Ove dane sem bila kaj mišek z crtanoga filma Tomi i Đeri teruga sme negda si rade gledelji. I deca i veljiki rade su poluknulji kak se naganjaju maček Tom i mišek Đeri. Posebne sem se zmislila na mišeka kak je znal pobeči mačku, skriti mu se i onak z šapicu pobrisati švicnu glavu, odehnuti kaj mu je uspelje pobiediti hu te bitke. E baš sem tak napravila i ja, h nedeljnu jutranjku, gda su završile gosti moje trejt čeri. Baš kak i mišek, sela sem si h svoje samoče, zdehnula, alji veselje, kaj sem uspela i trejtu čer dopeljeti do puta po terem sem ju kak starec morala voditi ja.

Dobre znam da je odehavanje kratke. Iste kak i mišek teri je dobre znal da je same na jeden kratki cajt pobiegel pred mačkem i da bu naganjanje počelje z novič. Iste tak bu i pri mene. Počinek je same jeden cajt, a unda buju počele nove brige. Senek je čoveku drage kaj barem na jeden kratki cajt more sam sebe pofaljiti kak je napravil dober posel. Nie te ljiehki posel, nek žmehki kaj žrvenjski kamen, čez življenje voditi decu. Alji gda na koncu se skup ispadne več nek dobre, unda su i deca, a i starec srečni kaj su pripeljalji jeden diel svojuga življenje kak se naj bolje more. Denes je i te jahke žmehke, gda ze sie strani lučeju se zloče i na životne putece se morati boriti kak se najboljezna.

Faljiti trieba Bogu kaj pripomore da ispadne onak kak bi čovek štel. A mene se baš i te tak dogodilje. Ostalji su za menu cajti, ne baš ljiepi i ljiehki. Grdobi je bilje sakojački zaljejani z suzi, puni prazne žepe, grde rieči, alji ne za hdien. Se se te pozabi, gda čovek polukne za sobu i vidi životni putec pun zgrobenjke, alji ipak ljiepi i svietlji, gda su ga cinfrale tri zviezde. Zviezde mojuga življenja, moje pucke, radi tere čovek mora zdignuti glavu i ne baš malji nos zrak i raduvati se, kaj se ropanje srca more čujti nadaljeke. Gda se h nadra zavljieče radost unda i ljica bleščiju z smiehem teri more segreti sakuga gdoj se najde bljizu. Nema stiha, ni pesme, a ni tak veljike priče tera bi mogla povedati kak je te gda je čovek vesel i srečen. Probam, alji nejde. Ipak raduje senek da se bar malje te sreče more povedati i podeljiti z drugemi, pak se po starniski velji:
„Če ti je prijatelj raduval se bu skup z tobu tvoje sreče, a če ti je neprijatelj, bu se pojel od jala!“

Ja zdej veljim da sem baš fejst vesela i srečna, baš radi svoje pucki kaj sem jih mogla dopeljati po prave putece. Kak kruna njihove životne putece je odhajanja zamuža, kak se šika i saki starec za svoje detece želji. One kaj mene još več raduje kaj su pri ženidbe posluhnule nektere stare šege, a ne preveč lamatarile z novem, za tere več put čovek nezna za kaj se trošiju penezi i cajti. Nie su se se negdašnje šege za cajt ženidbe mogle napraviti. Za nje nie ni meste, a ni cajta. Teške se več denes more bilje gde čujti jedna od starinski z teru bi započel dever svoju deveriju:
„Poštovana svadbena svite, oko stola ovita, kaj ružmarinova kita....“!

Nema več kurenja krisa i popievanja Zorje h jutre gda se budi dan teruga goščeniki veselje dočakaju. Nigde več nie moči videti kak sneha zmieče pod teruga svati naštrajiju z tierjem, slamu ilji ljestinu. Se te ostalje je zapisane same h spomenke ljudi teri se još zmisljiju na te cajte, a jedna od njih sem i ja. Došle su nove šege tere se več put teške moreju razmeti, a pobrane su z obloke z teremi lučeme h Sviet. Jedna od, mene najgorše nove šegi su veseljice tere zoveju momačke i devojačke večer. I prie su se puce z pajdašicami opraščale z skupnem pajdašuvanjem prie ženidbe kak i mladenec svojemi jargani.

Nu one kaj je denes fejst smiešne i bedaste kaj su goščeniki na takva veseljica golji muži i babe, plačeni za tie posel. Razmel bi čovek da se tak nekaj događalje h cajtu naše babibic i dedekof teri niesu vidlji goluga čovek dok se niesu oženilji. Nu h denešnjem cajtu davati peneze kaj bi videl nečovu golu rit i „onu“ stvar nie starinska šega nek žalost i bedastoča. Ja sem pak imiela sreču da pri moja čerja su ženidbe prešle z poštivanjem starinske šege tere su se mogle poštuvati i rabljenje novih radi tere se nie trieba sramiti. I kak unda čovek ne bu srečen, gda se dobre prejde.