Gda sem jeden dan štiela ziti na cestu z altu morala sem prepustiti jedenuga mladuga tatu i mamu. Ljica su njim bila črljena i nasmejana. Ves njihof smieh i veselje bil je hpučen h plava dieča koljica tere su pred sobu rievalji. Nie bilje moči fuljati da je h koljica bil malji dejček. Kuljike god denes ljudi očeju biti moderni, senek se oče ostaviti i nekaj starinskuga.

A po tomu starinskomu, dejčeki su imelji navieke nekaj plavešoga, a puckice rozastoga. Mudrila sem se na tem kak te dvoje mlade ljudi z veseljem šlabekuju svojemu nasljediku. Takaj sem si misljila kak njim je zdej ljiepe, gda je panjkrat malji i bez brige su. Nu gda malje podraste priča se zmeni. Malji huncut ide trdokorne tam kam on oče. Če mu se preveč dopusti pak tie putec i posel nie baš kak Bog zapoveda. Sreča je tem mladem ljudem kaj neznaju kaj jih skup ž njihovem panjkratem čaka. Kakve njim bu se hamuljije, grde i ljiepe, pririhtaval. Tak je te valjda zapisane i tak mora biti da mlajši navieke srdiju strarieše ilji deca starce. Ipak, se mora imeti meru.

I dok sem se još mudrlia i gruntala o te mlade familjije i peljala se dalje, pred sobu sem vidla jednu ženjsku. Dobre sam ju poznala. Česte sem ju viđavala gda je išla po ceste i h ruka navieke nekaj nosila. I ovie put, išla je poljehku, sa se nagnula na jednu stran. Hruka je imiela nekaj žmehkuga. Kak sem bila na cajtu nie mi se žurelje, a znala sem da je još dosta deljejke od doma pristala sem da ju popeljam. Nie me mam prepoznala nek je išla svojem putem. Tek gda sem ju zezvala, zdigla je glavu i nasmejala mi se. Bil je te smieh, alji onak nekak pun tuge i žala. Nie mam razmela da sem je stala da ju popeljam.Tek gda sem je z ruka zela tešku vreču teru je nosila i počela ju metati h altu, znala je za kaj sem je pristala. Čez glavu mi je preletele življenje te, zdej več, mame i babice. Življenje tere je bilje grde i žmehke. Furt je bila h nekakve žurbe, furt h poslu i letenju, a unda je jednu večerku škripanje gum zabrenzalje te letenje. Življenje je je jeden cajt visilje na koncu, alji želja za životem i za svoja dva mala panjkrata radi tere je furt letiela, zbudila ju je z gljiboke senje. Od grdobe tere je doživela, žifci su več bilji napeti kaj strune pak je negda morti rekla susedem, familjije i dece nekaj kaj nebi smiela.

Ipak, ona je same bila mama tera je čuvala i briguvala se za svoj dom i decu. Način na koji se borila za svoje panjkrate bil je takef kak je znala i mogla. I h teške bolji i tuge speljala jih je ne životni putec.

Gda sem si sela kre nje i gda sme krenule malje sme si požlabrale. Bila je h čudu kaj sem je stala. Več put ide od doktora ilji z štacuna pešice, gda retke ide altobus, alji je nišče ne stane. A unda gda mi je rekla ove kaj vam bum napisala, srce mi je skorem puklje od tuge:

„Znaš, niesem misljila da si mene stala. Mene ti onak nišče ne stane. Kak bi mi gdoj i stal gda mi nečeju stati ni rođeni sini. Jemput sem išla od doktora, niesem imiela imbriele i sa sem zmokla. Stala sem h zaseke pod mostem i čakala da hljiš bar malje prestane. Cvokotala sem od zime, a z mene se same sciejala voda. Kre mene se najprie prepeljal jeden sin. Niie mi stal. Po cajtu i drugi sin z familjiju, hnučeki su me lukalji čez okne, mahalji mi, alji mi sin i sneha niesu stalji. Si se srdiju na mene...“ Poviedala je te mirne i bez suzi. Več jih je valjda se stočila.

Nič niesem mogla reči. Pri hiže sem je stala. Gda je pognuta išla k doma, mene su same curele suze i po gdoj zna kuljike put sem se pitala:“Kak se te more h dieča srca, terem se radujeme gda jih vozime h kolica, nagnjezditi kača gda porasteju“?