Gda čovek luče ovie mladi sviet, baš mu i nie se jene. Istina i bog, da stariejši niesu nigdar zadovoljni kak se ponašaju mlajši, alji ove denes, senek negda prejde saku meru. H sakem cajtu življenju dece ime nekaj kaj čoveka malje hiče ne gruntanje. Od gda počneju plaziti po zemlje, nekteri se tak kričiju po štacune kaj da jih pečeš od silne željelje za nečem, kaj mu starci nečeju privuščiti. Prie bi čovek rekel da hu ove cajte i nemreju. Unda gda počneju školu hoditi hgajnjaju se teri bu imel ljepšu obljeku, torbu mobitel. Če nie kak očeju, večina njih se groziju z ne vučenjem. Gda pak okosmateju, unda tek počneju prave hamuljije.

Baš sem nekteru večerku, alji kesnu imel kaj videti kaj su mi se na glave zdiglji lasi. Tri, još z golu bradu balafci, ne z altu nek z ljimuzinu, peljalji su se tak kaj da su znorelji. Unda su zabremzalji tak kaj gume niesu same cviljile nek i gorele. Skočilji su z ljumuzine i na sriedi ceste, da oprostite zesccavalji. Poklje su nastavilji po ceste divljati i dalje. Prava je sreče gda niesu nekuga na cesta hbilji. A unda, kak sigurne imaju penez gda se voziju h stekljača od alti, zmišljalje bi se se kaj nej završilji za rešetkami. Trieba reči da baš i sami starci niesu navieke pri pameti gda svojem rastučemi malci daju h ruke se one kaj očeju.

H spomenku starce več put znam čujti kak nemreju nič detetu. Kesne je početi stezati vojke gda se več nemreju hloviti jer se po podu vljiečeju, a konji su h galopu, reklji bi negda ljudi. I gda se ovak lučem, gruntam si da bi bilje dobre malje starce zmisljiti na cajte h terem se znalje gdoj je gazda pri hiže. Gruntala sem si kakve je bilje negda življenje i kak su rieči od starece bile zakon i mam prvaomočna odluka protif tere se nie moglje žaljiti.One kaj su oni govorilji i kak su se ponašalji moglje bi se deti kak i nekakve zapovedi bože, alji bume reklji unda zapovedi starce. Ž njimi bi triebalje početi za ran. Pripoviedati jih i podučavati još dok se detece žuče h zipke. Morti bi kaj h vuha ostalje i zapamtilje se čez življenje, se dok detece ne postane svoj čovek i sam počne odgajati svoja deteca.

Starinske zapovedi starce triebalje bi furt i oni i deca imeti na pameti. Unda deca nej od starcof iskalji se kaj njim dojde na pomet. A te starinske zapovedi mogle bi zgledeti ovak:

1. Mi sme starci i nema druge zapovedi osim naše.
2. Spomenite se deca saki dan da vas hranime, oblačime i dajeme dober navuk.
3. Svetkujte i blagujte redovite, alji znajte da su vam te starci priskrbelji.
4. Poštivajte nas gda sme poljek ilji niesme. Kak poštivate nas, tak buju vaša deca vas.
5. Ne hbijajte nas z svojem ponašanjem i nikuga drugaga. Največ se čuvajte da ne hbijate i sami sebe, z drogu, pijaču, pušenjem i luduvanjem po ceste.
6. Najte vljieči sakuga h postelju i naj postelje ne postejeju altobusni ilji željeznički kolodvor
7. Deca, najte hkrasti nikomu nič. Navieke se bu doznalje da ste imelji duge prste. Čuvajte se i budite deljejke od pobelare i kartic starcof.
8. Najte držati štangu lažljifcu jer unda ste i vi gorši od njega.
9. Ne poželjete si lucke puc i dečof. Najte saki čas voditi k domu novu pucu ilji dečka, jer starcem dielate novi trošek.
10. Najte deca željeti nikakcve lucke stvari. Ne sljinite nad pajdašove hadrenine, maščobe, alte.... Se su te same stvari tere o čoveku ne veljiju nič. Sakomu naj njegve bu i za luckem nie trieba žaluvati.
Če bi se barem tera od tie starinske zapovedi posluhnula, morti bi bilje bar malje menje zloče, menje suzi i prekljinjanja. Z starošču pod ruku ide i mudrost i če njim ljudske srce otpre vrata, nie trieba strahuvati za cajte teri prihajaju.