Do stare šega do tere su ljudi negda fejst držalji denes se ne drži nič. Teške da se i more držati gda se na pune toga oče pozabiti. Ljudi su negda furt govorilji:
„Kravica je mamica, a voljek je tatek!“

Te je značilje da če je pri hiže krava i vol unda nie trieba biti strahu da bu glada. Znam da denes mlajši sviet nezna (ne govorim na pamet) da je vol skopljeni bik ilji skopljeni muški od krave. Živinče tere je pored z konjem bil glavni pomagač h življenju ljudi. Konj je bil bolje gospodske živinče, brži i morti ljepši, alji za najžmekše posle bil je vol. Volji su bilji mudneši, nu moglji su vuprieti pri poslu več nek tere druge živinče. Gdoj je imel vola nie bil h strahu da ne mogel obdelati saki komaček grunteka.

Kravica je bila marše bez teruga se nie moglje preživeti. Iti zamuža puca nie mogla bez kravice i navieke se reklje da snehina krava nigdar ne hcrkne. Te je značilje da sneha pri hiže ima navike praf na kravu če bi morti od muževe hiže morala prejti radi smrti muža ilji tere druge grdobe.

Gde je pri hiže bila same jedna kravica, več nie bilje straha da bu glada. Če su pak bile dvie ilji več, tuj je bila prava gospočija. Onie teri su imelji same jednu kravicu, gda su imelji dojnuga davalji su svojem pajdašem, familjije dojne i na tie način „posudilji“ za cajt gda bi njihova kravica bila breja i nie dojila. Tak se pri sake hiže navike moglje najti friške ilji kisielje mljekece, vrnjiča, friškuga i suhuga sireka, a po pecilu bi dišal domači friške hrejeni puter.

Suhi sirek h košare bilji su kak cinfra sake hiže. H ljietnu dobu majalji su se gizdave h košare pod sterehu, a h zimsku obiešeni na prsnice povrh šporeta. Gda bi se krenulje nekam na polje ilji kakef posel osmieknul se suhi sirek z košare, del h žep i več put bil jedini obrok na traniku ilji njive. Dan se počel z punu zdelu kuhanoga mljikeka z žganci ilji koruznem krujekem, a več put i tak završil. Žeja se gasila z kisieljem mljiekem, sirutku ilji stepki. Deca su z lončeki čakalji na pragu štale dok bi mame ilji babice dojile kravicu kaj su njim naljejal friške, još toplje mljikeke. Več put, po zamusikana, alji črljena ljičeka, kre lončeka curelje je mljekece teruga deca h silje niesu stiglji gutati. Dok je mljike topilje grlje i tielje, dieči trbušeki su raslji. Napiti friškuga mljekeca, srečni i zadovoljni obrnulji su se od štalskuga praga i krenulji z novič na igru ilji na posel.

Denešnji Sviet zmenil se i postal Sviet z hnogami novami šegami radi ljudi teri su imelji tu sreču ilji Božji dar da zmišljavaju moderne šege tere mi denes rabime. One kaj moreme sigurne reči da su tie ljudi, hnoge več nie ilji su h zriela ljieta, odrastalji po one starinske, kravica je mamica... ilji bi reklji na krafskem mljikeku. Te kaj su jelji i pilji krafske mljieke nie njih opometilje, alji jih nie obedastelje, kak bi denes nekteri štelji reči.

Čudiju se denešnji „ljuftbrenzeri“ kak Sviet dopušča kaj se jie i pije krafske mljikeke. Kričiju o tomu kak je te sramota da ljudi pijeju mljike od druge živine, a ne same od svoje vrste.

Kak da te i nie dosta unda su i došle na red kumice z sirekemi na placu. Vužgi po nji i po njihove žepe kaj nej prodavale svoje sireke po štande. I te je morti h redu, alji njim trieba pomoči da ga imaju gde čuvati, a ne same halabuke zdigati oko mljekeka i sireka. Kak se na ljiete sirek tak prodaval nie bilje moči čujti da se nešče od takvuga, na štandu kupljenoga sireka i vrnja, otroval. A da su se ljudi otrovalji i truju od sakojačke jiestvic napravljene po frabrika moči je čujti. Onie teri dielaju halabuku oko toga sami več trujeju ljudi, nek kumice na placu. Žalosne je videti da i one kaj bi obranile svojega sireka moraju gubiti cajte protif onie teri su si zelji za praf napasti mljieke i sir. Da nie žalosne bilje bi komične da halabuku dielaju onie z čive gupce se još čuje duha krafskuga mljikeka. Iste velja i za one teri dielaju halabuku protif bundi, a dojdeju kričati h kožnata škornja, cipula i kapute.