Čovek se pune put zna pitati kaj je biti bogat. Bogatstve bi triebalje biti one kaj čoveka veselji i diela srečne. Ljudi unda sakak znaju h sakojačke cajte sreču i bogatstve razmeti drugač. Velji se da je za betežnuga največe bogatstve, a unda i sreča , da ozdraveje. Lačni, alji zdravi pak ne mari tuljike za zdravlje dok mu h želucu skrulji. Za njega je bogatstve puni tenier i želudec.

Bogatstve i sreča su unda tak fejst skup z vezani, kaj jedne bez druguga nejde. Ja znam tak unda reči da sreču nie trieba čakati ni iskati, da je furt kre nas, same ju trieba prepoznati. A srečen čovek je unda i bogat čovek. Znam si gruntati i reči da nie srečen onie čovek teri ima puni pobelar i želudec. Od sega preveč hu tem bogatstvu nemre videti sreču, nek ga tie puni pobelar naganja napre, kak bi ljudi reklji:
„Naganja te kaj vrag šmrkljivca“!

Baš sem se nekteri dan, h svojem skromnem domu bila tak fejst bogata, kaj su mi od sreče curele suze. Baš sem si unda hu tem svojem bogatem i srečnem času mislila na se one o čievem se bogatstvu piše po novina, čuje na našem obloku z terem lučeme h sviet, e su i oni bar jeden čas tak bogati i srečni kak ja. Niesem bila, i ne daj bože da bi h njihove kože, alji po semu onomu kaj se čuje i vidi teške je reči, e su njihove duše bogate z sreču.
Bogatstve i sreču po mene čovek nemre kupiti, platiti i silu imeti. Do bogatstva i sreče je dugi i teški put. I unda od jemput, na tom te putu počaka nekaj kaj te napravi bogate i srečne kaj bi mogel, tak ja veljim, od sreče prigrljiti h nadre i kušnuti cielji sviet. Bogatstve i sreču čoveku more daruvati dotikavljenje nečeve ruke, smieh na ljicu draguga pajdaša, topla rieč...

A ja sem baš bogata ove dane za jeden dugi cajt, baš radi rieči tere su do mene došle, prek žice, prek moderne mašine, bez tere denes čovek nemre. Došle su baš h pravi čas, gda su mi po duše špancieralji spomenki na žalosne cajte, tere je h mojem življenju bilje prec. I baš h cajtu gda nemreš, a da ne bolji i i tišči spomenek na cajt, gda sem prerane zgubila draguga svojuga životnoga pajdaša i gda po duše grebe nekaj kaj negda neda ni predehnuti, zazvonila je moderna mašinka. A z druge strane poznati glas teri kak da čuje, i zna, i hjavi se baš unda, gda trieba, sake ljete i baš na isti dan. Njegve hjavljanje pospravilje je mam žal i suze h jeden kraj srca, a na drugem vužgal sreču. Hjavil se čovek i njegva familjija teri več trinaist ljiet nie i nemre pozabiti one kaj sem same h jednem času za njega napravila. Nie sem mu dala snob penez, niesem mu dala hiže ni hižišče... Dala sam mu same jednu malu svečicu z sliku Majke Božje Bistričke, malje svete vodice i ljicitarske srčeke. Za njega je te unda bila največe bogatstve na svietu. Kak se življenje poigra z ljudmi, a da ni sami nemreju znati za kaj i gda, tak se te dogodilje i njemu. Od jahkuga mladuga muža, z jednem vekšem i tek rođenem detecem, postal je za čas, stišnjeni i zmoždeni čovek h boljesničke postelje. Šanse za njegve zdravlje bile su male. Betek je bil veljiki, a on sam vun sebe. Gruntal je o najgoršemu, i od raspomečenosti gruntal je da si sam skonča muke. Familjija i si su oko njega skakalji, davalji mu nadu, nu on nie posluhnul nikuga. Bil je sam h svoje muke i jadu. A valjda je Bog tak štel da sem tie dan sobu zela svečicu z našeg veljikoga svetišta, licitarske srčeke i malje svete vodice. Sela sem si na njegvu postelju, malje se pospominala ž njim i te mu dala. Malje se je smiril. Bilji su pred njim još hnogi teški u mučni dani. Ž njim su h temi cajti bilji moji dareki tere sem mu dala. Pridržavala ga je ruka mojuga draguga, teri je ž njim deljil bolesničku sobu, gda je posrtal.

Od unda je prešle trinajst ljiet. Svečica teru sam daruvala još je navieke h lomaru draguga čoveka teri se, skup z svoju familjiju javlja baš h cajtu gda trieba. Mene unda napravi fejt srečnu, a z tem i fejst bogatu. Tak unda trieba reči da nie bogatstve h debeljem bobelare, h veljika zgradurina. Bogatstve i sreča sakoga čoveka je one kaj raduje i obogačuje druge ljudi. Bilje bi dobre gda bi te denes ljudi znalji. Na žalost, največ ljudi denes juri za onem kaj buju na kraju moralji ostaviti, a da pri tomu kaj imaju nigdar niesu bilji ni bogati ni srečni.