Pririhtavame se k našem največem svetku Vuzmu. Gda čovek dojde k ljietam rade pribira po spomenke na negdašnje cajte. Grunta o njem, tira šegu sam sobu o onomu kaj nie bilje dobre i ljiepe, alji se iste tak mudri i pri srcu mu je toplje gda se zmislji cajta za tere more reči da su ostavilji trage h njegovem življenju. I kak je ovie tjeden nekak mirneši, bez veljike halabuke i naglosti tak je i več cajta da si čovek malje bolje grunta o ovršavanje crkvene svetke h detinjstvu i mladosti. Vuzem, tie veljiki svetek od navieke su ljudi ovršavalji pod jednak. Si su svetkuvalji, jelji šunku, hren, kokošinu juhu i farbali pisanice, nu senek je saki Vuzem pri sakomu bil drukčeši. Iste tak i pri sake hiže sake ljete bilje je nekaj novuga kaj nie bilje prijašna ljieta. H mojem siečanju od hnoguga Vuzma največ mi je h pamčenju ostal onie gda se je poljehku na poslu i okol slobene spominalje da prihaja Vuzem i da ga bume svetkuvalji. Krive veljiju denes onie teri tvrdiju da nam nišče nie branil slaviti crkvene svetke. I te je dieljem istina, alji slavlje je moralje ostati pod krovem, a h cirkvu iti poskrivečki ilji dalje od svoje fare če niesi štel da te vidi teri selski šuft.

Mene je ostalje h pamčenju ljete gda se je još navieke išlje školu na Veljiki četrtek i petek, alji se senek moglje na poslu spominati o Vuzmenami šegami. Pri moje hiže od vajkada se do šegi držalje pak kaj se toga tiče niesu pozabljene ni denes. Živelje se po njih i unda gda se o svetkuvanju čkomelje, alji i unda gda si slobodne rekel na poslu da ideš na spoved. One kaj moram priznati da je moj otec bil kaj kakef žandar i dobre je pazil da se negde pri šega za svetke ne fulja. I gda čovek živi h takve familjije i z takvem odgojem unda mu nie teške pamtiti i ovršavati svetke kak negda. Po te šege moral je biti oprani ves vieš do Veljikoga četrtka. Ropanje, več unda mašine za hadre, srdilje bi mojuga oca i furt bi mrguval pak sem unda i pred tie, mene jeden od ljepše Vuzme, nie z mašinu ropala. Na Veljiki četrtek sem si malje duže z decu prehupela jer sme popoldan deca i ja išlji h školu. Gda sem se zdigla čula sem iza hiže na susedove njive kak ropa traktor, alji i hudi glas svojuga oca teri je nekaj larmal. Niesem baš porajtala, alji sam po kratkem cajtu vidla da čovek z traktorem ide k domu. Zaoral je same par brazdi. Moj ga je otec išel špotat jer se prie reklje da se od devete vure na Veljiki četrtek nesme zemlje orati. Orataj je odustal od posla i prešel k domu. Morti je pozabil za tu starinsku šegu pak je došel orat ilji ga je gazda naručil, niesme znalji. Na Veljiki petek gda je bil veljiki post i nemrs pri hiže se nie pune skuhavalje. Negda su ljudi postilji cielji dan, možda spilji kakev čaj od suhuga sada ilji pilji same vodu. Same se betežnem i malje dece slobodne dalje jesti kaj se pri hiže imelje. Pri nas se za decu skula krumpier na cieljem i malje posoljil kaj su ga moglji pojesti. Če je dece fejst skruljilje h želucu unda su se kuhale jajce i te ne kaj bi se najelji do guta nek tek tuljike da se zavaraju želučeki. Na Veljiki petek mi sme več pririhtavalji orehe, tuklji mak, pralji jace za rihtanje Vuzmene košte. Na samu Veljiku sobotu rane sem se zdigla i zakurila h špretu. Mati je morala omiesiti gibanicu i napraviti kugljiv jer same je ona znala dobre napraviti, znala je reči. Dok se kuhala šunka deca i muž farbalji su jajce. Otec je pririhtal hrena, a i su hranu za živinu kaj se na Vuzem nebi ropalje z ribeži i siročkami nek bi se same živine zasipalje jelje po kopanja. Po negdašnja šega pri nas se na Veljiku sobotu, h vode h tere se kuhala šunka skuhal pori luk. Do popoldan se je bilje pečene; gibanice, kugljif, bielji i koruzni kruhek, napravljene pisanice sakojačke felje. Deca su išlji, kak i negda mi, gled h cirkvu grobeka. Otec je bil na večrnice i dima donesel goreču gubu obiešenu na drot, teru je del h šporet i ž nju donesel diel blagoslova Vuzmenuga ognja i uskrsnuča. Ja sem z veljkem veseljem kinđala košaru i hu nju metala sega po malje, kak negda moja babica i mati. A hjutre gda je još bilje kmene po prvi put h životu ja sem z svoju familjiju, tremi puckami i mužem išla z nacinfranu košaru na blagoslof. Suze su same curele, alji od radosti. Niesem jih štiela obrisati gda sem konačne svojem dvem pajdašicam, dvem Vericam, na tere sam najprie naišla, konačne slobodne i na glas rekla:
„SREČEN VAM VUZEM!“