznije skidanje nakita s bora. Ne smeta ju to kaj bor piče, bitno je da se dojde do željene kuglice. Problem je kaj je dobar dio kuglica na boru staklenih. I kad skine dvije kuglice, onda nabija jednu h drugu sve dok jedna ne pukne. Nije problem niti da razbije sve kuglice, ali nas je strah da si nekaj ne napravi. S obzirom da s Patricijom i Sandrom imamo svakakvih iskustava kad su delale stvari koje nisu bile za njih.

Čitam, gledam, slušam kak je puno ljudi sad prešlo na skijanje. I moram reči da to opče nije bedasto. Nije da bi sad ja išel na skijanje, nego bi mogel malo na godišnji prejti. Valjda h ovo zimsko vrijeme ne bi žena nič našla da delam po i oko hiže. Ili ipak bi?