H življenju čoveka bežiju sakojački cajti. Od časa gda hdehne prvi put ovezemaljskuga zraka, pa se dok ga zadnji put zdehne, pratiju ga sakojačke grde, alji i ljiepe hamuljije. Gda su grde unda h pomoč največ prizava Boga. Gda su pak ljiepe retke gda se i na njega zmislji. Morti uda gda ga prekune. Te je tak, navieke pri sie ljudi. Saki barem malje zglajza, na životnem putecu i napravi bedastioču tera nie draga Bogu, a negda i samomu čoveku.

Teške je denes živeti po onomu kak bi reklji, kak Bok zapovieda, gda nas napadaju sakojačke nečastive sile. Si mi teri sme negda išlji na veronavuk h cirkvu, nafčilji sme se h cirkve ponašati. Iste tak nafčilji sme se poštuvati zapovedi tere je Bog dal ljudem. Kak čovek odrasta tak malje po malje na nektere moljitve, veruvaje i zapovedi skore pak pozabi. Baš sem nekteri dan, gda sem malje duknula na našu plavu mlaku, lukala ljudi oko sebe. One tere nemreš fuljati su ljudi z decu, od one najmeše do one več vekšeše, teri još navike očeju z starci pajdašuvati. I baš sem se tie ljudi z decu nagledela i mam grutala. Vrtelji su se starci oko svoje malje ilji malje vekše panjkrate. Pazilji jih, mazilji jih, senjčilji njim i poljehku one najmeše vadilji vode. Z onemi malje vekšešem su se h vode naveljikom brčkalji, vučilji jih plavati, loptalji se ž njimi h vode, podurnjavalji i još kaj česa. Gda su zišlji z vode, brisalji su jih, zamatalji h veljike vručike i metalji pod hlad. Uda su jim hgajalji z hranu i pijaču. Davalji su jim sakojačke modere jiestvice i pijače. Sprešetavalji se ž njimi med obroki, a deca su ljizalji veljike sladoljede. I tak je te trajalje od jutra do mraka. Pune su naše plaže na moru pajnjkrate i njhove starce. Te je sakak ljiepe.

Tak i treiba biti. Decu se trieba paziti i hgajati jim. Če napraviju kakvu bedastoču nesmeju se starci srditi ilji ne daj bože, da ga malje sprašiju po turu. Če bi doj videl moglje bi grde završiti. I tak starci odelavaju svoju roditeljsku dužnost kak se šika. A uda dojde one o čemu sem si gruntala ja ove dane na naše veljike mlake. Dojde ona četrta zapoved teru je Bog prepisal ljudem:
„Poštuj oca i mater da dugo živiš i dobro ti bude na zemlji!“

Zmisljila sem se te zapovedi Bože radi toga kaj niesem na te naše veljike plave mlake vidla ni jedne veljike detece da špaciera svoje starce. Je, moči je videti starce kak se kupljeju, sučaju i zabavljaju z hnučeki. Nu nie moči videti decu, veljike i odrasle ljudi, kak napestuju svoje starce. Retke gde ilje nigdar nie moči videti da su jih dopeljalji k mlake i bar malje vrnulji onuga kaj su negda starci za nje delaji. Niesem nigdar vidla da odrasla deca peditiju svoje starce tak kak su negda oni peditilji nje.

Deca se vučiju od stareše. Če je tak unda bi se moglje dogoditi da njihova deca neju imelji gde nafčiti kak se trieba pedintiti stareše i vruti jim bar malje ljubavi, radosti i brige kak su negda dalji oni za svoju decu. Velji se navike da se se plača i vrača. Tak bi uda i tie mladi ljudi denes zutra moglji biti pozabljei od svoje dece oko čieve se rieti zdej vrtiju. Zabadave se buju srdilji na svoju decu gda buju veljiki kaj jih neju štelji napestuvati. Ne bu njim za zameriti, gda njim nie imel gdoj pokazati.

I tak, dok se mladi pacaju na naše veljike mlake z svoji malci, njihovi starci negde na domačije jedva čakaju da se vrneju k domu. Možda njim je i krive kaj i za nje nie mesta negde na veljike mlake kre svoje dece i hnučiče. Morti bi i oni štelji da jih podragaju ruke njihove dece gda bi njim mazalji maščobe po stare, zmučene kože, kak su te negda delalji oni njim.

Cajti su novi i nove šege. Pisani zakoni teri veljiju da starci moraju paziti na svoje panjkrate, voditi brigu o nje i skrbeti za nje moraju se poštuvati. Nesme se delati kontra. Oni ne vežiju za briguvanje dece za svoje starce. Tuj važiju druge zapovedi, Božje. Alji do Božje, malje gdoj se i zmislji, a kamolji da je se drži. Za te Božje zakone jemput buju senek nekteri drugi suci i sudi.