Gda se mene nekaj h življenju dogodi, e bilje grde ilji ljiepe, navieke se zmisljim kak je te bilje h cajtu gda je živela moja babica i mater. Nekak mi je unda i pri srčeku ljiepe kaj se h takve cajte zmisljim na nje jer su mi pomogle skrojiti življenje. H spominku ž njim kaj česa sem znala čujti, nekaj nafčiti i do den denes zapamtiti

Tak sem se ove dane zmisljila pripoviedanja babice i matere, dok sem h ruka lukala svojuga hnučeka, kakvi su bilji cajti gda je na sviet došla moja mama i ja.
Dok sem lukala te malje življenje, črljene, dišuče i h obljeke kaj h žurnala, zmisljila sem se canjka teruga još dien denes čuvam h svojem ormaru kaj suhe zlate. Te je krpa na tere je moja mati štiela nekaj namierkati. Započela je, alji nie htegnula skončati jer je navieke bilje važnešoga posla. Dok ju je i mater čuvala h svojem ormaru, gda je ormare ljuftala za svetke, tie je canjček navieke diela na posebne meste kaj bi ga i ja mogla videti. Bil je te canjček h teruga me prvi put pomotala gda sem se rodila. Poklje toga su ga spravile mama i babica i čuvale kaj sem hu njemu išla na krščenje, zamotana kak štruca. Canjki za saki dan su se napravilji od podrapane rušic tere su zdrapalji na komade tak veljike kaj se hu nju diete moglje pomotati. Poscani canjek ilji krpa se negda malje spral ilji se same del sušit na plot ilji roljin. Na potoku ilji na zdencu zepiralji su se canjki h tera bi se diete pokumrilje. Če bi se od trdoče canjka ilji od ne dobre poplakane canjke rit spušila, detece se ostalje malje ljuftati bez pomatanja, a črljena rit se namazala z guskinu ilji običnu mašču.

Dok su babe nosile decu niesu se pretepale i zležavale po postelja nek su delale se posle tere su hasnile i bez trbuha. Za trudne babe se reklje da su šteče. Ak bi one nekaj poštele od suseda, ilji hižne, moralje njim se dati. Če njim te nej dalji unda bi čoveku zrasel ječmenec na oku. Još dien denes gda se vidi čovek z ječmencem se velji:
„Tere si noseče babe nekaj nie dal“!

Negda nie bilje sakojačke mašine kaj bi se lukalje detece h maminem trbušeku, alji su babe jedne druge hgajale kaj se bu rodilje. Tak se reklje če ima špičasti trbuh teri stoji zrak da bu sin. Če je pak baba bila h pasu široka reklje se da bu pucka. Znalji su deti na jeden stoljec nož, a na drugi škare. I jedne i druge pokrilje se z krpu i reklje noseče babe da si sedne na stoljec. Ak je sela na stoljec z škarami reklje se da bu pucka. Če je zebrala stoljec z nožem unda bi se trebal rodti sin. Gda je baba bila več fejst široka spitavalje se ju da gda pe h Rim, meste da se ju pitalje gda bu rodila.
Bečanje z hiže bil je znak da se je detece rodilje. K porodilje su mam hodile z prigledaču, mater, kumica i brača. Porodilje se moralje donesti črljenuga vina da si povrne krf i kokoš kaj si je skula finu juhu tera ju je okriepila. Z vinem, kokošu morala je h prigljed iti i sajena gibanica, tera se morala načeti i donesla načeta. Te se napravilje radi toga kaj bi diete prie pregovorilje.

Pri hiže z maljem detetem morale su se poštuvati sakojačke šege. Če se došlje h mrak najprie se moralje iti k šporetu kaj bi ostavil „mrake“ teri bi moglji detecu naškoditi. Detetu se nie smelje čuditi i reči da je ljiepe nek se malje popljučkalje i rekle:
„Kak si grdi. Nedaj ti Bog vuroke!“

Unda se detece prielje za nos, malje zcosralje ž njim i reklje:
„Daj Bog da te tuljike put h životu bolji glava kuljike sem te put do zdej vidla!“ Kak je te bilje prvi put, značilje je da bi detece, gda bu veljike same jemput boljiela glava. Fižu gde se detece rodilje par se dane nie išlje nič posuditi. Ak si došel fižu moral si sesti kaj nej detecu odnesel senj. Ljudi teri su došlji fižu gde se dite rodilje, moralje su se ponuditi z koštu i pijaču, kaj bi detece rejše jelje i bilje zdrave. Črljeni šofi zvezani negde na malomu panjkartu čuvalji su ga od vuroke i copra. Kak se god denes buniju i zesmehavaju starem šegam, senek jih trieba, bar h spomenku, negde čuvati i rabiti.