Furt veljime kak nie penez. Nu te se nej moglje videti radi toga kaj su pred svetki bile takve gužve kaj je bilje skore za ponoreti. Nie bilje štacuna gde niesi triebal prec cajta čakati. Gužva na sakem mestu. Pune košare, cekeri i vrečice sparvljali su se h bunkere alti. Tak su se alte pretvarala h male „štacune“h tera se našlje kaj česa. Bilje je i onie teri baš h pobelaru niesu imelji preveč, a meste „bunkere“ alti imelji kakvu vriečku.

Očeš nečeš i sam čovek mora se najti h takve gužve i nabaviti se one kaj mu trieba za svetke. Tak sem i ja bila dieljec te predsvetne gužve. Zišla sem z alte van i dok sem ju zakljipala kre mene je poljehku, negda bi reklji „kaj da gazi po jajca“ išla jedna starica. H jedne ruke je imiela platnenu, doma zešitu vriečku, a h druge batinu. Batina je bila stara, alji nie bila z štacuna nek takaj napravljena doma.

Starica mi je zapela za oke radi glasnuga mrmljanja. Zgledalje mi je kak da se sama sobu spomina. Poljehku sem krenula za nju. Ionak mi se nie preveč žurelje jer sam več duge došla do toga da se nie trieba hitriti unda gda su gužve. Stiha i razložne išla sem prema placu za staricu. Lukala sem h njenju vriečku. Bila je još prazna. Hu nje je bil jedine gertašljin. Te je bil znak da je išla tek h kupovine. I gda sme se prevlačile med altami i bile bljizu jedne bertije, z nutra su kaj raspuščene svinje zletelji mladi ljudi. Ne bi se na nje ni obrnula jer takve je se oko mene saki dan, da se niesu zabušilji hu tu staricu. One se zamajala i bila bi opala da se nie prijela za altu tera se tam našla. Duknula sem i ja k njoj da ju pridržim, kaj nej skončala na podu. Dečešinec teri je bil ilji na pragu punoljetnosti obrnul se prema starice i naglas, oštre rekel:
„Stara kaj se motaš tut po ceste“!

Gda je te rekel obrnul se k svojem pajdašem i skup ž njimi se fejst počel smejati. Dok sem pridržavala staricu i pomagala je da se zdigne, pogledala sem prema tem mladem ljudem. Zamazane, alji nagielane lasi imelji su začesane kak kokotice. Na vuha, na čubenjka i na nosu imelji su rinčice. Hlače su njim vesile na pol riti. Stalji su onak „frajerski“ i „glumilji nekakvu „veljičinu“. Starica nie nič rekla. Niese ni obrnula prema njem. Sigurne ju je nekaj ščeknulje pri srcu. Niesem njim nič rekla ni ja , jer z takvemi nigdar neznaš na kaj moreš naiti. Lukala sem staricu z dugemi očmi nek ta mlada „horda“ neotesance. Niesu se oni pitalji hu sebe, e je te nečova mama i babica. Niesu se pitalji da tak more biti denes zutra i njohova mama ilji babica tera njim je h nogi put obrisala rit i gubec poklje kaj su se sita najelji. Za njih je bila ona starica tera njim se našla na putu.

Niesu gledelji na nju kak žensku na tere je zapisane življenje. Sigurne su njenje tienjke ruke sprešarane borami i žilami oprale hnogu hadru na potoku. Bore na ljica kak da skrivaju se njenje življenje, tere nosi kak da je se negde ne zgubi. Slabe noge, potprte z batinu svedok su teškuga življenja. Da je bila trpeča čež život govori i te kaj njim nie nič rekla. Hu sebe si je sigurne gruntala kak je te denešnja razuzlana mladost i da njenje rieči nej bile od nikakve koristi. Morti bi jih još same več resrdila i dobila kakef „šlopec“. Od njih se nie moči bilje nič dobruga nadati.

Gruntala sem si hu sebe o starice i o te mlade ljudem. Niesem ni hu sebe rekla kak su negda ljudi znalji reči gda se nešče grde ponašala:
„Kaj te tak starci vučiju“?
Znam da ni jeden starce ne nafčil grde svoje detece. Nu one kaj je sigurne, ne opomina ga da se ponaša kak „Bog zapovieda“. Saki starec mislji da odgaja „anđela“, a ne onuga z rogmi. Žalosti i te kaj tak same grunta, a ne proverava. Se hamuljije tere mladi denes po sebe zmačeju starci opravdavaju z „ludu mladošču“. I te je točne. I bolje da se zludiraju dok su mladi. Ipak, mladenačke ludiranje nema veze z ljipem ponašanjem. Bilje bi dobre da starci dok svojem mladem daju mogućnost da „ludujeju“, da se i ž njimi tuj i tam pospominaju kak se trieba ponašati, kaj se denes zutra nej radi njihovoga ponašanja od srama moralji „zavljieči h rupu“.