Naša ljiepa zglancana, i največ po špage, zrihtana dvorišča, nemaju nekakvu živost kak negda hu tem cajtu. Istina, niesu negda dvorišča bila tak zelena i gizdava kak denes, alji su imele duhu i šnjof na poseben način. Po kraje dvorišča bile su skopane veče i menjše grabice h tere je bila voda za živinu. Živina se tuj napajala, a guske i race hmivale su svoje ljiepe, guste i glateke perje.

I baš na prtuljet po dvorišča se čula gizdava i vesela galama živine tera se spravljala na parenje. Z jednem okem furt na dvorišče, lukale su gazdarice i pratile kaj se te dogaja kre njihovoga poceka. Bilji su te cajti gda se saka baba hgajala z drugu tera bu imiela več živene. Po čievem dvorišču je več gagalje i kvocalje ta je ženjska bila za pohvalu. Radi toga je saka dobre pazila kaj je odabrala pravu, ljiepu i plodnu živinu za plemen. Dvorišče je cinfral kokot teri je imel oko sebe kokoši sake felje. I sam kokot teri je znal biti ljiepi i pofarban z semi farbami, črni, a nekteri i golovratasti, šepuril se oko kokoši.

Gda je gazdarica pobirala jajce po gnjezda, posebne je lukala tere su jajce debelše, glatke i z čvrstu lupinku. Te je metala h korbicu i spravljala za nasad. Ščem se tera kokoš znesla, počela je kvocati i širiti krila i vljieči jih po zemlje kak puran. Če je ostala na jajca sedeti dva tri dane unda se je nekam h senjak ilji h štalu kam nej išla druga živina, napravilje gnjiezde. Gnjiezde je bilje napravljene od fine krme, debelje natiskane h kakvu drvenu zbitu koštulu. H gnjiezde su se pometale kokošine jajce, a kljike se delje ovisilje je kak je kokoš, kvočka, vejika i e sedi na jajca prvi, drugi ilji trejti put. Kokošinam jajcam je trmin dvajstjeden dan, pak se o tomu vodilje računa. Znalje se da su najbolje kvočke i najstrpljivieše pure, pak je unda tak saka ženjska imiela pri hiže bar jednu puru. Purana nie triebala imeti nek je puru, gda je počela čepati po dvorišču odnesla selje gdoj je imel purana. Diela ju je kre purana, malje popazila dok pura nej bila pojarčena. Prešla je z puru dima i čakala gda se bu znesla. Pikaste puranjske jajčeke bile su vekše nek kokošine, alji i pura je bila vekša nek kokoš pak se pod nju moglje nasaditi več jajec. Na puranjska jajac sedelje se četiri tjedne.

Posebne su na „ciene“ bile guskine jajce. Guske je imela malje bolja gazdarica, a i sama guska znesla je pune menje jajec nek kokoš ilji pura. Radi toga je takva bolja gazdarica ostavila za plemen dvie guske i gusaka. Gusak je stezal vrat po dvorišču, napadal drugu živinu, čak i ljudi, i tak pazil na svoje guske h dvorišču i na gnjiezdu. Guskine jajce bile su najvekše i stalje jih je malje pod kokošinu kvočku. Guske su bile rietke kvočke pak su se njenje jajce nasajuvale največ put pod puru. Plemen rac je bil takaj od dvie race i racaka. Još dok su bile mlada živina racaki su se odebralji po glasu i po zafrkaču na repu, dva tri pera h zrak. Na racina i na guskina jajca kvočke su sedele četiri tjedne. Kuljike je ženjska imiela nasajene kvočki nie poviedala druge, se dok se živinica nie zvaljala i bila dosta jehka da se pusti van. A kvočka se saki dan jemala z jajec, hitila van na dvorišče kaj bi se pokumrila, pojiela malje travice i zljuhtala se, kaj je duže mogla sedeti. Gda je prešlje pol cajta od nasajuvanja do trmina, babe su pri vuha spitavale e je jajce šlopec ilji dobre.
Jajce h tere nie bilje „zavezane“ živinče fejst je šlopalje i postalje šloprtek. Kaj bi bile sigurne da ne hitiju dobre jajce još su h poldan, gda je bilje jahke sunce, h jednu ruku dela jajce, a z drugu senčile jace, zdigle ga zrak prema suncu i lukale e se nutre kanta. Če se kantalje te se jajce moglje hitati, kaj se zdravem jajcem dalje več mesta.

Na sam termin jajce su se metale na site ilji rešete i gledelje e je jajce pri miru ilji se pomikava. Če se je pomikavalje unda nutre giglja živinče. Počaklje se jeden dan i unda su se jajce išle natucat kaj bi se živinče lježe zvaljalje. Na dan gda su bilji trmini za valjanje držalje se do hnoge zaščepe. Tie se dan nie smel kuhati pori luk jer je duha poruga luka štiela zadušiti živinu h jajcu. Takaj se nikomu nič nie smelje dati ilji posuditi od hiže, jer se veruvalje da živina ne došla k sreče. Prtuljet je cajt za nasajuvanje, nu stare šege i poslji več su rietki kak i dvorišča puna domače, zvaljane živinice.

Podijeli s prijateljima