Ljudi čez življenje, kuljike god da se mučiju, na kraju rintaju same za tri stvari. Jedna je da neju lačeni, druga je da buju negde imelji krof nad glavu i trejta da imaju nekaj za deti na se kaj njim nej bilje zima ilji pre vruče. Hadre ilji obljeka negdašnje ljudi morala je biti po nekakva šega ilji bi reklji po mestu kam se i gda išlje. Znalje se da zimska obljeka mora biti toplješa, da babe moraju imeti na noga pumperice gače, štunfe z štrumpantljini, klajde, kiklje, svitre, kuljijakljine i svitnjake prema tomu gde su bile. Svetiečne opravilje je bilje za iti k meše, na sprevod, h gosti ilji na krstitke.

Takva, svetična hadrenina nie se mogla handrati po doma nek je složena čakala h ormaru za pravu priljiku. Tuj i tam se znala zljuhtati kaj nej imiela duhu po tuhtu ilji švicu. Nikomu nie opalje na pamet da z takvu obljeku gda dojde dima od meše ide k štalje k blagu ilji sedne za stol k jelu. Ona se najpreie sljikela, složila na afingere napravljene doma od kolca i špage i diela h lomar do druge priljike. Tak se delalje saki put gda se došlje k domu z zimsku i ljietnu obljieku. Dobre se je pazilje i kak se kaj obljieklje. Na sprevode se nie išlje obljiečene kak god. Če se i bilje siromašne, obljeka za tu priljiku morala je biti tamneša, a familjija je na sebe morala imeti črne. Na sprevod se nie moglje iti z kratka rukave nek duge, kak god da je vanje bilje vruče. Babe, e su bila familjija od pokonjika ilji niesu, na glave su morale imeti črne rupce. Onie čieva se je familjija pokapala, krstila ilji ženila, navieke je bila lukana z očmi susede i pajdaše. Ljudi unda niesu imelji obloke za lukati h sviet niti radione, nek su si cajte kratilji z spomenkem kak je gdoj gde bil obljiečen. Špoti su bilji po sela če se nešče nej držal šegi tere su unda važile.

H spomenke ljudi znalje se čujti kak je nektera baba imiela podrapani štunf ilji otporeni rub. Grde su prešle i šnajderice tere ne bi dobre zešile opravilje pak se znalje reči:
„Naj iti k Bare, Mare....h švelje. Ona šiva takvu obljeku kaj da ju je donesla voda“!
Štiepi, rubi i pasi moralji su biti zešiti tak kaj „svete pisme“, znale su reči babe.

Nu malje po malje počele su i na naša vrata kucati nove modne šege kaj se tiče obljeke. Baš sem si nekteri dan, o negdašnjam šegam, misljila gda sem bila na jedne veseljice. Da su žive naše babice, mame i susede imele bi kaj „pretepeti“ h spomenku h večerka na lupatva i čeharaje i nej stigle spomenke skončati do prtuljeti. Obrnulje bi njim se da vidiju denešnje nove šege oblačenja. Denes nie nikakve čude iti h škornji do koljena i z golami plečami. Nie tak rietke videti babinje z kikljami tak veljike kak pedenj, tak da gda bi zdigle ruke vidlji bi njim se same šofi med ritesnicami. Kuljike bi bilje „križanje“, negdašnje stariejše gda bi vidle kuljike je bab obljiečene h muže, kak su negda rekle, če je baba diela na sebe hlače. Če bi tera baba diela na sebe hlače, kaj je negda bilje rietke, unda bi stareše z toga delale špot i rekle da te nie po bože. Te bi popratile z pripoviedanjem kak su muži za hlače, a babe za kiklje tak kaj su se spomenule šegi, tere veljiju:

„ Gda se prema babe hiče suk, buča ilji repa, ona meče širem noge kaj bi hičene hlovila h krilu od kiklje ilji oprave. Gda se pak prema mužem te iste hiče, oni mečeju koljiene skupa kaj bi hičene moglji hloviti jer nemaju kiklju. Radi toga ne mečeju koljiene širom jer bi njim hičene zletelje med nogami na drugu stran. Unda je te bila božja šega da je za babu kuklja, a za muža hlače. Nu te šege denes ne veljaju. Ljudi nosiju obljeku kak njim dojde.

One kaj je denes još najvažnieše je te kaj h nova i skupa obljeka onie teri jih nosiju največ niesu veselji. Gda nekam dojdu zrihtani niesu si sami sebe dosta dopadni i unda se pošpotavaju kaj si niesu obljikelji one kaj je ostalje h ormare. I radi toga je negda bilje bolje. Imel si jednu svetiečnu obljeku i ž nju si obavljal se kaj si triebal. Nieje te preveč mučilje da si fuljal gda niesi imel za prebir, alji si bil srečen kaj si imel obljeku za nekam iti, makar i posujenu od pajdaša.