Kak sigurne znam, makar bi rada da sem fuljala, sigurne nie ni jeden položar rane h jutre poropal na vaša vrata i zrajil položarsku čestitku. Dece se denes teške zdiči i k obedu gda ciele noči beviju h moderne čačke, a kamolji h jutrajnicu, gda se dan budi iti pred nečova vraca rajit. A ruku na srčeke nie njim ni sila gda dobiju se kaj očeju. Istine za volju ima i onie terem bi trebalje zaslužiti kakef dinarek, alji njih je sram iti jer z te draga stare šege hnogi dielaju bedaka.

Če se z toga i ne zasmehavaju retke da bi otprlji položaru ljesu, a kamolji vraca. Jer kak je denes šega hiže i dvorišča imame za lukati, alji ne i za živeti.. Od komačeca blata pred hižu ilji ne daj Bog fiže, bežime kaj vrag od tamjana. Zdej se čestitarenje obavlja z moderni mašinkami. Napišeš jednu čestiku, pritisneš gumbeka i ode ona na hnoge adrese. Tak sakomu teromu očeš pošlješ čestitku največ prepisanu od nekud i za kratki čas spunil si svoju dužnost. Unda se moreš pririhtati k drugomu poslu, največ bevenju h moderne mašinke. Tak iste i ti dobiš srcetrapajuče željice za svetke. Nišče ti nie rit smical po hiže, nie ti stepel blate pred hižu, a niesi ni pre skupe prešel. Grde je jedine te kaj si ipak nekaj platil, alji ne detecu tere bi si morti za peneze tere bi dobil za rajanje kupul kakef svitrek ilji škornjek, nek nekomu tam kaj bu imel cielje ljete za skijanje i jedrenje.

A kaj se more. Te je denes tak. A negda su se deca veseljila i hganjala teri bu prvi došel k hiže rajiti, a iste tak teri bu več hiž obišel. Saki se gazda če i nie baš imel penez sprsil i dal položaru kuljike je mogel jer mu je na početku ljeta zaželjel se najbole. A položari su za one kaj su zaslužilji, sebe kupuvalji kaj njimje triebalje, kuljijakljinek, škornje ilji cipule. Več put su pak k starcem delji sprave kaj su njim oni kupilji gda njim je kaj pofaljelje.

Još mi je h pameti friški spomenek gda sam svojem maljem rođakem, a unda siromašniešem išla za položara. Ja niesem išla za rajenje nek kaj sem mu tirila gda je bil veljiki snieg. Štel si je za te kaj bi bil dobil za rajenje kupiti škornje. Još h mieglje krenulji sme na novoljietnicu k bregu, gde je bilje selje z našu familjiju, nadajuči se dobre nagrade. Ja sem išla napre i tirila. Snieg je bil do riti i jedva sme išlji h brieg, ja prva, a on za menu. Pred samem vrhem brega, ja sem odnemogla i rekla nek zdej malje on ide napre. Tak je i bilje. Nu same kaj sme krenulji dalje, on je najemput zastal. Skore sem se po njemu popičila. Z ruku mi je pokazal pred sebe. Na sniegu su bilji penezi. Bila je pedes hiljedača. Bilje je te dosta penez. Sigurne je nekamu opala z žepa gda je išel z zabave. Veselje ju je moj rođak zdigel i skore da mu je bilje se jedne kuljike bu dobil za položara. Bilje je te penez za kupiti kaj česa. Malje sam se ž niim šaljila i rekla da mu bum dieljec zela, jer sem mu tirila. Da se niesme zmenilji peneze bi našla ja, a ne on. Senek bi mu dala, da sem je i ja našla jer sem išla ž njim same za pajdaša.

Kak denes nie ni položare, ni dejčecof teri bi hodilji po sela, obljiečeni h trie kralje, popievat trikraljsku popiefku, vam ju napišem. Morti si ju sami zagundrate, gda budete na cajtu ilji pri volje. Če pak ste nie dobre volje, zagundrajte ju senek, mam bute bolše voljice. A iste tak trieba napuniti življenje z dobru volju jer je došel konec svetkuvanju.
O sveta tri kralja,
 o blažen vaš dan
kad sveti Kralj mladi,
bil z neba poslan.
Ah, kud će te sada
 na daleki put
kad zima sad vlada
 i vjetar je ljut.
Gle zvjezdice vodi
 na svem putu nas
to znak da se rodi
 svim ljudima spas….