Stara je te naša domača poveda, kak i ona stranjska, da je h vinu istina. Makar se velji da je rieč veter i ak je nekaj rečene unda gda oko glave letiju vinske mušice, gda se h možđena rezbistri, teške se pozabi na one kaj se čuje. Kak je za nami Martinje, cajt gda nam je sv. Martin hkral mošt, a ostavil vine sigurne je hnoga istina došla na videlje.

Za nadati se ipak da se nie nič grduga povedalje na kaj se nej moglje pozabiti poklje ove martinjske dane.

Jer, zadnje se vrieme i h našem kraju fejst raduje tomu svetku i pri kljetja pririhtava blagoslof vina. Te je za saku pohvalu jer hu ovemi zgužvani cajti gde nas prtiskaju se zloče, ljiepe je da se ljudi radujeju. Pravi se pajdaši dogovaraju več napre, pri čive se bu klječurke, ak jih opče moreme tak zvati, slavilje Martinje. Gazda, pri terem su se skupilji pajdaši naoružani z kupičičkami sake felje, imel je brigu da bu dobri domačin. Takaj je moral pribaviti „sveca ilji biškupa“. A biškupi ilji sv. Martini z svojemi pomagači imelji su pune posla hu te Martinjske noči. Nie red, če več imaš kljit da ne dojde biškup i ne blagoslovi rajsku kapljicu. A unda, gda se prec gutnulje, poklje kaj se pojila pečena guska z mljinci, kak je za tie svetek red, jezik se rezvezal. Za nadati se da se je se završilje na ljiepem pajdašuvanju. Ipak, nigdar se nemre znati kak je se završilje dok nešče ne zbrbotal. Niesu za badave napisane hnoge mudre povede, morti poviedane ilji zapisne pri tere kljeti, h bertije ilji pak na putu, gda se prihajalje k domu, poklje pajdašuvanja z vinčekem. Pune njih zna moj pajdaš Ivek, teri takaj, h biškupskem opravilu, na Martinje blagoslavljanja vinčeka svoje pajdaše. Ž njega stira sakojački smrad i beteg. Od zdravuga, dišečuga, krieposnoga i krepkuga vinčeka išče da bu na pomoči čoveku. Da tieši žalosne i nevoljene, da zbija šale, da hrabri junake, i kaj česa druguga. Poklje takvuga svetkuvanje pri kljieti, more se znati gdoj ima več vinske prijatelje, jer jedna poveda velji:
„Gdoj ima dobre vine ima i dobruga pajdaša!
Poklje pune spite kušpičički važiju i ove povede:
„Vine otpira se okne h glave da razum more odletetei!“
„Vine nezna za sram, ide bez košulje i hlač!“
„Vine i niemuga pretvara h slavuja!“
Kak su denešnji cajti grdi, sfrčkani i malje je radosti za veljiki broj ljudi, unda za se one teri si nekaj nemreju gutnuti važi ona : „Gdo ne podnaša pijaču, mora podnašati stvarnost!“

Vine se pilje od gda je svieta i vieka, a unda gda čovek gutne teru več, velji se: „ z par kupičički vina ljehke je delati stihe i mudrosti.“ H sakem cajtu moreme dati zapraf jedne židofske povede, tera velji ovak:

„Ak čovek spije malje, dober je kak janjček, ak spije malje več, postane hrabri kaj laf. A ak spije teru preveč opasen je kaj tiger. Če mu pijača postane strast, liči na svinju, tera se koruta po blatu.“ Po tomu i važi ona: velji svinja vinu, „dobrodošel pajdaš!“

Kuljike je gdoj gutnul na same Martinje i gutal bu od Martinja do Martinja, te pak ovisi ne o finoče vina nek o samomu čoveku. Velji jedna stara da jedni pijeju od veselja, drugi od žalosti, a nekteri od ranuga jutra. Po tomu je unda dobra kapljica za nekuga otrof, a za nekuga vračstve. Te je sigurne znal i onie teri je na vrace svoje kljeti dal našrajbati:
..Dedi su naši stari
znali puno dobrih stvari
njim ni bilo treba lijeka
kljiet njim bila apoteka...

Za nadati se da se pajdaši tak puni vračstva gda su se vračalji z pajdašove ilji svoje apoteke, h mraku niesu zestajati z nekakavi mračnjaki h plavem. A da je pak spite vinčeke brbotalje h želučeke, a ne h čuba, pak unda nemre biti zamera..