Piše: mr. sc. Rajko Fureš dr. med.

Živiš kak živiš, negdar maš a negdar i ne. Vsaki med nami morti bi nekaj več, kaj i nie za zameriti, ali e se te navek splati te nekaj čist druge je?! E se splati i e tak i trieba, i kaj pitec tie, kaj putec nam poveda, kam nas pela i gde svekli, te je une kaj si dopovedati triebali bi? Tak i vsaka življenjska bela, rojža friška, snajti se nazna več put. A življenje, oj življenje, ti si za vse pravi cviet, kaj nam ma pak vsu poštenje, kaj nas pela čist vsikud. Kak je bile i kak nebu, te je vse skup tak kak je, jer je doba navek bila vse kaj pela, vse i vsikud.

Tak se same moreš najti, tam prie steze kaj smudi, kaj se žuče, kaj zazava, kaj nam furt pak se budi. Te jedina nam je steza, kaj nas čaka furt i furt, pak nas pela, pak nas tira, da se najde vse vsikud. A življenje, tu življenje, za vse bile nam i bu, vse te drage nam pooštenje, neš ga našel nigdar tuj. Same doba, same puti, same smehek kaj gori, vse te senje, vsi ti žuti, zemljani su ti, vsi ti dragi cveteki. A tie cvetek vse otpira, pak i srček kaj stoji nam pre duge h ledvenice, kaj ga mrazek rad gledi. Tie nam mrazek, kak nam praf je, tie nam mrazek ne gori, tie nam mrazek kak h ledane, dišobu stepe i pokrije vse. Topličke nam čistem zgasi, vse napravi da bu kraj, da več nigdar ju ne prime, jer ne mogel najti praf, tie nam putec kaj se more, same žnjem nam nejdi proč.

I ta doba, ta življenjska, vse nam kaže negdar praf. A ne more navek prejti, jer ju vlječe nekaj proč. Zate navek, kak god ljehke, nie ti bile a ni bu, prejdi poljek zloče ciele, naj ni gledet ti na nju. Same dobre ti si primi, same po njem mie ti put, jer je dobre vse kaj vriedi, jer sam tak buš našel ju. A ta doba kaj se kaže, i kak ta veli - da nie te kraj. Kak da zove zviezde sviekle, pa im kaže tuj za kraj. A te zvezde, zvezde drage, navek su nam bile tuj. Niesu nigdar nikam prešle, pak ni neju zdaj ni nam. Tu življenje, kak god da je, vse otpira, vse trpi, kak nas vučil je Najdraši, kak su bili puti vsi. Tak gda ideš, gda se zbudiš, gda pogledaš vse vsikud, tuj pajdaši, ljudi pravi, navek tuj su vse vsikud. I življenje dojde – prejde, i življenje ma svoj cajt, nigdar nebu mele senje ak ne primeš mam si ju. A te senje, a tie lasi, kaj dišiju kak nigdar te nie, vse te pela, vse otpira, tak da nejde pri nas grieh.

Da se grizel nebi, da nebi žal ti bile kaj nekaj niesi – a mogel si, da nebi vse te skup bile une kaj je same štele a nie se smele, te je unda dopeljale nekaj k nam kaj si niti nisme nigdar misliti mogli niesme. A pak, kak god da nekaj tuj probame i povedati, vse te skup drugač niti ne zide, drugač se niti ne otpre, jer same je jeden pravi navuk, navuk teroga se nemre zmeniti, jer tie je navuk za vse veke. A pri nas ljudmi vsikak je tak, da navek vse bi šteli zmeniti i čistem furt vse i ratepsti. Te vriedi kak za une kaj naopačne je iste kak i za vse une kaj dobre je.

Jemput vsaki med nami došel bu tam gde nebu mu se vrnuti mogle več nazaj, jemput bu vsaki med nami došel unde od gde mu nebu zbeči se mogle. A pobeči neš mogel kak ni nihči med nami, a te bu još težejše ti jer do zdaj nate navajen si bil. I kaj se bu pripetile unda, kaj se bu z vsega toga zmešale, došle bude same do toga da buš sam sebe priznati moral da življenje si potepel, jer več ti nebu na ruku išle une kaj navek ti je išle – da zbegneš. Došel buš do une štengice poklje tere več nikam nebuš mogel genuti, štengice od tere buš same mogel h glublinu najčrnejšu propasti ili buš se mogel med oblake h vis kak ftiček zdiči.

Pak gda čem si študerati otom e vse te skup, kaj vsaki med nami spelava, e te je navada življenjska ili nekaj druge – gdo zna?! Gda vse te skup na kup štel bi deti, unda niti nemrem nič druge za dopovedati si nek same te da vrieme trieba čuvati. Ak neš čuval vrieme i ak neš življenju se praf pririhtal, ak navek buš krajil unda ti i puteci vsi navek buju završili same na jednomu mestu – nigde. A te nie put, putec je življenjski pravi tie teri nakaj za sobu ostaviti more.