Nekteri sem dan malje čitala po ova naša novina sega kaj piše. Ima tuj kaj česa za nasmejati, gruntati, a bormeč i rasplakati. Čudne se sega dogaja po svietu, stari bi ljudi negda reklji, alji nič dobruga. Ipak nie tak se črne kak zgledi i nie trieba črne gledeti baš na se. Navieke se nekaj dogodi kaj z grduga prejde na dobre. Morti misljime da več z dobruga krene na zloče, jer nas se zloče nekak več dotikavljeju, alji ipak je nekak jednuga i druguga podjednak. Bog oče držati ravnotežu, pak unda more biti i podjednak ljiepuga i grduga. Za kaj nekomu jemput počneju cvesti rožice, a drugomu kolce kreneju nahdol, teške je reči.

Nekomu pak nigdra ne cvieteju rožice, a niti kolce nejdeju nahdol. Njim je čez cielje življenje podjednak grde ilji same malje bolje, i oni su zadovoljni. Za saku su pohvalu onie terem se črne pisalje, alji su čez življenje, rovalji i rovalji, mučilji se, žmikalji, šparalji i počne njim biti bolje i bolje. I gda njim je bolje ne ponašaju se kaj pijani bogataši nek šparaju i dalje za črne dane, kak se zna reči. Najteže je oniem teri su pune sege imelji i na kraju baš radi toga kaj niesu teške došlji do pune pobelare, smicalji su se penezi ž njihove ruk, kaj melja med prsti i za čas je ostala prazna šaka ilji pobelar.

Kak mater i babu rastužil me je jeden naslov h jenda novina teri govori o tomu kak jedna mati nema penez kaj bi išla na grob svojuga deteta. Po jende strane me je rastužilje kaj je te tak, a po druge si misljim, kaj te triebaju šrajbati po novina. Ima pune toga kaj bi morti triebalje biti napisane, alji nie, jer nie dosta mesta za spisavanje. Nu ljudi o tera se piše nafčeni su čez življenje da se o njim piše, pa makar i grde. Kaj bi triebal napraviti i kaj more napraviti on do prečita. Nič druge nek razmeti po jedne strane. Po druge se čuditi kaj se tak nekaj moglje dogoditi. Čuden je sviet denes i čez noč čovek more ostati bez sega, bez bogatstva bez svoje drage jer su i oni bogatstve. Tak unda te trieba žaljiti i biti tužen. Nu gda nešče cielje življenje hoštapljiera, nič ne diela teške je razmeti da gda starost pokuca na vrata nema h žačke nič nek same tugu, žalost i jad. Teške je razmeti, a denes bi te i mladem triebalje reči da se moraju držati one stare:
„Čuvaj biele nofce za črne dane!“

Kak denes iskati od nekuga da pomore drugomu teri je radi svoje bedastoče došel do praznuga pobelara. Od nekuga teri je cielje življenje žmikal, hodil na pol pokrpani i lačen, dok su drugi macalji kavijare. Kak da tak nekaj razme onie teri si je rit pral h blatnomu potoku dok su drugi plavalji po veljika voda. Kak da tak nekej razme onie gdoj se zašušljal strožak dok su drugi riti smicalji po hotelska blazina. Grde je nekaj reči i čuditi se, jer sake čuđenje i špot moreju za čas opati na pete. Ipak morati je razmeti one teri baš niseu za te da se sakomu gdoj se zmislji i počne splakavati, pomaže. Triba pomoči, nu senek z stiha i kaj se ne vidi, jer če bi bilje na nagljem mam bi se moglje zdiči nos h zrak i lamatieriti po starem. Takvi teri su furt po novina, po tera se furt spisava nafčeni su da za nje navieke mora biti, jer su oni nekaj posebne. Država, gradi, opčine i drugi tribalji bi pomagati one teri čez življenje krpaju kraj z krjem, mučiju se kaj bi decu postavilji na pravi put, a ne hoštašljere, teri su pune imelji i se h dien poslalji. Tišči i bolji kaj si nekteri zemeju za praf kak da su od boga dani i za nje mora navieke biti.

Misliju si oni i njihovi da su napravilji pune dobra za druge. To dobre je možda šakica smieha i par vur dobre volje. Baš si tuj i tam gruntam i h glave mi se vrti gda negda prečitam kuljike znaju zalužiti naši nekteri kaj pišeju, pevači i glumci. A oni unda trošiju kaj steklji, a pod stare dane bi triebalje opasti na pleča države, jer su oni eto zaslužni umetnki. Saka čast umetnosti, nu nekteri su na drugi i kravavi način zadužilji državu i ljudi i trieba njih razmeti i pomoči. Onem pak drugem teri zdej pune imaju poručiti da šparaju zdej dok imaju prec kaj se neju pod stare dane plakalji kak nemaju za žemljicu i gemištec. Gda je pobelar prazni unda več nie moči nič šparati, alji ni h lucke pobelare lukati.