Bljiži se poljehku konec žrtvovanja onem teri su se nečega h korizmene dane odreklji. Još malje i njihovam mukam bude kraj. Jedne štimanje h spomineku menje. Cvietnica je pred nami. Nedelja, tjeden dan pred največem našem crkvenem svetkem Vuzmem. Kak se mienja datum Vuzma tak i Cvietnice, a unda i vrieme. Negda je Cvietnica bolje h zime, a negda bolje h prtuljeti. Radi toga je i vrime sakojačke, alji su ljudi veruvalji da vrieme na Cvietnicu odredi kakva bu ljetina. Pak se unda reklje ovak:

„Ak Cvietnica nie jasna, ni ljetina ne časna!“

Te bi pak značilje da vrieme čez ljete nebu bog zna kak dobre i da ljetina ne dala veljiki rod.

Cvietnica ilji Cvietna nedelja svetkuje se kak spomen na dan gda je Isus ušel h Jeruzaljem. Ljudi su ga dočakalji, mahalji mu z palminemi kiticami i hitalji mu pod noge mlade kitje i rožice sake felje. Z tem su mu štelji pokazati kak njim je drage kaj je došel med nje. Tie ist teri su ga tak zdušne pozdravljali za kratke su vrieme poklje toga kričalji:

“Raspni ga, raspni“!

Čudne, i denes se tak nekaj more dogoditi ljudem. Zmenilji su se cajti, alji zloča h ljudie jednak more biti zloča. Jeden čas čoveka zdižeju h zviezde, a po cajtu ga gaziju kak nuču.
Cvietna nedelja nekak je od navieke h korizme svečanieša nek ostale nedelje. Morti zate jer se h cirkvu na blgoslof nosi drienjek, masljinova ilji palima kitica. Kakva se kitica nosi ovisi o mestu gde ljudi živiju i kaj imaju hu te vrieme pri ruka. Ljudi su negda reklji da je Isus gda je gruntal o svietu h terem je živel sel na drienjek, jel maslinu, a z palmu se hladil i da se radi toga ta drievca noce na blagoslof. Pri nas su se odnavieke nosile na blagoslof zvezane kitice drienjka. Denes ga malje oče stirati masljinova kitica, alji se ne da.

Od vajkada se drienjek pri nas za Cvietnu nedelju jedini rascvel gda god Cvietnica bila. Radi toga su ga ljudi nosilji na blagoslof k poldanje meše. Z kiticami našuga domačuga drienjka h ruka ljudi idu k meše na blagoslof. Gda se tak blagoslovljeni drienjek donese k hiže, ž njim se donese diel blagoslova i diel meše. Negda su ljudi neslji kitice drienjka od susede teri radi betega ilji starosti niesu moglji iti k meše na blagoslof, jer ni jedna hiža nie smiela biti bez blagoslovljenoga drienjka. Blagoslovljena kitica metala se je pod strehu pri štalskem stanju, kaj je diel blagoslof prešel i na gospodaru i blage. Druga se kitica metala pod strehu pri hižna vrata ilji h ganjk. H nektera hiža se nie nosila fižu. Ljudi su govorilji da se z drienjkem donašaju fižu muhe.

Kak drienjek skore najraneše cvite, unda su se tak ljudi med sobu negda spominalji da je jemput medved zišel z svojuga brloga poklje zimskuga odmora i bil fejst lačen. Išel je iskat sada za jelje i došel je do rescvietenoga drienjka. Sam je od sreče zdiehnul i raduval se kaj je brze našel na rascvieteni sad. Sel si je pod drienjek i gruntal:

„Gda je ove drieve jedine tak rane precvelje unda bu i na njemu najraneše zrasel plod za pojesti. Radi toga nejdem nikam od drieva. Pod njega si bum legel i čakal da rodi“.

I tak je medved čakal pod drievem drienjka i čakal, driemal i ljen bil iti dalje. H želucu mu je skruljilje, alji nie se pomieknul dalje od drienjka. Odcvel je i zezrieljel ves sad, alji medved nie videl gda se je bil ljien zdiči spod drienjka. Unda se negda med ljudmi h spomenku za ljienuga čoveka reklje da se ponaša kak medved pod drienjkem.

Poklje Cvietnice počne se pririhtavati k veljikomu Vuzmenemu tjednu. Veljiki poslji na njiva, vrte i pri hiža dielaju se same z prve dane tjedna. Od veljikoga četvrtka saki do za praf drži do crkvene svetke ne pririhtava se nikakvomu veljikomu poslu. I zemljica i ljudi trebalji bi otpočinuti i počinjenji pričakati Vuzem.