Počelji su cajti čakanja nejveseljiešuga našuga svetka, Božiča. Cajta, kak spomen na rođenje maluga dejčeka, Isusa. Vuljice i hiže več bleščiju, halabuka sakojačke mužike vudira po vuha. Malje je čudne kaj se sega toga oko nas dogaja gda zname da nam se črne piše i da idu grdi dani.

Čovek nemre, a da se ne pita kuljike bi se hižic moglje zgreti da se barem malje prišpara, da bar sakuga druguga stupa bljesiče zvonček, sniežna pahulja, maršljinek, lampuš i kaj česa druguga. Nu, kaj bume šparalji zdej. Bume unda gda bume moralji. Šparalji sme unda gda niesme smelji hu tem cajtu delati takvu halabuku. I baš hu onem cajtu gda se pririhtavalje Božiču, točne prie devedeset ljiet, kak Božje poslanje petuga prosinca h mestu Petrijancu, h familjije Kranjčić, rodil se dejček terem su starci dalji ime Štefek.

Gda ga je mati žukala h krilu sigurne je imiela želju da jednuga dana gda bu zrasel bude pošten i dober čovek. Ne bi je bila briga h srcu da je znala da bu njenji dejček postal ne same dober čovek nek i dober župnik. I te ne bilje kakef, nek župnik teruga se i poklje četrdeset ljiet kaj ga več nie, zmišljavaju i poštivaju ljudi teri su ga poznalji.

Radi svojuga posla vlasti su ga stirale z Zagreba 1950. ljeta, a h Križevce je došel dvie ljiete poklje. Od gda je hmrl, 1968. njegef grob h Križefcima navieke je pun rožic i svečic. Vierniki za njega veliju da je živel i hmrl na glasu svetosti. Baš su za te h Križefcima napravilji udrugu, tera narodu oče povedati kakef je župnik bil Stjepan Kranjčić. Ak Bog da morti za se one kaj je delal za se ljudi, a največ za najsiromašneše, bude preglašen blaženim.

Denes su cajti gda jedni o drugem se menje vodime brigu i kak da sme čoravi za potrebe onih terem je najteže. Z miesta z tere bi triebalje, se menje se čujeju pobožnosti i topljina. Več put su te špotanja, prekoravanje i prezivanje. Dobrota kak da se zgubila negde pod teretem življenja. Kak da sme gluhi na zazavanje najpotrebnejše, a sprič su nam grdi cajti.
I cajti h terem je živel dr. S. Kranjčić, niesu bilji ljiepi. Ze sie strani pritiskale su ga sakojačke zloče, alji on nigdar nie pozabil da je poslan na ovie sviet da h ime Boga služi svojemu narodu, a ne on njemu.

Ljudi su ga imelji radi, radi toga kaj njegef stol nigdar nie bil puni. Se one kaj je imel podeljil je onem terem je triebalje. Sakomu gdoj je pokucal na njegva vraca, one su se otpirale. Sakomu čoveku h njegve blizine bil je potpora. Pešice ilji z becikljinem hodil je oko ljudi, oko svoje župljane, okupljal jih na meše, veronauke, svibanjske i ljistopadske pobožnosti. Jake mu je bilje drage gda su ljudi jedni z drugemi bilji h prijateljstvu i ljubavi i radi toga je posebne gajil blagodat sakramenta pomirenja.

Ljudi se navike radi malje poriečkaju, za te je Kranjčić svojem farnikem bil na raspolaganju h saku dobu i miril jih, gajil ljubav h njihovem srca. Vodil je brigu i o svoje pajdaše župnike terem je bil duhovna potpora. Udruga tera povieda o svetost draguga njim župnika na čelu z Tanjom Baran, nada se da buju jednuga dana doživelji da se bu priznalje njegve veljike delje. Petuga prosinca na dan njegvuga rođenja, za te se buju hnogi zmisljilji h moljitve i pesme na njegovu svetost. Diel pesmice tera govori o tomu svetomu čoveku, morti i h naša srca najde nekaj za se. Da i mi hu ove dane budeme na putu svetlosti i dobrote.

:.. On me naučio kako ću se moliti
Kako svijeću krščansku uljem doliti......
......Bogat bio duhom, a volio skromnost
Otajstva vjere i danas je moj most
Pred Boga i ljude ja s pjesmom izaći ću
Da budem svjedokom o Stjepanu Kranjčiću..
Siromahu davao sa sa svojega stola,
ljubavi je imao za bosa i gola.
Osmjeh je darivao ko biser sa lančića
svakom tko je kucao kod S. Kranjčića...