Prtuljet je poluknula po naše brege, njiva i dvorišča. Došla je kak i jezero ljiet prie i sigurne još bu. Prihajanje prtuljeti, onak po kaljendaru, več se duge računa. Nu njenja čud, a unda i poslji kak da su se zmenilji, kak i ljudi. Prie se dobre zanalje da se sljiečenjem zimskuga kaputa jeden cajt mora nositi prtuljetni, malje tenši. Makar je moda sa zbrčkana več duge ljiet malje je čudne da se z zimske obljeke mam skoči h ljietnu. Još se niesme oporavilji od cvokotanje zubi, a več nas švic posipava če se malje pošpancierame po dvorišča.

Denešnja zglancana naša dvorišča imaju jednu vrstu ljepote. Saki se zalaže da mu bu dvorišče čiste od sakojačkuga suča, da bu zmetene i dobre za oke. Nu hu temu čistamu i zglancanomu stanju i dvorišču kak da nekaj falji. Falji živost tera je negda cinfrala sake dvorišče, domačiju grabe i potočeke. Več duge se po dvorišča ne čuje kvocanje kvočki ilji se ne vidi šepurenje purane teri z črljenu glavu gizdave hofiraju oko pur. Več nema gdoj, a več i malje gdoj zna kak je saka baba na prtuljet imiela pune posla teri se je mogel videti po vrtu, na njive i h trsju. Veljiki posel bil je i onie teruga je dielal poskrivečki.

Poskrivečki pred svojemi susedami i pred onemi za tere se znalje da su krivuga oka, saka je gazderica skupljala jajce za nasad. Hjutre, prie nek su kokoši, pure, race ilji guske bile puščene z kočaka van, saka ženjska je svoje živinče ogledala. Mladi denes neznaju da je sake jutre gazderica porinula kažiprst h pišek živinčetu i tak je dobre znala kuljike bu tie dan našla jajec na gnjiezdu. Kak su male hižice po selu bile jedne do druge tak su i štalska stanja bila skore naslonjena jedna prema drugem pak su kokoši znale završiti na gnjiezda h susedove suše. Največ brig babam su zadavale pure. One su bila hmetljive tak kaj bi babe radi njih bile srdite. Pure nigdar niesu nesle jajce na gnjiezda h senjaku, na štalje, nek su se skrivale kre plote, pod kopiče, a negda čak i na samem kopiču. Preskočile bi male ploteke i prešle i dalje od hiže h grmovlje. Gda bi je babe pustile van z kočaka, a znale bi da ima jajce pazile su gde bu jajce znesla. Pura kak da je te dobre znala. Čutila je da ju baba prati. Če bi ženjska duknula fižu deti na ogenj ilji duknula kam kaj nej vidla puru i ona nju, več je pura znala šmugnuti. Unda je počela potera za nju. Mudra pura se pak znala ščučnuti na gnjiezdu, biti tihe kaj ju je bilje teške najti.

Nie bilje rietke da se našla tek unda gda se več znesla i sama nasadila. Za pure se reklje da su prefrigane, da se najlježe zvaljaju z jajec malji purići, a da se puran najteže i najduže odhrani. Te i nie tak deljejke od istine, gda se dobre zna da se od maluga pureka do veljikuga domačuga purana trieba dosta pomuliti. Race i guske bile su takaj hmetljive pri nešenju jajec. Če su i kak mogle delale su same gnjezdeke od suča, perja, ljestine i sega kaj bi našle po dvorišča. I one su se skrivale kaj jih nej bilje ljehke najti, alji dok su one bile na gnjiezdu kre nje su gusaki ilji racaki žlavurilji i pazilji da jih druga živina ne srdi dok su na gnjiezdu. Pri rajtanju mlade živine babe su se držale mnoge šegi. Sreča pri nasadu bila je nekakva garncija da se bu čez ljete bolje živelje. A višak če je bil se je mogel i dobre prodati. Ni jedna se selska baba nie po selu i pred susedami faljila da ima kvočku prie nek je nasadila i dok se več nie zvaljale mlade živince.

Čuvale su one svoje nasade od krivuga oka i copra. Dobre se znalje da se nikomu ne da jajce za nasad dok se ne nasadi sebe. Niti jedna kvočka nije se nasajuvala na dan h terem je h ljetu Dušni dan jer bi bilje preveč zaduške. Držalje se i do šege da je najbolje nasaditi puranjska jajce h četrtek h poldan. Kvočke su bile nasajene po štala i senjake, a negda su se morale pokriti kaj nej biejžale z gnjiezda. Če bi tera kvočka s kljunem tukla po jajca pod sobu mam su je siročku ilji z trsnemi škarami oceklji komad kljuna kaj nej mogla delati štetu. A unda gda je sunčeke več fejst grelje kvočke su gizdave zišle z svojemi piščenci, pureki, žugicami i racicami van na dvorišče. Zvonila su dvorišča po nazavanju babi: „Pipi, pipi, pipi! Ljiga, ljiga ljiga ljiga!“

Zdej su dvorišča tihe. Več duge nišče nič ne nazava, več duge po dvorišča ne brbočeju purani i gusaki ne naganjaju živinu, a i sakuga gdoj njim dojde h dvorišče. Denes su nekakve nove cinfre po dvorišča, po tera nemreš znati da se prtuljet zbudila.

Podijeli s prijateljima