Dobre moram paziti gda idem na gnijezde po jajce. Če je na gnjizdu kokoš, najprije ju moram stirati i unda zeti jajčeke. Če bi same ruku podurnula pod nju, sega bi me skljuvala. A gda kokoš postane kvočka, bolje dalje od nje. Kvocanjem furt prizava piščence i napadne sakuga gdoj njim se oče pribljižiti. I gda tak lučem čez življenje svoje male „piščence“, kak od radosti zovem svoje đake, srce mi negda oče pučiti gda vidim žalost h njihova očja.

Denes je takve žalosne dece se več za te jer su jih napustilji njihovi tate ilji matere. I te ne bi bilje nič, nišče ne mora h braku trpeti gluposti svojih negda odebranih, alji one kaj je najogrše hu te cielje priča je one kaj se dogaja z njihovu decu. Onie, teri svoju savest pereju z plačanjem alimentacije, misljiju da je z te par kunic riešil svoju obavezu prema detecu. Malje njih se ponaša kaj kokoš gda je očeš zeti jajce. Za njih su njihova deca, deca terem oni „dosta“ dajeju kaj materam ilji ocem odvajaju jeden diel svoje plače. Grde je gda oci ilji matere napustiju decu. Ljudi med sobu veljiju da se ponašaju kak pes ilji kusa. Vrapca, te nie istina. Pravi je junak onie teri bi išel kuse ilji k piesu zeti jednuga peseke. Jedni žaljiju starca tere prejde od svojuga bračnuga pajdaša i ostaviju decu. Veljiju da je prešl z piekla braka. Viš vrapca, oni se z piekla oslobodiju, a decu h pieklu ostaviju. Skore saki dan deljim žalost z takvu decu.

Kak me pri srcu tišči gda mi deca veljiju, onak h poverenju, kak su žalosni kaj jih tata nie nazval na rođendan, a kamolji došel i nekaj donesel. Lučeju deca nekam bez kraja gda po njihova dušica teče tuga jer se otec ilji mati nie ž njimi poigral na mesece ilji čak ljiete. Ilji nigdar. Kad bi otec ilji mati z teremi deca ne živiju, same zericu svojuga slobodnoga cajta daruvalji toj svoje dece i vrnulji njim radost h dušu i smieh h oči. Gda bi same malje cajta teruga trošiju po bertija ilji svoje osobne ritne zadovoljštine daruvalji svoje dece, bilje bi menje tuge h njihovem življenju. Gda bi oni znalji da z plačanjem i pljivanjem svoje bifše, same jačaju bies i mržnju h srca ploda svoje negdašnje ljubavi.

Niesem osvetljiva, alji si nekak lukajuči čež življenje znam da pravda navieke pokuca na sačova vrata, da se računi kad-tad moraju naplatiti. Kak sem več duge z temi dragami napuščenemi glavicami tere fljesik postaneju zrelji ljudi i imaju svoju familjiju, diel sem njihovih životnih priča. H nekera, gorčina detinjstva h zriela ljiete prejde h mržnju. Ima jedna životna priča teru vam darujem.Osuditi ju ilji zeti z nje pouček prepuščam sakomu za sebe.

A priča je te o jednem dejčecu, zdej dobromu mužu i ocu. Bil je on plod jedne mladenačke ljubavi. Alji ljubavi same z jedne strane, a z druge pohotnosti i neodgovornosti. Naganjanje po sude, skrivene materine suze, osude društva pritiskale su mater z detetem. Z božuju pomočju stala je na noge, a dajčecu probala dati ljubav i za sebe i oca. Naposlušal se on priči o svojemu ocu, zdeljejkuga su mu ga pokazalji, alji prema tomu veljikomu mužu nie imel ni mržnje ni ljubavi. I gda se životni safti pobuniju, tak je i dejček jednuga dana štel bolj upoznati svojuga oca. Došel je k njemu na posel. Otec ga je hude lukal i pital kaj oče. On je rekel da je same došel gled svojuga tatu. Na te ga je njegef „tatek“, stiral, kričal mu da se gubi i da kaj mu nie dosta kaj za njega mora plačati.

Prešle su ljiete. Tatek je bil srečne oženjen. Dobre mu je išlje. Veljika hiže, klječurka, vikendica na moru, ludi altek z terem je znal prjuriti kre svojuga sineka. Nie ga ni prepoznal. A unda kak se velji:“Čovek snuje, a Bog određuje“, h očevem braku nie bilje pajnkarta. Nie su nekakve ljiete, a lji su teške boljesti pokucale na očeva vrata. Najprie napale babu, a unda i njega. Življenje bez tuđe pomoči nie več moglje biti. Familjija kak familjija, saki ima svoje brige i nišče nie štel pomagati. A unda se čovek zmisljil svojuga sina. Dopeljalji su ga pred njegve vrate. Bil je začuđen z ljepotu svojuga sina i z hnuki teri su skakalj oko očeve nog. Ponudil je sinu se svoje bogatstve, same da prezeme brigu o njemu. Sin mu je rekel:

„Se buš mi dal? Hm!? Nikakve bogatstve nemre mene zaljiečiti trage tere su na pravile suze na mojem srcu. Sreču teru niesem imel h detinjtvu več mi nič ni nišče nemre vrnuti. Obrnul se od čoveka pred vrati i mirne duše jih zaprl za sobu.