Dieče ferije traje. Jedna deca, „srečneši“ prešlji su nekam z starci na sanjkanje i skijanje. Gda sme imelji priljiku lukati na našem obloku z terem lučeme h sviet kolone pune starci i dece teri su krenulji van naše zemljice, teške je bilje reči da su h alta baš bilji preveč srečni. Kak deca tak i starci. Nu če se nej išlje nekam van, ne bi te bilje prave ferije i počinek za jedne i za druge. Dobre je kaj su doma ostalji privezani cucki. Inače bi išlji, ne za gazdi, nek za altami z tere je dišalje po sarme, špeku ilji kakve ostanjke. A na te lucka snižna staza gde se sanjče i skija zna biti sega. Tak bar poviedaju.

Deca su hudi kaj nemaju skiji i obljeke kakve bi štelji, babe kaj muži preveč griejeu svja tielca z kuhanem vinem i prežgeanicu, a muži radi toga kaj njim babe furt kvocaju pri vuha. Tak bi njim bilje sem skupa bolje da su domeka. Morti bi i ostalji da su naši breščeki obljiečeni h sniežnu obljeku. Ovak i oni teri su doma nemreju se posanjknuti, onak za dušu. Negda, gda je i snieg, žalosti me gda vidim da se malje dece hodi sanjkat. Zaprti su po hiža i lučeju h sakojačke moderne čačke, bez tere neznaju več ni živeti. Malje se z teruga breščeka, gda opadne snieg, čuje larmanje i smieh dece. Negda, bregi su bilji puni dece teri su se poskrivečki šuljalji od hiže i završilji med branžu h igre na sniegu. Nie se pitalje kakve su i čieve sani. Selje se z pajdaši i jurilje čez brieg. Srečneši su od ciepanic imelji stesane skije, a „vezovi“su njim bilji guma ilji koža zabita h čavlji od jedne do druge strani takve skij. Gubec škornje natieknul su hu te veze. Na pol obljiečeni z mokrami nučami, obujti h gumenjaše škornje z golami rukami frugljalji su se deca med sobu. Če bi teri dobil jakšu grudu h čeljenjku, nie se išel dima kričat i tužit k starcem. Skrival je pred njimi fučku na glave i potreni nos. Smuknulje se dima same unda gda se triebalje iti gret i na roljinu sušit nuče. Škornji su bilji puni snega, a nuče trde kaj špleh, zeblje je za noge tak kaj niesi znal čieve jesu. Unda se skočilje dima gret i sušit. Na šparetu je navieke bilje topluga kuhila teruga su napravile babice ilji mame i z fugu kruha znalje se okriepiti dušu z jeljem. H zimsku dobu kuhala su zimska kuhila. Če bi k tomu bilje još i kakef štrukljec zelnice ilji komaček strepe, nigdar veseljiešuga. Živelje se unda fejst drugač, bez sakojačke kerifeke, alji nekak zadovoljneše. Deca su navek bila črljena, vesela i zadovoljna.

Denes med cinfrastu i lagodnu koštu teške moreš najti nekaj praf domače po žmahu i po duhe. Morti su radi toga furt si nekak hudi, bljiedi, skore zeleni. Triebalje bi bar popraviti malje koštu, tera nie ni skupa i nie teška za skuhavanje. Trieba imeti same volje i šteti. Kuhilje tere se prie jelje hu ovem cajtu največ je bilje dielane z bažuljem. Ipak, nie se saki dan jel ni on jer ga nie bilje navieke dosta, pak su se kuharice znala snajti. Jeden dan su skuhale repu na čistu juhu, a drugi dan od ostanjke repe čušpajz od bažulja i repe.

KOŠTA OD REPE

Kisiela repa diela se je kuhat z malje svinjske kožic, repa ilji komaček špekeca. Gda je repa bila kuhana jiela se je z kalapajsanem ilji zdruzganem krumpierem. Krumpier se oguljil i skuhal h slane vode. Gda je bil kuhani, zdruzgal se i podljejal z malje rastopljene masti na terem se zažarile lukeca. K tomu se dodalje malje slatkuga vrnjiča ilji mljekeca.

Od repe kaj je znalje ostati drugi se dan kuhal čušpajz, bažulj z riepu. Bažulj se h večer namočil kaj je drugi dan omekel. Del se kuhat h slanu vodu i gda je zakipel, prva se voda hitila. Unda se diela friška voda, alji vruča. H kuhani bažulj diela se kuhana repa. Na tavicu se diela žljičlka masti i par žljic glatke melje. Se se miešalje poljehku kaj bi se spekel emprin ilji zafrik. Gda je več melja bila žarka, delje se na te sitne kosanoga bieluga lukeca, par put se obrnulje dok je lukec počel dišati. Unda se dodalje črljene paprike, podljejalje z mrzlu vodu kaj se emprin nej zgrudil, zmiešalje se i hljejalje h lonec z bažuljem i z riepu. Na ljehkomu ognju se mieša dok ne zakipi. Po žmahu se kuhilje zasolji i z octem zakiselji.

Bog vam blagoslovi.