Mi stareši navieke pripoviedame kak je negda saka košta bila žmahna. Mlajšem te baš i nie preveč čiste i teške moreju razmetni o čemu mi stareši pripoviedame gda njim je denes domači čiček žilaf, a od druge košte njim nie h želuce dobre. I njim trieba dati za praf gda su nafčeni na moderne žmahe teri več put nemaju nikake veze z stari. Morti i mi niesme h pravu gda veljime da je negda se bilje bolje kaj se košte tiče. One jedine kaj je sigurne da je negdašnja košta bila zdravieša. Nie bila zatrovana z sakojački „copri“ protif kukce i dračinja.

Negdašnja košta nam je bila fina i žmahna jer je nigdar nie bilje preveč pak si unda z volju pojel onuljike kuljike te je sljedilje. Na jednuga je h fiže išla šnitka kruha ilji gibeničke. Više je mogel dobiti same betežni ilji menši teromu bi unda starieši dalji griz več ilji matere svoj diel. Radi toga se se šteču pojelje i bilje fine kaj su se poklje jela ljizalji prsti, kak su negda ljudi reklji. Hu ovem ljietnem cajtu ljudi su se največ raduvalji bučnice. Ona je z kuhiljem bila najvažneša košta h ljietna meseca. Nie bilje moči zarajtati buču nič raneše nek pod kraj srpnja meseca.

Prava je gazderica bila tera je imiela bučku za Janjinje. Denes z modernemi hamuljijami bučke moreme imeti i pune prie, a iste tak spraviti jih h moderne škrinje i tak ju jesti cielje ljete pak nam unda nie nigdar preveč guštna, jer nie veljika šteča za nju. Negda se pak znalje reči da bučnica nie dobruga žmaha jer je buča pre grižava, vodenasta, sipka ilji pre trda. Gda je več bilje prec buč unda su babe z noftem palca hpiknule kre buče i donesle odluku tera bu najbolja za speči bučnicu. Kak se je delala gde bučnica, bolša ilji lageša, ovisilje je o spretneosti babe, finoče melje, buče i dojnuga. Kak se je negda dielala bučnica teške je denes poštivati te stare šege. Radi toga i stariejšem niesu žmahi ostalji isti jer njim još navieke h spomenku nepca spiju stari žmahi. Denes, gda se dielane h nekave brzine, bučnicu, kak jednu od važnejšu starinsku koštu hu ovem cajtu mlajše ženjske rade ne dielaju jer je z nju veljiki posel. Kak god da se oče pothitriti, nemre se preveč na cajtu dobiti.

Saka ženjska diela bučnicu na način kak su ju nafčilji njenji stariejši. Unda ona tak vuči svoje mlajše pucerljinke če se očeju nafčiti. Saka bu unda stariejša rekla da je baš njenja prava i da baš takva mora biti. Te si sami sebe malje godime, nu ipak saka bučnica je dobra jer je hu nju dete cajta i ljubavi. Za one mlajše ilji one tere se očeju morti nafčiti delati bučnicu da znaju, ljehke vam poviem. Ja mislji da je moja bučnica najbolša, ha,ha,ha. Nu znam da se z tem nej složile moje pajdašice Mire, Verice....I one tak misliju za svoje. Kak ju ja dielam probajte napraviti i vi.

Najbolje vam je napraviti barem dvie kostrole bučnice jer za jednu vam se ne splati smraditi po hiža tere več put imame za lukati, a ne za živeti. Za dvie kostrole bučnice treba biti bar pol buče, debele bar kak petljiterni lonček. Buča se nariba na riezance, dene se šaka solji i pusti da obstoji. Od glatke melje se omiesi tieste, od priljike osemdeset do dvedeset deka melje, malje solji, pol deci volja, deci mlačnuga mljieka i deci mlačne vode. Tieste se omiesi i nesme biti ni preveč mehke ni preveč trde. Gda se dobre omiesi, podelji se na dva diele i saki se kupček dobre posebne pomiesi, poljijeju malje z voljičem, pokrije z najlonem ilji krpu kaj se neju posušilji. Ostaviju se na topljem najmenje pol vure kaj se počineju. Če duže stojiju lježe se rezvlačiju. Dok se tieste počiva buče se deneju h kuhinjsku krpu ilji malji žakljec i dobre hu njem zažmekneju. Ostaviju se stati dok se tieste ne otpočine. Unda se h ocejene buče dene pol kile friškuga sira, dvie veljike žljice rastopljene masti i dva deci slatkuga vrnja ilji mljieka. Krpa na tere se bu sukalje tieste posiplje se z oštru melju kak i tieste prie sukanja. Rasuče se kuljike se more, a unda se pomaže z malje volja ilji rastopljenem putrem. Tak namazane tieste se z rukami resteže ščem več. Bučne sirilje se na tenjkem namaže z dve kraje i unda z krpu za sukanje zasuče ze sakuga kraja do polovice. Tak se dobi dupljična duga štruca. Z ruku se zazlamieniju štruklje i zriežeju z tenierem. Štruklji se posložiju h kostrolu i na saki štrukljec se den malje putreka prie pečenja.

Probajte. Bog vam blagoslovi.