Malje, malje, gda otpreš novine prečitaš tak nekaj grduga kaj te prejdeju čami, od maluga prsta na noge do zadnjuga lasa. Sakuga normalnoga gda prečita da su se deca ilji mladi potuklji do krvi ilji čak do smrti, makar ne poznaju diete ni starce, stepe zimica.

Iste tak pri srcu tišči gda se čuje ilji prečita da je teri mladi čovek, teri još nie zakoračil h življenje zdigel ruku na sebe. Još sme k tomu imelji za čujti, ove dane, da je h daljeke Amerike samehbijanje jednuga mladuga stvora, gledelje na miljijune ljudi, a da nišče nie z prstem mieknul. Unda se čovek mora pitati: „Kaj se te denes dogaja?“

Krive bi bilje reči da se i prie niesu mladi med sobu pokičkalji i zbuhtalji. Večina je te bilje radi puc. Poviedaju, a i ja nekaj pamtim da je saka prščenjska zabava skončala z obračunem dečkof. Niesu ni puce ostale bez šlopce i fučka na glave če se niesu dobre ponašale. Največi zamer njim je bil če su z nekterem dečkem nie štele iti tancat, a poklje bi z drugem krenule. Takva je puca zaslužila jednu za vuhe, a unda je te i bil mam razlog za obračune med dečkmi. Bilje kak bilje, se bi završilje na fučka, potrene nose i do druguga prščenja bi se pozabilje.

Ove kaj se denes dogaja straši sakuga normalnoga čoveka. Da mladi sviet more nekuga hbiti same radi toga kaj ga neče za dečka, radi toga kaj mu nema nič dati gda ga presretne, z čista mira ilji bilje kakvuga razloga. Te su strahote. Si gruntaju, mudrujeju, filozofiraju, a rešenje njim je pod nosem, same ga trieba videti. Nešče bi triebal vudriti po stolu, pogotove h familjije i pokazati gdoj je gazda. Istina je, primera radi, teške je zabraniti nekomu lukati h teljevizor.

One kaj je za decu h rezložne vrieme za lukati, straši čoveka. Več duge niesem poluknula ni jeden fil na terem nie krvi, gutenja, klanja, silovanja i da dalje ne nabrajam. A baš hu vrieme gda deca lučeju hu tu koštulu. Nam ne triebaju sakojačke poverenjstve za borbu protif nasilja, onuga ilji ovuga. Se je te ljiepe elji je hdien. Najvažniejše je vrnuti matere h familjije. Vrnuti matere dece, tak da one budu ž njimi veljiki diel dana, a da o nedelje gda nejdu h školu i ne govorim. Niesem misljila, kaj se nej tere babe pobunile da moraju biti same doma, a ne iti na delje, nek da njim se da več cajta kaj bi mogle biti ščem več z svoju decu. Kaj znači dece nedelja ilji svetek gda je same. Kaj mu je za delati dok je menši nek lukati h teljevizor i lukati kaj česa. A gda poodraste lutati po ceste i delati najprie male, a unda veljike bedtoče.

Nišče od starce nie odguslal za rešetkami zate kaj mu dieta prie nek je punoljeten landra okol. A gda dojde doma, gdo bi ga videl da dojde, reklji bi po modernem napušen i nacugan. Če negda i teromu starcu kaj veljiš, mam je te napad na njega i njegvuga ljubimca. Si imaju sprič, za te gda idu drugi, za kaj nej išel i njegef. Gda se kaj grduga dogodi, krifci se iščeju na kriva mesta. Denes je nalježe pustiti detetu da diela se kaj mu je volja. Tak su i stručnjaki, terem je stalje do dece, napisalji par pravilje kak čovek more upropastiti svoje diete. Ne od škode da vam jih i napišem:

1.Ispunite mu saku želju, pa ga bute uverilji da se ves sviet obrača oko njega.
2.Gda kune ilji bu prost, smiejte mu se sega guta kaj bu veruval da je zabaven.
3.Najte mu govoriti o moralu ilji kaj velja ilji ne velja. Najte mu govoriti kak se mora ponašati prema starešemu, školje, pajdašu...
4. Se za njem pospravljajte i nej nič ne diela.
5. Svadite se pred njim najbolj kaj se more, pak ga unda nič ne moglje iznenaditi.
6. Dete mu penez kuljike oče i more potrošiti. Za kaj bi vaše diete patilje kak negda vi.
7. Spunete mu saku želju, gda se diela o jelu i pilu.
8. Gda ga kritizira vučitelj, sused, rođak ilji pajdaš, navieke budete na njegve strane. Unda bu odgojen u uverenju da je naviekee h pravu.
9. Gda napravi neke grduga vi ga zavetujte i če trieba budete krivi meste njega. Tak bu on oslobođen sake odgovornosti.

Ak ste napravilji 80% od onuga kaj ste zdej prečitalji, budite zadovoljni, postiglji ste cilj:
UPROPASTILJI STE SVOJE DIETE! A unda se nie trieba pitati, kaj se te denes dogaja?