Dok lučem čez okne kak dešč curi i kak alte bljesičeju po ceste kak da me nekaj ščiplje pri srcu. Bljiži se Božič. Gruntam si. Pak kaj sme mi ljudi tak postalji zločesti kaj pak neme za Božič ilji pred svetek imelji snega. Božič bez snega za mene je kaj hiža bez družine. Pa kaj neme pod škornji osietilji kak snieg škripi pod zboksanemi škornji gda se pe na Polnočku.

Nebi se štiela prevrnuti h stare, za tere mladi veljiju da stalne klagujeme, alji mene je zbilja žal kaj denešnja mladeš ne doživljava Božič kak negda mi. Teške je denes najti kaj bi mlade za Božič moglje raduvati, gda več se kaj očeju imaju. Žal mi je kaj več na ljiete, bar nemaju pravi bilji Božič kak negda njihvi starci. Ceste po tere denes ciele dane slobedne veljime „letiju“ šplehnati ljubinci i dielaju halabuku, hu cajtu prie dvajst-trideset ljiet bile su krasni bielji puti. Nje je čez dan žugljalje sunce, a hnoči su se zviezde igrale i skakale z jednuga mesta na drugi. Tak, če bi doj po noči išel po putu nie mu triebalje petroljejke ilji karabiterice.

Mesec, zviezde i snieg osvetljavalji su tiri. A po ta ista sniežna vuljica po danu galopiralji su konji zapreženi z sanemi. Ljudi su zaprezalji svoje konje, peljalji k domu koruznicu tera njim bi ostala h polju h hrastava, a niesu je stiglji dopeljati k domu. Pripeljavali bi i z huste drve tere su takaj ostale složene po husta, jer jih je rani snieg iznenadil. Konji, gda su pak vljieklji sani, imelji su na glave male zvončeke teri bi zvonilji. Sela i puti bilji su puni zvonjave, a zvoni kak da su zvalji seljane da si sedneju na sani i malje se prepeljaju.

Gda bi sklalji one kaj bi vozilji, foringaši niesu žaljilji potirati svoje konje z sanmi, naklasti decu ilji starieše i prepeljati čez selje. Gizdave bi držalji vojke h ruka, a konji bi z putniki galopiralji po selu. Z konjske gupce kadelje se kaj z hižnuga rafunga. I oni sami kak da su bilji gizdavi kaj z svoju zvonjavu zoveju one teri su se štelji prepeljati ilji one teri su jih čez male, na pol zmržnjene oknece lukalji. Zmržnjeni pak okneci na negdašnja drvena hižica bilji su kak da jih je pocinfral najvekši umetnik. Šare, tere su krasile male glajže, kak da su se šepurile jedna pred drugu i skrivale se pred sunčekem kaj jim nej pokvaril ljepotu. Z rafunge se kadelje, a družina se držala oko špareta. Onie teri su imelji pajceka za klati večinem su te napravilji. Klobasice su bile na najžu podvujene, a mese h pacu. Sopun skuhan, a maščenjaki puni z mašču i čvrčki. Muži bi kre komljina sedelji na male šamrljine i ružđilji koruzu. Babe bi triebile bažulj dok se na šporetu vručela voda z teru su se parile hadre.

Kak se bljižil svetek triebalje je ves vieš i hadre pofrižati. Gda su babe otparile hadre i hparnem lugu zežuljile šari vieš išle su na potok hadre spirat. Na glava su imele pocvitek na terem je lježalje korite pune hadri. Pralja je h ruka, ne rietke, nesla i sekiru z teru si je na praljišču rezbila led. H rupe, tere bi si pralje napravile spirale bi flake. Črljene, na pol zmržnjene prste, metale bi tuj i tam pred čube i par put hu nje huknule toplji zrak i unda znovič fljesik zepirale hadre kaj njim se na rupe nej delal novi led. Z babami na praljišče znala su iti deca kaj su pomagalji zdiči hadre z koritem na glavu. Malje dalje od praljišča dok bi babe prale deca bi se skljizalji. Led je bil fejst debelji i hu ove cajte nie bilje straha da bi popustil. I deca i babe bilji su srečni gda su išlji h k domu če niesu prsti na noga i na ruka ozeblji tak kaj bi zanoftelji. Ščem se došlje k domu, zulji su se škornji, a nuče metale na suš ulji gret, pak unda znovič z toplemi zamotalji noge. Vieš se pak pometal po roljine ilji na špagu tera bi bila zabita ščavljem iznad šporeta. Hadre tere niesu stale metale su se na plot i za čas postale trde kaj špleh. Čakale su svoj red na špage h kuhnje.

Na svetek sv. Lucije h kakef črepek ilji šplehnatu koštuljicu diela se zmiešana šenička z zemlju. Najprie se diela na roljin kaj bi prie prekljiela, a unda ne oblokec. Lukalje se kak je šenička potirala. Če je zrasla ljiepa, gusta i zelena, druge ljete bu zraslje prec ljiepe šeničke. Te je pak unda značilje da bu dosta kruha i da ne glada. Zelena šenička diela se pod cimer, a poklje blagoslova hiže dala živine kaj si je pojiela. Tak je živina pojiela diel blagoslova i bila plodneša.