Negda se med ljudmi velji da smieh nič ne košta. Ne bi se baš z tem složila, gda zname da denes baš nie tak. Istine za volju negda je tak i bilje. Ljudi su se smejalji sega guta. Gda si čul da se nešče smieje ilji se još reklje da se fejst rihlja, mam si znal da se nečemu raduje.

Gda su se mala deca rodilji znalji su se h snu smejati. Reklje se unda da se detecu pokazal njegef anđel čuvar i da se radi toga detece smieje. Znalji su ljudi nasmejavati i malje vekšu decu, gda su bilji dobre volje, a deca bi se smejala i smejala. Ljudi su se med sobu šaljilji, pripoviedalji vice i unda se smejalji. Oni su se rade nasmejavalji i reklje se ovak:
„smieh je ljiek“ „ smieh ljieči dušu“, „gdoj se smieje ne mislji zlo“.

Gda si negda videl nasmejanuga čoveka bilje ti je drage. Smejal se radi toga kaj je njemu bilje dobre i ljiepe ilji radi toga kaj se je raduval tomu kaj sme se zestalji. Če je pak čovek bil žalosten i z nečem nezadovoljen vidlje mu se na ljicu. Tak da si negda znal gda je doj za istinu žalosten, alji iste tak i da je nešče za istinu srečen i da te pokazuje svojem grljenem smiehem.

Smieh denešnje ljudi je čistam neke druge. Smieh se denes prodaje kak i saka roba.Smieh ljudi, primera radi, h štacune je roba tera se prodaje  kak i paprika, kruh, cukar, prper i se one kaj sme kupilji h dučanu. Trgovec mora delati na poslu, alji mora se smejati, makar mu nie do smieha. Bilje bi sakomu gdoj dojde h štacun draže da se smieje unda gda mu je zasmejati. Ovak nigdar neznaš e je te smieh od srca ilji pod moraš. Jer malje je teže razmeti da se baš trgofcu za smejati gda stoji na blaganje, a pod rit mu puše i h ljetu i h zime. Takvamu smiehu unda ne veruješ. Če se negda i nasmieje onak za istinu teške da mu je unda za poveruvati.

A unda pak gda ti nešče zazvoni na kučnem pragu prve nek vidiš glavu vidiš veljiki smieh od vuha do vuha, čoveka teruga ne poznaš. Najbolje bi bilje zalupiti vrate i dvaput z ključem obrnuti, kaj nebi nasel na tie smieh. Iza toga smieha se skriva veljike uveravanje da trieba neke kupiti jer nam baš te tereba. Oni na vrata su baš tuj da nem nekaj prodaju bez čega nemreme biti. Triba ti pune snage da se riešiš gosta pred vrata i njihovoga smieha.

Unda ima onie pak teri te za nekaj trebaju. Gda te ne treba niti te ne vidi, a gda bi te nekaj trebal unda se vrti oko tebe i smiehem na riti. Smieh mu ne zide z gupca se do onuga cajta gda te nie skoristil, ilji pak da nie uspel z svojem naumem.

One pak kaj me je poteknulje na pisanje o smiehu mi je došle gda sem malje ljudi lukaka i unda gruntala. Gda jih nišče ne luče ilji ne lučeju oni nekuga na ljicu njim je ledena maska.

Nie te ljudem za zameriti jer življenje nie baš ljiepe. A posebene je skup smieh onie teri nam čuvaju peneze. Niesu ni oni krivi, alji moraju se furt smejati. Z smiehem te uveruvaju kak je dobre da imaš pune kartice, kak je ljiepe da se koristiš z sakojačkami lepezami tere ni sam ne razmeš. Napeljaju te z smiehem na tenki led i radi smieha teruga si dopil na kratki cajt popustiš. Imaš h pobelaru pune kartončeke, a peneze se menje. Jer gda takef jeden kartonček zgubiš, za glavu se buš lovil kuljike te bu gubiček koštal. Niesu radi toga krivi onie teri nam se smiejeju na šaltere. Oni se moraju. Tie smieh nie zabadave. H glave ti se zavrti gda ti priljepiju cifru teru su ti odrapilji da bi dobil novi kartonček. A gda si ga dobil  i gda su te uveravalji kak je se ljipe i dobre, kak si zaštičen i kak ti nemreš biti na zgubičku gda ti se nekaj pripeti. Lučeš paperek teri potpisuješ dok se ljubazne i ljiepe kre tebe smieje teta tera ti tie paperek daje. Kak veruješ da je tie smieh zabadave i kak je šenjkan tebe, nejdeš lukat i čitat one kaj sitne piše. E da prečitaš kaj sitne piše nebi ti baš bilje pri srčeku drage gda lučeš smieh teri i nie zabadave nek je i tekak skup.

Radi toga denes trieba dobre paziti gda nam se ljudi smiejeju. Smieh nie zabadave. Paziti morame kaj ga nej preveč skupe platilji. Smieh je postala pre skupa roba. Denes su novi cajti i se se plača pa tak i smieh.