Presmeknulje se još jedne školske ljete. Ocene se bleščiju ilji smrdiju z imenike i svedođbi. Jeni se veseljiju, jedni su turobni. Nu po one stare tera velji: “kak si sejal tak buš i žel i tak je h vreče žitka“, unda saki ima tuljike kuljike je zarajtal. Zadnji dani školje žmehki su za vučitelje, za đake, a da za starce ni ne govorime. Jeden diel starce zbudi se nekak kraju ljeta, a unda i malje rezbudiju svoje ljubimce. A če je pak budenje slabieše i teške se ljubimci razbudiju, drmaju unda z vučielji. Nekak deca i starci k kraju školskuga ljeta skužiju da njim nekaj za neke trieba. Ovie put ocene za nekaj!? A gda one kaj njim i njihovem ljubimce trieba ne dobiju unda njihov spomenek , gda jih pitaš kak je diete školje prešlje počne ovak: „Gda mu je dala z matematike tri, a z hrvatskoga pet, prešel bi z pet.“ Ima i one: „ prokljeta vražica od vučiteljice ilji vučitelja nie mu dala, a tribala je...“. „Radi vučitelje kaj mi niesu detetu dalji ocenu nemre iti hu tu i tu školu“, i tak dalje i dalje.

Nu kak god da piše na papieru tere je špigelj sakuga đaka, školske ljete je pri kraju. I gda skončaju školke muke unda počinjeju za decu i strce druge, ljietne muke. Muke tere su malje drugačke, alji su muke. Starce največ muči kam z decu jer njim se buju ciele dane motalji po hiža. Trieba i več senek za nje voditi brigu, če za nič druge kaj buju več pri hiže pojelji. Mučiju se pak deca čez cielje ljete h kmična hiža gde njim je se jedne tera je doba dana. Največ dane njim je iste, pak njim je sejedne gda se zvljiečju z postelje i zruljiju krmežljive oči. Ščem polukneju, h vuhe si mam zapičiju štopljine z tere beči mužika ilji se pak pristaviju k oblokem z teremi lučeme h svite, teljevizoru ilji računalu. Da nie tie moderne napravic bog zna kaj bi se z decu dogajalje. Kaj bi stvorilji z cajti tere imaju pred sobu. Ovak, mir je starcem od njih i njim od starce. Jedni se drugem hmeknjujeju kaj si nej zasmietalji. Deca mirne duše moreju dočakati počinjanje škole i radi ničega se ne moraju sikierati. Knjige jih buju dočakale h školje, a stare bu njim nešče hitil h kantu za smeče jer jih več nikomu ne trieba. Po ljiepa, zelena i z rožicami dišeča dvorišča tak je tihe i negda bi ljudi reklji, tihe kaj h grobu. Ne čuje se larmanje i smieh dečurljije h nekakve igre. Nema več žukalki na tera bi se žukala deca, a večerke niesu pune kriča dece tera bi se po štalska stanja i oko kopiče igralji skrivača. Te naše drage denešnje dece hkralji sme detinjstve. Čuvame jih od drapi po koljienca, od zašmerane ljistanjke i drape od becikljinovoga lanca. Ne pljiendraju se deca, skrivečki, po lucka čriešnja i ostaloga sadja. Ne larmaju potoki i rieke z smiehem malje kupače, kak negda, gda su se med vudienjku hladilji h vode dok su stariejši negde h hladu vudienčilji. Nemaju denešnja deca debele poplate na noga od hodanje po rosne ilji suhe trave, po strnišču ilji po pokošenem polju. Ne trgaju smolu z sadja i žvačeju i čeljičiju svoje zube kak negda. Ne gasiju svoju žeđ poklje huncutariji na zdencu ilji pak ne kriepiju svoju žeju z mljiekem spravljenem h renjice. Hmekivala su se deca pred babicami i mamaterami kaj nej bilji hlovljeni da su načelji renjice, do vrha pune mljieka.

Negdašnja deca čeljičila su se čez življenje od male mladosti. Borilji su se sami čez svoje življenje. Vodilji su brigu kak posuditi i vrnuti knjige, kak kaj boljšešoga pojesti, kak biti pobednik h diečja igra. Zažareni h ljica i očeljičeni, vračalji su se h jesen h školske klupe. I tak, čez detinjstve i mladost nafčeni na pikanje po putece, na borbu za želudec, na pobedu h diečje igre, na hmekavanju i hmenjikuvanju če je triebalje, deca su rasla i spremne dočakala teške življenja gda su postalji stupi familjijie. Denjšnju decu čuvame od sega toga, a unda su več, na žalost, na početku življenja gda odrasteju, gigava.