.....kak ljiepa je mladost
i moraš ju imeti rad,
jer tak brze prejde,
kak da si se zbudil
i mam ideš spat....

Baš mi se ove dane po glave obračala moja pesmica teru sem več davne napisala. Napisala sem ju poklje kaj sem se spominala z jednu staru babicu, tera je tukla k stotem ljetu. Pitala sem ju e je je život dugi, a ona je rekla da je je mladost i življenje prešlje tak brze kak da se hjutre zbudila i mam se k večerke spravljala spat. Kak su se ove dane oko nas dogajale sakojačke huncutarije tere su nam pririhtavalji mladi, zmislila sem se na tu staru pesmicu. Gruntala sem, e denešnja mladost grunta o tomu, kak je življenje kratke, a kak ga več od mlade dane ljudi potiepljeju. Znam da hnogi znaju da mi stariejši navike mrgujeme na mlade. Tak je te čez se cajte življenja, da mladost i zrenost nejdu pod ruku i da jedni drugem najdeju zamera. Gda denes lučeme kaj se dogaja z mlademi gda skončaju z jednem cajtem svojuga življenja i krečeju h novi, tie cajti su več grdi nek ljiepi. Kak su ove dane naši srednjoškolici skončali svoje sriednje školuvanje štelji su na se načine pokazati kak se veseljiju koncu toga školskuga življenja. I negda su tak, đaki i njihovi starci jedva čakalji da se te preveselji. Kak god da je bila siročija, za konec srednje škole se šparalje i zešilje nekaj kaj je bilje drugačieše nek sakidašnja obljeka, alji ipak takva kaj se nie potepalje i kaj se hu te obljeke još nekam moglje iti. Po vuljica su brunčale kolone đake, z piesmu pozivalje ljudi da dojdu na svoje obloke i pozdraviju mladost. Rievalji bi se i starci, zdiglji nose h zrak, a njihove držanje govorilje je meste njih:
„Vište ljudi i ja imam maturanta!“

Raduvalji su se si podjednak, i veljiki i malji kaj bi z svojem mahanjem pozdravilji buduče, dokrtore, profesore, vetrenare i..bog zna kaj bu od njih.
I denes šare kolone dece maršieraju po vuljica, ne jedene dan nek več dane. Veseljiju se oni, saki na svoj način. Nu, to veselje ž njimi ne deliju ni mlajši, a još menje stari. Saki od njih večinom beži od tie mlade, kak bi reklji, kaj vrag od tamjana. Si su h strahu da od te mladosti ne dobiju h glavu flašicu od spite pijače. Paziju se da nej bilji poljejani i z melju posipani...Ima tuj sakojačke „moderne“hamuljiji z teremi se diči mladost gda skončava pohajanje sriednje škole.

Dršče ju pred njimi ne same ljudi nek i one kaj je posajene i napravljene da bude za cinfranje njihovuga življenja. Hniščavaju se nasadi, trga se se do čega se more dojti. Z praznami falašami ilji na pol spiti duri se po gradu mladost, za teru bi misljili da na njim ostaje sviet. Starci same boga moljiju, da se se ščem prie se skonča i da njihovi ljubimci ne završiju na spumpavanju, negde za plotem ilji nedaj bože kaj goršuga. Ipak, kak si gruntam, da niesu krivi mladi. Krivi sme mi. A unda misljim da su krivi i naši starci. Oni su nas kritikuvalji, alji senek govorilji da na mladem, na nami, ostaje sviet. A mi kaj sme napravilji. Našem mladem dalji da se ne zabavljau i slaviju nek noriju. Baš tak noriju. Radi toga se i njihov konec škole zove, nikak drugač, nek norijada. Onomu teromu nie do norenja i teromu je drage da je kraj škole, neda se mogučnost da ju preslavi h veselju i radosti, kak bi reklji ljudi, kak bog zapovieda. I oni se moraju skrivati i biejžati pred hordu onie teremi sme mi starejši pomoglji da noriju na takef način.

Največ njih ni same ne znalje kak je ljipe preslaviti kraj školuvanja. Ni h megle njihove pamameti nebuju zapisani tak ljipei dani, svibnja mesece gda su se za njimi zaprla školska vrata. Možda, čez jeden cajt buju h romare našlji obljeku h tere su trebalji polagati ispit zrelosti. Nu osim obljeke h njihove pometi nebu ostalje nič ljipuga. Možda se bu unda javilje same žaljenje za cajtem h terem je dišala i cviela njihova mladost, alji niesu imelji šnjof da ju osietiju.