Gda čovek diela nekteri posel z volju, navieke ga oče napraviti najbolje kak zna. Kuharica sto i sto put skuha dobru juhu, a unda se dogodi da nie ni za koštati, a kamolji za jesti. Pri pecilu kruha saki put zna biti se najbolje i gda baš očeš da bu se kak štima nekaj nie dobre i od finuga kruha nič. Čovek unda sam sebe pošpota i nada se da bu drugi put bolje.

Iste je tak i z semi nami teri nekaj šrajbame. Pri šrajbanju gruntame kak bi triebalje napraviti i napisati onak kaj bi ljudem bilje dopadne. Onak kaj bi barem jeden cajt malje pri čitanju od nečega odehnulji ilji neke doznalji.

Nu, kak god očeš da bu ispalje dobre, negda se i fulja. Ima i onie teri pak čitaju nekaj napisane i če ispadne slabeše ilji dobre oni najdeju prigovor. Radi toga se nej triebalje preveč srditi. Ne velji se zabadave pri nas:
„Sto ljudi i sto i jedna čud!“
Unda se te i k tomu i svedoči, da nemreš sem hpetiti. Ima i onie term nemreš h petiti da se rezapneš. Oni navieke iščeju faljinge, več put gde ih ni nie.

I njim trieba dati zapraf, če jih te veselji. Moja je babica znala reči da sakomu kuhilu prigovaraju one selske babe tere neznaju ni zafrik speči, a kamolji kaj druge.

I ja gda pišem ovu svoju kolumnicu oču najbolje. Oču da si h nogi z žnju prikratiju cajte, če su pri volje. H šalje njim znam reči da ju moraju prečitati tri put. Prvi put da se počneju vučiti čitati, drugi put da se nafčiju čitati i trejti put da razmeju kaj je napisane.

Od prvuga dana gda pišem pišem onak kak me vučila govoriti moja mama i babica. Pišem, a i govorim med pajdaši baš tak. Odvajkada su nas, teri živime h par sela, bljizu Zaboka, radi našuga, spominjanja zvalji, a i denes zoveju „maljeki“. Zoveju nas baš radi toga kaj rabime pune „lj“. Negda su nam, gda su se još ljudi znalji šaljiti med sobu, brbralji gda bi nas videlji ovak:
„Malje telje se htopilje.“
Nekteri su se ljudi radi toga jahke srdilji, alji su i dalje ostajalji pri svojemu „lj“. Istina i Bog, denes se se več tie „lj“ počelje gubiti, gda se ljudi očeju prijeti gospočije.

Malje me čudi kak denes nekteri teri su z Zagorja prešlji, moreju tvrditi da se tak h Zagorju nigde ne govori i da za te niesu nigdar ni čulji. Ne govori se h cieljem Zagorju kak tam h nektere kraje gde vuk poldan tulji, a ljesica poštu nosi. Ni pri mene se ne govori koj, ni ve, pak mi ne opadne na kraj pameti da misljim da se tak negde h našem ljiepem kraju ne govori.

Naše Zagorje je bogate sa sakojačkemi ljepotami. Nema ljepše breščeke, nek pri nas. Bistre potočece kaj brbočeju med breščeci i skup z riečicami hladiju polja. Iste tak naše je bogatstve h našem govoru. Sake selje ima svoj način pripoviedanja, sakojačke šege tera ga baš po tomu zacajhaju. Gda nečega ima več unda je i bogatstve veče, tak je i naš kajkafski spominek bogat radi toga kaj h sakom selu pripoviedaju drugač. Teže razmem Jesenjanca, Bednjanca, alji se ž njimi štimam jer su oni bogatstve čuvane h škrinje za generacije tere prihajaju. Saki pravi Zagorec kam god da bu prešel ne dal da mu nešče sračka po onomu kaj puni tu škrinju z bogatstvem tera je htkana h življenje ljudi teri imaju svoj kraj h srcu.

Pišem te radi dvie „mudre“ glave tere su prešle z Zagorja i unda se čudile kaj cigan bielomu kruhu, kaj ja h svoje kolumne pišem baš onak kak sem se nafčila govoriti i tak sigurne bum dok bu pameti. Dam zapraf da se nešče ne složi i nedopada mu se kaj sem napisala, alji h svoje „lj“, ne dam hpehnuti. Do takve „dušebrižnike“ teri se pitaju kam je nestal naš dragi kaj, slabe mi na domačije držime. Morem njim same reči da ne moraju strahuvati za naš, a več davne ne njihof kaj. Naš dragi kaj, nestal bi brze radi onie teri več ne jieju bažulj, nek fažol, teri su pozabilji na rubače i zubače. On bu ostal i za njega nie trieba strahuvati dok je maljeke, kojtaše i vegače.

Ljepotu zagorskoga govora cinfraju baš te kaj h sakem kraju ilji čak selu drugačeše govoriju. Kakve bi te bilje polje gda bi na njemu cviela same jedna roža. Kakef bi te unda bil spominek gda nej bilje tuljike drage i ljiepe rieči teri ga cinfraju?