Retke da imam cajta, a i volje, poluknuti h oblog čez teruga lučeme h sviet ilji bi reklji, h teljevizor. Gda bi se i našlje cajta, nie preveč volje jer od di-kanja i gole riti mi se h želucu diela pljučkanje, znal je reči moj pokojni sveker, bog mu dej duše ljehke, gda mu je se išle na žifce. Ipak, one kaj se mora poluknuti su viesti, če i črne, kaj čovek ne bi bil kak luteran. Mora znati kaj se po svietu dogaja. Za domaju se zna, jer je več na ljiete iste, same se saki dan zamata h novi paperek, pak odmata i tak...

Ipak me raduvalje da bum lukala, na teljevizoru, kaj se događa na selskem gospodarstvu, tere denes moderne zoveme farma. Štiela bi si onak, počinuti pri lukanju kak se nega živelje. Štiela bi videti kak denešnji mladi sviet teri ne mora, fala Bogu, živeti bez sie moderni hamuljiji, živi kak su živelji njegvi pradedeki, i još daljnja rozga. Dok sem lukala ta čudna stvorenja tera su došla na jedne takve ljiepe selske gazdinstve, na terem bi negda h selu na njega, bila veljika zavist, mam sem znala da od spomenka na ljiepe, drage cajte ne bu nič. Obljiečeni kak da idu na bog te pitaj kakvu zabavu, došlji su po selske pute na dišeče, tople i ljiepe selske dvorišče. Tie ljudi, gda sem jih lukala, čudila sem njim se kak su se obljieklji kak da su opalji z Marsa ilji z nektere druge planete, na mehku i ljiepu, z znojem, a sigurne i z krvlju, nataopljenu zemljicu. Došlji su tie mladi ljudi da bi nekaj nafčilji, da bi vidlji kak su negda ljudi živelji. Došlji su da bi moglji razmeti kak nie se h skupa krpica, golje riti, napumpana čuba... Da su baš z ovakva mesta, poteklji ljudi tere je rosa hmivala, sunce brisale, a kravice hranile. Baš tie, teri su krenulji z takve slične gospodari, odneslji sobu zemlju pod nohtami i suhe šmrklje obrisane h rukavu, baš su takvi premenilji sviet.

Sigde na svietu, pri sake službe, a i fiže mora biti gazda. Gazda teri zna kaj oče i kak oče. Gazda teri prvi zakači pri poslu, a unda more vudriti pri stolu z šaku i napraviti reda. Če gazde nie pri hiže ode gospodara na bubenj. Videti je bilje da nie gazda ljehke biti i da se se na te farme dogaja, kaj pri baba na zdencu, klepetanje. Si tračaju gorše nek prie, si lučeju jeden druguga kaj da bi mu se prikeljil kaj pijuvka. One kaj je najljepše i kaj cinfra tu selsku ljepotu su draga i ljipa živinska stvorenja. Žal mi je mujcice teru natežeju za vime, jer znam kak te blage bolji. Strpljive je i dobre jer da nie tak heznula bi z repem ilji z nogu saku tera je pod nogami. Kak mujcica luče svoje teljeke, kak ga z jezikem hmiva i gladi, slika je teru je več rietke videti.

One kaj je čudne gda čovek luče, te mlade stvore teri buju živelji par tjedne na jednem takvem ljiepem frtaljčeku zemlje je kaj ne vidiju su tu ljepotu. Furt cvekaju i nekaj prigovaraju i vadiju se na „izvanredne uvijete“. Pak baš pod takvemu kak oni velji, uveti, još hnoge detece senja svoje senje. Još hnoga baba pere hadre na zdencu i riba z pepeljem lončeke i posudu. Hnogi još živiju od prodanuga mljieka od kravice-dvie, jajčeka, suhuga špeka i šalate z vrta. Hnogi još htrgneju od svojega gupca kaj bi prodalji i imelji od čega iti h štacun. A tie mladi ljudi teri su triebalji pokazati kak se živelje i još furt negde živi, same jambraju. Lačni su pri punem vrtu zeljenjave, pri pun škrinji melje, pekmeza, pri pune štalje blaga.

Negda bi se saka svekrva posvadila z snehu gda bi vidla kakef ima „red“ po ormare kak tie mlai stvori zdej. O redu h kuhnje da se i ne govori. Bilje je sega, i još je, sirotinje po selu, alji se navieke moralje se držati h redu. Drvene klimave klupice, stolji, šamrljini i rezdreni podi moralji su biti čisti. Hiža je dišala po zribana prsnica, pode i zglancanom stolu. Svietila se posuda h tere je bilje mljieke, a z špareta se navieke dimilje. Kipelje je tuj kuhilje, svinjske jelje ilji hadre. Poklje posla po dvorišča, h kočaku, h štalje i na cielje gospodare, našlje se cajte i za šindrlicanje. Šindrlicanje, spominki z navukem i mudrijami pri luči ilji petrolejkami, dok je blage mirne počivalje, šege su tere nemreme videti na obloku z terem lučeme h sviet. Nie moči videti ni mačka teri se kak negda pri komljinu stisnul i zadovoljne prel, poklje kaj je preduhitril miša teri se stiha šuljal k žaklju z melju. Denešnja farma, deljejke je od draguga življenja h spomenku ljudi, a tem ljudem teri tam jeden cajt živiju,veljika muka. Baš šteta.