Od vajkada poslušam kak se pri spomenu nečovoga imene spominaju i njegva ranieša, več put pokonja familjija. O tomu bi denes triebalji gruntati mnogi gda dielaju grde posle. Čak i nihova šukund pokoljenja mogla bi imeti prišveljek h pomenku: „ te ti je prehnuk ilji hnuk od onuga lakotnjaka, ilji, njegvi su bilji tati, zločeti ljudi....“

Iste tak, kak i za zloče teri ljudi dielaju ima i one kaj se familjija pamti po dobrem: „bil je siromak, alji tak malje nie imel kaj drugomu nej dal, rad je pomagal onem teri niesu moglji, sakuga bokca priel je pod svoj krof...“

Nie ljiepe mam na početku ljeta pisati grde priče, pak vam poviem jednu ljiepu, tera se dogodila ove dane. Priča je počela prie 23 ljiete h jedne bolnice h našem veljikem gradu. Sudbina je štiela da dvie susede, jedna starieša i jedna mlajša deljiju boljesničku sobu. Mlada, puna žalosti radi teške boljesti točila je suzu. Stariejša je je z svojami pričami štiela pomoči i dati je nadu, da se bu Bog pobrinul kaj bu i dalje mogla brinuti o svoje dve malje piščence, o svoje dece. I dok su se h njihovem bolničkem življenju miešale suze i smihi, h sobu njim je došla mlada puca. Ščem su vidle njenje natečene oči od plača, njenje zabuhnjene ruke i tielce tere se treslje od plača, mam su znale da je veljika tuga i jad sela na ta mlada pleča. Po govoru su znale da je puca došla z dalmacije. Znatiželjne su lukale hu tu lijepu spodobu tera je jeden cajt mučala. Teške je je bilje otprieti svoju ranjenu dušu. Hu sebe je gruntala kak bi je te dvie nepoznate babe mogle razmeti i pomoči gda su je pleča obrnulji onie z teremi je cielji život rasla. Suze su se koturale po ljiepem ljicu Dalmatinke gda je po cajtu počela svoju spoved pred dvemi babami.

Njenja je priča bila slična mnogem, alji senek nekak tužniejša da je ciepala srca i dušu. Mlada Dalmatinka, tak ju bume zvalji, rodila se i živela h jednem maljem dalmatinskem mestu gde se poštivala pobožnost i rieč stareši. Kak dober đak starci su je teške, alji ipak dalji da ide dalje h školu, za vučiteljicu. Znala je da se njenji sega odričeju kaj bi mogla zbaviti školu i nie štiela da hu nju ide i jeden dan duže nek je triebalje. Kak pucerljinka, a več kak i prava našla je,unda je tak misljila, ljubaf svojuga života. Poklje fakulteta mislila je z njim stvoriti svoju familji i svoj život. Z takvemi mislji i planieranjem pod njenjem srcem zakucalje je druge, nove, plod ljubavi. A unda gda je počelje glasnejše kucati na tie mladi stvor srušilje se nebe. Ljubaf obrnula pleča, a sramota zaostaloga kraja kucala na vrata. Pred mladu Dalmatinku, osramočenu, osuđenu na pljuvanje sela delje se same jedne rešenje, prejti h tuđi sviet. I tak je došla h Zagreb, išla od vrata dovrata kraj familjije teri bi je pomoglji da su moglji. Na pol lačna, spita završila je h bolnice. Njenje žalosne lukanje čez oblok ciepalje je srce dvie babi z teremi je počela deljiti bolesničke dane. Babe su nove pridošljice, mlade Dalmatinke, dale se kaj su imele. Z spomenki su je poljehku vrnule farbu h obraze i veselje h dušu. Ipak, žalost je bila veljika jer Dalmatinka poklje bolnice nie imiela dom h teri bi se vrnula. Gruntale su stariejša i mlada suseda kak da je pomogneju. Na kraju ju je stariejša z svoju familjiju, odlučila zeti k sebe. Od unda su za Dalmatinku došlji dani na tera je grelje sunce. Došla je h Zagorje i pri stariejše našla stan. Nu same za kratke jer je h Zagorju našla dobre gradske ljudi teri su je dalji novi dom h veljikem gradu, se dok se nie vrnula h svoju Dalmaciju. Denes je srečna ženjska, mama tre sine. Nu nie pozabila one teri su je, kak god da njim je bilje teške, bilji njenja srečna zviezda. Bilji su je h misljima furt, a poklje 23 ljiete došla njim reči fala. Došla je k mlajše. Stareša več nie...

...Zviezde su se poljehku igrale na snjiegu teri je prekril grob moje starce i muža. Pred njim je stala Dalmatinka. Vužigala je svečicu dok su se suze koturale po njenjem ljicu. H tišine i moljitve za njihove duše nič nie govorila. A ja sem bila tak vesela i ponosna kaj je zerice dobrota moje matere bila zvijezda vodilja tera je Dalmatinke osvietljila put življenja. Poklje tak duguga cajta došla je je reči jedne veljike fala za dobrotu teru je je daruvala. Nema te penez, nema tie dare teri me bi hu ove dane tak razveseljilji kak spomenek na dobrotu moje familjije, matere, oca i muža.