Nie dana gda se ne zmisljim na pune toga kaj su me vučilji moji stariejši. Nigdar, gda se zbudim, ne pozabim zmoljila Oče naš. Nafčilji su me da se trieba prekrižiti prie nek krenem od doma. Zmisljim se za navuk svoje babice, tera je navieke h sakem poslu davala navuk kak se čovek trieba ponašati kaj nej resrdil Boga.

Gda me kak malu peljela k meše i cielji put pripoviedala o veronaviku, alji ščem sme išle prema križnom drievu mam je htihla. Bilje je te drive tere je rasle i još raste kre puta po terem sme išle k meše. Na drievu je bilje, i je, pribite respelčeke. Tuj sme postale, poklonile se i prekrižile. I gda sme išle od respelčeka moja je babica jen cajt mučala. Vučila me takaj da se h cirkve ne blebeče bez veze. More se same moljiti i popievati gda je za te red. Vučila me je poštivati svete sličice tere su cinfrale moj moljitvenik, a i one tere su doma vesile na zidu. Če bi komu hižnomu z gupca skočil kakef grieh mam se je obrnul prema svete sljičice ilji respelčeku na zidu, prekrižil se, i moljil za oprost z rečami:

„Oprosti mi Bože na grda rječja!“
Gda je pak hodil župnik po blagoslovu hiž i dal križ h ruke hižnem, križ se je h ruke prijemal z strahem, s pobožnošču i poštivanjem. Križ je bil svetinja z teru se nie lamatarilje kak bi gdoj štel i gda bi štel.

Ove zadnje dane imiela sem priljiku lukati ovu halabuku gda se je biral čovek teri nas bu predstavljal pred Svietem. Nagledala sem se ja, a i hnogi drugi, kaj česa. Saki od ljudi ima praf da mislji kak mu se nešče dopada ilji ne dopada. Nu gda te govori h Božje ime i z mesta gde bi trebala biti moljitva, pesma i pokora, unda triba priznati da si nešče jemlje preveč maha h Božje ime. Unda, ilji su mene negda moji stariejši, največ moja babica i župniki teri su nas vučilji veronavuk, krive vučilji ilji ..?. Če si denes nešče more na najveseliejši svetek Božič, privuščiti da špota ljudi z svetuga mesta same zate kaj niesu onakvi kak si on zamislji unda više cirkva, sveti hram, nie kaj je negda bil. A tie isti, teri su bilji špotani dopeljani su h Božje hrame od onie teri su se zdej okomilji na nje. Odlučilji su da več niesu dobri radi toga kaj ne pišeju i ne pripoviedaju same o vanjska kiklja nek malje polukneju i pod nje. Niesu zalarmalji gda su morti triebalji gda se je z respelji lamatierilje kud se nie smelje. Bilji su tihe gda se je respelje našlje h ruka nektere ljudi i ž njim mahtalje kaj z kakvu krpu. Moja bi babica negda rekla. „Viš dušek, kak z Bogeka dielaju bedaka!“

Nošenje veljike svieče još i razmem. Ona se i negda nosila kak zavet ilji pokora gda se čovek poštene, skrušene obrne h moljitve za pomoč i zahvalu Bogu. Če je negda svečica bila vekša, moljitva, alji i grieh bilju su vekši. Radi toga morem razmeti gda vidim veljiku svieču h nečova ruka. One pak kaj nemrem razmeti da se nešče krive zakljinja, jer i te je grieh. Nemrem razmeti kak nekomu familjija more biti se, na prvem mestu, svetinja, a da nie diel te familjije. Nema toga posla, nema te penez tere bi mogle pravuga familjskuga čoveka otrgavati od familjije. Saki viernik zna one kaj je nafčil na veronavuku da je Bogu drage gda je familjija na kupu, gda skupa blaguje, svetkuje, da starci pri stolu i h sakem cajtu življenja budu skupa z svoju decu i dajeju njim navuk.

Vučilji sme na veronavuku takaj da su pred Bogem si jednaki makar bilji različiti. Da Bog ima se jednak rad. Ipak, Bog nikuga na ovem svietu nie zadužil da u njegve ime govori gdoj je pravi, a gdoj krivi i te z mesta na terem ljudi iščeju „hranu“ za svoje duše. One kaj se saki put senek pokaže da se z Bogem nie moči igrati i njega prevariti. Dobre se zna da prepozna one teri tvrdiju da veruju h Boga, a hodiju po putecu grieha. I pak se zmisljim kak je moja babica znalagovoriti:

„Moreš ti nekomu napraviti štetu, moreš nekaj hkrasti, moreš delati sakojačke zloče za tere misliš da nišče nezna . Moreš misljiti da jih same ti znaš i da si jih skrila od ljudi. Se je te dušek točne. Moreš hkaniti se ljudi, alji Boga nie moči. On se vidi i se zna, a unda i prema tomu delji plaču!“