Jeden od drage sveteke tere se poštuvalje od negda pri nas h ožujku mesecu je 19. ožujek. Te je svetek Svetomu Josipi ilji kak bi mi po domače reklji Jožofove. Sv. Jožof se je kak svetec poštival radi toga kaj je bil hranitelj Isusof. On je ljudem bil primer dobrote, skromnosti i ljibavi. Poštivalje ga se kaj familjijskoga čoveka i zaštitnika framiljijie. Njega su pri nas poštivalji i poštivaju još i denes kak zaštitnika dece. Znam da su se babe, a tak i moja mati i babica, tere su imele decu zagovarale Sv. Josipu. Če bi tera imiela kaef probljem z detecem unda ju bi druga podvučila da detece i sebe zagovori i pomolji se Sv. Josipu. Gda su več ljudi počelji delati po fabrika ilji gde drugde, znalje se najti i penez i prejti na prščenje h Zagreb. Zagovor se je obavljal na Trešnjefke gde je cirkvica Sv. Josipa.

Od negda je te i svetek oko teruga se več budi prtuljet. Dani su dukši i se nekak diši po friške otpočinjene zemlje. Bregi su se prie več ščistilji od biele plahte tera jih je čez zimu pokrivala i nie dala ljudem da preveč po nje plaziju. Znalje se dogoditi da se za Jožofove zima na jeden čas vrnula. Z brega su se spustilji vetri, puhalji i igralji po kostja. Pahulje snega skup z vetrem znale su tancati po polja, njiva i dvorišča. Z rafunga se fejst dimilje jer zima još nie prešla z svoji kufri z življenja ljudi. Gda bi ljudi čez svoje obločeke lukalji vun z hiže i bilji hudi kaj bi jih veter i snieg nazaj vrnul pod krove, tiešilji bi se i reklji:

„Vetrene i sniežne bu same jeden krat. Te su same Jožofski fruci i zima same kaj nie prešla.“ Po dvorišča se več znalje videti da je se pririhtane za posle teri su se mam delalji gda se je h vremenilje. Oko sadja bilji su složeni obiljeni kolci za trsje. Obieljeni, kratki i debelji prosci, dobre pošpinčeni, stalji su složeni kaj ljisti knjige oko stanja, kaj bi se sušilji. Same su čakalji da jih se dene na pleče ilji na kola, odnese ilji otpelja na mesta gde buju zapičeni h zemlju, cinfralji miesta kam se buju postavilji. Kre suši su bile nasložene beljinke. od kolja, tere su se sušile. Nje su babe rabile za potkurjavu. Gda se je potkurilje z gacijovu beljinku ciela je hiža dišala po nekave čudne, alji za nos, ljiepe duhe.

Kope h tera su ljudi čuvalji repu i kumpier poljehku su se porušavalje jer su bile skore prazne. Senjaki su se takaj spraznilji, a kopiči slame i krme zgledalji su kak oglobani skoski jabuke. Za duge zimske dane i blage i ljudi skore su potrošilji se one kaj su čez ljete prie pospravilji. Radi toga se je moralje na se bolje paziti i još bolj šparati. Kak su oko Jožofovuka dani bilji se dukši, ljudi su znalji reči:
„Jožof je prešel i južinu donesel!“

Te je značilje da se med obedem i večeru moral najti još jeden obrok, teruga su ljudi zvalji, južina. Pre dugi su bilji cajti od obeda do večere bez da bi se kaj pregrizlje. Ljudi su se počelji mučiti po trsja, vrta i njiva i h želucem bi njim skruljilje. Unda su si med obroki znalji pojesti špekeca, suhuga ilji friškuga sireka i malje lukeca k tomu. Dobre je došle za pregriznuti kakve pečenje tere su nosilji sobu na posel ak su išlji dalje od hiže. Če su pak bilji bljiže pri domu unda su si napravilji finu domaču koštu, teru si moreme napraviti i mi denes. Dobra je, ljehke se napravi, a nie prežmehka, za pojesti kak južina.

Jajce z koruznu melju

Tri jajce se dobre stenfaju. Hu nje se dene poštena beručka biele koruzne melje. More i melja od žute koruze, alji nie tak žmahna. Se se dobre posolji i počne se miešati z dva-tri deci mljieka. Miešati se trieba tak duge dok se sa melje dobre ne rastrajba. Posebne se dene na tavicu ilji renjgljek žljica masi, a ak ima dobre dojde i žljica čvrčke. Na rastopljenu i vruču mast hljiejeju se rastrajbane jajce z koruznu melju i počne peči. Peče se na ljehkem ognju, poljehku se mieša oko deset minut. Če se počneju jajce prigorjvati, slobedne se još malje podljiejeju z mljikem ilji vodu.
Bog vam blagoslovi!