Prošli tjedan sam napisal da bi trebali iti žena i ja van na koncert, tak da Patricija more i poslije 11 vur vani ostati. Napisal sam i da nemam adekvatnu jaknu za van. Pa mi je žena jaknu kupila. Črnu. I da znate išli smo van. Žena me je pričekala na stanici dok sam došel s posla i prešli smo do Regeneratora gde je koncert bil. Bilo je dosta ljudi i mogu reči da je gužva bila. Žena i ja smo mam čim smo došli nutra zauzeli stratešku poziciju u neposrednoj blizini šanka. Ali Patriciju nismo videli nutra.

Mislil sam da je negde tam napre h gužvi i da hopsa. No, malo kesneše dojde mi poruka na mobitel. Piše Patricija da je pri Sari i da dojdemo po nju kad idemo doma. Zbog nje smo išli van, a nje vani nema. Kad smo več bili vani, a to skupa več dugo nismo napravili, onda smo odlučili još malo ostati, posluhnuti kak ovi igraju i spiti još koju rundu.

I nekakef nas je tam slikal i slike del na fejs. Sad si moreju videti da sam tam bil. S druge strane to mi je dokaz da ipak izvodim ženu van. Ili ona mene.
Pri nas doma se nekaj čudno događa. Od kak se Sandra vrnula z Pule gde je bila na smotri Društva naša djeca bolje su si neg ikad prije. Čak su se dogovorile da bi h petak skupa išle na rođendan.

Gracia se super privadila na jaslice. Bez greške hjutro ostaje tam, a kad dojdem po nju nekak joj se nejde doma. Ipak je h jaslicama puno dece i več se ljepo igraju. Več nam neda ni da ju hranimo. Samo kaj još furt ima rječi tere ne razmemo. Zato je razvila odličnu metodu da dobi kaj hoče če si to sam nemre zeti. Prime nekoga od nas za ruku i vlječe nas do mesta gde to je. Onda pusti ruku, zdigne oba dvije i veli „Mene“. To znači da ju moraš prijeti. I onda kad ju primiš z rukom te usmjerava kam moraš iti da si ona zeme kaj hoče. Problem je kaj večinom hoče ono kaj nije za nju. A kaj mi je denes napravila?

Došel sam s posla i prešel si zeti auto na parkiralištu gde mi ga je žena ostavila. Usput sam prešel kruh kupiti i del sam ga na zadnji zic h autu. Prešel sam h vrtič po Graciju i del ju h sjedalicu. Normalno, prvo je morala pozdraviti su decu kaj su ostali i tetu i ormarić i vešalicu. Pa se je i jemput po toboganu v hodniku spustila i malo još bežala po dvorišču od vrtiča. Još se je malo skrivala i po čoškima. Kad sam ju del h sjedalicu zagledala je kruh h vrečici i počela pripovedati: 'Kuka, kuka'. 'Kuka' znači kruha. I zela je kruh i počela si trgati komadiče i jesti. A taman se od stola h vrtiču zdigla. Dok sam ja vozil do doma ona je kruh zvadila z vrečice i počela ga gristi gde je stigla. Tam na sredini je najslajši.

Vidim da se po Zaboku još furt tu i tam nekaj asfaltira. Samo moja ulica nikak da dojde na red. A čovek iz gradskog viječa mi je rekel da buju došli pogledati na kaj to liči i da je če baš tak grdo kak pripovedam da buju popravili. Mislite da je došel nešči pogledati? Normalno da nije. A h kakvom je stanju cesta neču ni govoriti. Samo bum rekel da su je sused moral zbetonirati komad ceste gde je nekad bil asfalt kaj more z autom van z dvorišča.