Baš sem ove dane gruntala o tomu kak su negda ljudi z svojemi mudrami povedami sami sebe znalji potiešiti gda njim se nekaj prpetilje. Ljudi su navieke našlji cajta za gruntati i mudre pripoviedati. Denešnji sviet nema cajta za kaj takvuga jer sme furt h nekakve žurbe, kak da nas natirava hiljadu vragof. Jedva se imame cajta zestati sobu kre postelje, a kamolji još gruntati i zmišljati nove povede.

Radi toga je nam stariejšem, teri sme nafčilji povede za mlade dane od naše starce, pune lježe. Gda nam se nekaj pripeti, posegneme h „žep“ h terem su zapisane mudrosti naše stare.

Si sme mi ljudi, si griešime, malje rade polarmame, negda i bez veze. Gda tak neke šlopime jemput, nikomu nič. Pripeti se. Nu gda več put „dereme istu kozu“ te več nie šlopanje bez veze, nek z veljiku vezu.

„Za bedakem nie trieba iti“, stara je poveda na teru sem se pune put zmisljila ove dane, kaj bi morti lježe razmiela pajdaša poklje njegvuga brbotanja. Zdej več gruntam, e sme opče bilji pajdaši ilji same tak, ljudi h prolazu čievi su se životni puteci tuj i tam dirnulji. A pak sem si misljila gdoj sem ja da za nekuga veljim da je pameten ilji bedak!? Istina, ne veljim nek same gruntala o starinske povede tera velji:
„Nie važne kaj se velji nek gdoj velji“!

Senek me je nekak pri srčeku tiskalje gda sem čula na svoje vuhe, od zdej več neme reklji pajdaša, nek onak z putnuga čoveka teruga sem tuj i tam zestala.
Baš toga pajdaša, kritikuvalji su ze sie strani. Nekak mi ga je bilje žal pak sem za njegve delje radi čega su ga špotalji bila na njegve strane. Gruntala sem hu sebe da nemre senek h čoveku biti tak pune zloče i da seneke kak god da je obračal kapute kak su cajti prihajalji nie delal kaj su mu prišvavalji. Alji, gda je nabolšega pajdaša „napudil z mesta na poslu“, alji z pajdaševe dobre, kak je rekel, bilje mi je čudne.


„Tuj senek nekaj smrdi“, gruntala sem hu sebe. „Tuj senek niesu čista posla“ misljila sem si kak god da sem štiela veruvati da nie tak. Curelji su cajti. Žlabranje o tomu čoveku fejst su bile na glasu. A unda, mu je po glave puknulje se one kaj je on delal drugem. Tuj je došla ona stara takaj dobre znana:

„Gdoj pod čem jamu kopa i sam hu nju šlopi“.

I gda se tak pripetilje, senek mi je bilje z novič nekek žal. Od poklje sem ga malje viđavala kaj mi je bilje krive. Sreča i moja veljika radost bila je gda sem ga nekteri dan zestala. Pripitala sem ga kak kaj je i tak dalje i dalje. Na kraju sem rekla da mi je žal kaj se h zadnje vrieme tak malje vidime i podružime. A unda kaj da me je nešče šlopil z mokru krpu po glave, gda je rekel:

„Je, ne vidimo se. Ja se družim z ljudmi, a ne z poljitičari , a oni niesu ljudi.“

E, da je te rekel nešče drugi baš mi bi bilje sejene. Morti bi tak hnogi moglji i reči, alji senek ne baš za saguga. Alji ne i baš on, teri se furt držal kak na poslu tak i poljitike negde pri riti i vrtal, vrtal kak sveder prema gore. Istina, gda te i poljitika podene i pripomore, kak njega, trebaš te znati poštivati i biti pošten prema onem teri su te tam pripeljalji i veruvalji hu tebe. Gda si „gore“ moraš se držati reda za „sljiku i priljiku“. Nu, kak god h jednem cajtu bil močen nemreš se ponašati kak pijani miljijarder, jer te ljudi brze skužiju. Ljudi su pune prie skužilji nek ja i radi toga jih nič nie iznenadilje, kak mene, gda je jednuga dana šlopil „odzgora“ kaj gnjila hruška.

„Škola ne diela z čoveka pametnoga i mudruga. Z pametju i mudrošču čovek se rodi, a poklje ju same cinfra“, takaj su reklji. ljudi.
A da mi več ne faljelje pajdašuvanje z „čovekem“ sigurne znam. Zmisljila sem se i one teru mi je dedek navieke rekel:
„Bolje ti se sinek z pametnem plakati nek z bedakem veseljiti“!