Fala Bogu, „najgorši“ mesec h ljetu za denešnje cajte ide koncu. Istina je da se vljieče kaj lačne ljete, alji senek mu se vidi kraj. Denešnji ga sviet nema rad jer se čini dukši nek je. Trieba se dobre restegnuti kaj bi konec meseca kak- tak zgljihal. Svetki teri su za nami, radi naše tobožne običaje, zvljieklji su z pobelara se kaj se je dalje zvljiči. Čak i več od toga, pak bu pobelar još dost duge spiškani i ne se hu njemu imelje kaj zabremzati. Lježe je onem teri su se negde h stranjska zemlja spuščalji ilji se spuščaju po prekrasne sniežne brege.

Pri jene nigdar ne zmenjka ropanja h pobelare, a jedni ni za pram boga nebi priznalji da buju cielje ljete kruha lačni same radi toga kaj buju moglji reči da su negde bilji. Največi diel ljudi ne misli na skijanje i niesu „zavidni“ onem teri se same po zime moreju sanjkati i skijati. Večina ljudi se ionak ciele ljete sanjče, baš radi onie teri nam nasmejani i zabundani pošiljaju kušljece z sniežne stranjske vrhe.

Ipak, ovie siečenj ima nekaj istuga kak i siečni prie pune ljiet. Kak su cajti za gruntanje i kak zima se več stiska, a negdašnji kompanjoni Rusi zafrknulji pipu tak se trieba pribrati kaj nej bila još veča šteta nek je. Pri onie tere još možđene kak tak dielaju, ne trošiju denes, dragoceni plin i griejeju ciele hiže nek same jeden malji diel. Unda se tak familjija konačne našla, kak negda, na kupu. Kak su skupa, malje več bu med njimi spomenka. Jedine če se ne med nje kak soldat zmiešal oblok z terem lučeme h sviet i neju si skupa hu njega bavelji bez rieči. I onak misljim od gda je on dopeljan h naše hiže restepla se familjija. On je zagospodaril ze semi i saki čkomeči luče hu tu blješčeču škatulu, srečen da se ne mora mučiti šlabekuvanjem.

A negda h sičnju, gda je se škripalje od zime i od žmehkuga snega teri je pritiskal male drvene potleušice, familjija je bila na kupu i h spomenku. Skupljeni oko peči saki je imel svoj posel, alji iste tak svoju mudrost deljil z hižnemi. Mlajši bi sedelji na pečnike, grelji ozeble noge, a nosnice njim je dražila duha nuč tere su se sušile. Popetavalji bi e su suhe, kaj bi jih nazaj moglji obujti h škornje i suknuti na brešček još teri put se odsanjknuti. Drvene rastelesane sani, napravljene doma bile su prislonjene na vugljiče same kratke čase. Furt su bile h pogonu, a veselji smihe dece grmel je ober selje. Snjegoviči su cinfralji sake dvorišče. Oko kopi, h graba, napravil se led pak su se deca kljizalji h krug kre kope. Hude bi bile mame i babice, gda bi išle z košaru h kopu po krumpier ilji repu. Morele se dobre paziti kaj se nej posmeknule i zdigle se četiri h zrak. Bapske pumberice gače bljesikale bi h zraku jeden kratki cajt dok se nej baba pribrala. Smieh i šega onieh teri bi takef prizor vidlji ne bi stalje par dane. Sriež na štalska vrata i oblaki pred krafskemi gupci bilji su znak da je siečanjska zima pokazala zube. Kaj bi i blagu bilje toplješe, saka se rupa zaštopala šofi, a i gnjoj se nie hital z štale van kaj bi se „kuril“ i grel stanje.

Negda je zima rane stisnula i nemarnieše iznenadila če niesu htegnulji pripeljati dosta drvi. Če bi sfaljelje, deca su morala hoditi f hustu pobirat suhalja. H peči ilji šporete furt je moralje goreti. Gda je peč bila puna čulje se je hu nje pucanje. Ak je h ognju fejst pucalje ljudi su veselje reklji:

„Denes h ognju fejst puca. Nešče bu nam došel h goste. Triebalje bu skuhati za večeru več župe ilji h roljinu speči več krumpiera.

I h večerke ljudi su išlji jedni k drugem. Kratilji si cajte h spomenku, o tomu kaj se je čez ljete događalje, kaj su negde čulji. A gada več nie bilje o čemu novom se spominati, zmišljavali bi se priči tere su čulji. Bile su te priče o coprnica i copernjake, o strahe, o pokonjike...

Babe bi kre špareta redile, štrikale ilji nekaj štopale. Muži bi pripoviedalji i priče zaljejalji, a deca z raširenemi očmi na peči ilji na klupe obrtače poslušalji z širem otprtami očmi. Deca su se čez dan znalji posvaditi, alji h večerku bi se čvrste stisnulji jedni kre druge, kaj nej teruga odnesla coprnica ilji pokonjik.