Prihajaju cajti grduga življenja. A gda je življenje grde unda je veljike trpljenje. Groziju nam se ze sie strani kak buju cajti teri prihajaju črni i da bume moralji stiskati remenje. Istina i bog nektri več nemaju ni kaj stisnuti jer su več prežmeknjeni tak fejst kaj se več praf za praf nema kaj ni prežmeknuti ni scediti. I unda da nie grde bilje bi za smejati jer onie teri su pridosneslji tomu našemu jadu očeju podeljiti krivicu ze semi. Čovek bi misljil da očeju sprati savest, alji da su je imelji ne bi nas do toga pripeljalji. Od vajkada su ljudi bilji h „kaše“ kak te mi po domači veljime. Za takve grde cajte reklji su da je krivi Božek ilji sam čovek. Življenje, negda, ovisilje je večinem o ljetine teru je čovek pririhtal. O tomu kakava je bila ljetina ovisilje je blagostanje ilji grdoba pri hiže. Da bi ljetina bila dobra moralje se po njiva, vrte i trnace pririhtati žitka i jela za ljudi i blage. A če su si imelji kaj h kopanja, jasla i h tenieru srčeka su veselje igrala, a smieh nie biejžal z ljica. Če je pak ljetina bila slaba, bilje je teške i triebalje se je šparati na sakem koraku. A za lošu ljetinu bil je krif dragi Božek protiv čieve se sile nie bilje moči boriti. Nu, ljudi su reklji da jih je poharala suša, poplava ilji tuča radi griešnuga življenja. Za lošu ljetinu bilji su negda krivi i sami ljudi. Ak se niesu o nje dobre brinulji, na vrieme okapalji i čistilji od kumra, bilje je slabuga roda.

Pri nas po selu tak pripoviedalje kaka je bila jedna baba Pepa tera je navike bila h vrtu. Furt je nekaj prčkala po gredička, i sega je imiela h vrtu. Njenji luk, vugerki, paradajz i paprika bilji su tak ljiepi kaj bi sakomu gdoj jih je videl mam curele sljine. Druga je pak selska baba Draga, rada tepla. Furt je hodila po selu, a h vrtu je bila slabe oko lučic i druguga raslinja. Jemput je Draga rekla Pepe:
„Joj Pepa kak vi imate ljiepi vrt i luk. Vaš je luk tak debelji i ljiepi, a moj je ves drobni i na pol gnjilji!“

Na te je je Pepa rekla:
„Istina je te kaj ti Draga veljiš. I tvoje su lučice bile jdnak dobre kak i moje. I tvoj vrt je dobre pognjojen kak i moj. Same tvoje lučice niesu tak dobre rodile radi toga kaj si njim pre malje kazala rit!“

Poklje toga Pepa se tomu fejst nasmejala, a Draga je malje gruntala jer mam nie razmela. Kesniejše je je došlje do glave da je je Pepa rekla da je pre malje čepela oko luka i premalje ga pljiela i okapala. Radi toga je nie bil tak ljiepi luk, a i cielji vrt.

Nu denes sme se nafčilji na kaj česa, pak nam življenje ne ovisi same o „čepenju“ i Božeku. Ljudi su se počelji igrati z Božekem, pa meste onuga jednuga na nebu, ima več njih teri plaziju po zemlje. Oni furt kaštiguju, negda več, a negda menje. Nu kaštiga je kaštiga, a kak je takve kaj se igraju „boga“ pune, ni sam čovek nezna kak bi takvu kaštigu zbiegel. Prie je bilje ljehke, moljil si se jednomu Božeku, živel kuljike se dalje po one deset zapovedi i se je nekak bilje lježe. Denes, gda nam kriza ropa na vrata, stariejši buju nekak zdržalji. Nafčeni su oni na sakojačke žrvenjske kamene oko vrata. Teže bu za mlajše. Življenje tem mladem drukčejše je nek je bilje negda. Tak i trieba biti jer življenje mora iti napre. Alji senek, teže bu gda sme im mi stariejši h vrte posadilji kamienje, a po kočake pospravilji šplhnete ljubimce. Unda bu teške napuniti kočake z perutninu, njo njo i muuuu. H pobelare i po žepe se menje bu zvonilje, a h želučeke skruljilje. Tielca su nam nafčena na fine i dišeče krpinje, pajdašiju sme zamenilji z modernami mašinkami, rit nam je nafčena na večslojni papier, a se te košta.

Ipak, jemput je rečene da nigdar nie bilje da nekak nie bilje. Tak bu i zdej. Bu teške, alji „malji“ ljudi navieke su znalji pljunuti h šake i prejti sakojačke zloče. Oni veljiki tak i onak neju na sebe škrtaljilji. Imelji buju i dalje tuste riti, alji senek neju zadovoljni. Kriza bu tak največ sela na, več tak zmučena i ranjena pleča, maljih alji trpečih ljudi. Oni su pripravljeni za sake zloče i ovu buju pregrmelji.