Svibenj je mesec dišečeče rojžic. Cinfraju se oko nas sakojački cveteki čieva ljepota miri oči, a duha draži nosnice. Zelene huste skrivaju tičeke i drugu živinu od onie teri njim očeju napraviti štetu. Polja su zašarane z rojžicami sakojačke farbi tere nišče ne sadi i ne vodi brigu onji, nek one same. Morti baš hu tem najrascvieteniejšemu mesecu od vajkada se posebne poštivala Majka Božja, mater Isusova. Poštivala se i još navieke poštiva, ona tera je rodila spasitelja Svieta. H negdašnjem cajtu, gda su bile nektere druge šege nek denes, nie se moglje ni pomisljiti da se nej išlje k večerke h cirkvu. Odhajanje h cirkvu bilje je radi moljenje krunice i litanije kak dar Majke Božje. Čez cielji mesec, več nek h druge cajte, misljilje se na sveticu tera je čez življenje imiela sakojačke patnje, alji se nie žaljila. I denes se održavaju Svibanjske pobožnosti, alji pune menje ljudi te ima na pameti.

Kak je te mesec Majke Božje baš se unda hu tem mesecu salvi i Dan majki i Dan obitelji. Morti baš radi toga kaj je Marija ilji Majka Božja bila mati na teru se saki more ogledeti. Marija kak žena bila je i ostala temelj familjije, pak je unda te se skup malje zvezane i h redu da se baš hu tem majčinem mesecu spomenu i slaviju. Pune se denes govori o obitelji ilji familjije na se kraje, alji z moderni cajti ona poljehku i gubi one kaj je negda imiela. Se grduga kaj se denes dogaja h familjija kriviju se grdi cajti, pune posla, prazni žepi... . Se je te iste istina, i da su grdi cajti i da nie penez, alji baš radi toga triebalji bi si skup familjije deti glave skupa i unda bi lježe pretrpelji se kaj se dogaja. Ovak, kak da si od doma bežiju i z lajkanjem okolji misliju riešiti se one kaj tišči jednu familjiju.

Gda se držiš one stare:„Naj pitati onuga gdoj brke frče, nek gdoj šmrklje srče“ i malje popitaš kaj je te familjija, deca povieju se kak je. Oni još niesu premazanemi z semi maščami kak veljiki ljudi i od njih je moči čujti kaj česa, kaj čoveka žalosti. Familjija ilji obitelj več put se skriva h načenčurena hiža čievi zidi niesu toplji dom nek ledvenica. Če je več kute pri hiže veča je mogučnost da se onie teri nutre živiju ščem menje zestajeju, kaj niesu na putu jedni drugem. Žalosne je čujti da se deca teške moreju zmisljiti gda jih pitate gda su si skupa za stoljem jelji.

Žalosne je i te kaj deca dobiju sakojačke moderne čačke z teremi si kratiju cajte, a pajdašiju z starci i braču največ put nemaju. Unda gda se dogodi kakve zlo h familjije si veljiju kak je nešči bil miren i dobri, a da pri tomu ni najbljiži niesu znalji kaj se praf za praf dogaja. Sikak da je bil nešče miren i tih kad ga hižni niesu ni dobre viđavalji. Če se te i dogajalje unda je te bilje same unda gda je bile za setajanje z „žepi“. Ljiepe je imeti hu tem rascvietenomu mesecu Dan obitelji, kaj se barem jemput na ljetu more zmisljiti da familjija trieba skupa sesti i pospominati se. Kak je mesec svibenj i mesec Majke Božje unda je tuj i zmišljavanje na ovozemaljske matere, pak se uda o ovršava Majčin dan.

I pak i za tie cajt, če kaj nie dobre vadiju se z brzem življenjem. Nu smicati riti po kaj kut se najde cajta, a za otprieti vrate starcof teške je najti. Baš sem na Majčin dan lukala, veseljice tere su bile na tie dan. Tak sem vidla ženjsku, tera je odhranila pune lucke dece i teri su zdej odrasli ljudi. Nu niesu pozabilji tu ženjsku tera njim je bila kak mati i furt prihajaju k njoj.
Po žila je zaboljelje gda su pokazalji i babicu h jedenem staračem domu. Pogrbljena, oslonjena na ščap, nie dala da se vidi kuljike je njenje srce pune rani i suzi gda je rekla:
„Odhranila sem četvoreo dece i deset hnuke. Imam sedamnejst prehnuke. H domu sem i nišče mi ne dojde ni za Vuzem, ni za Božič, a kamolji za Majčin dan. A poke bi i došlji?. Se sem njim dala kaj sem imiela i zdej njim več ne triebam!“

Rekla je te starica, obrnula se, ponosne zdigla glavu zrak i prešla po ganjku doma dalje. Morti je baš bila odebrana po nekave volje božje kaj bi svoju materinsku poruku poslala dalje. Ona bi sikak bila, ne same mamam nek i tatam:
„Pamet h glavu, kaj nej moralji sami potpirati vugljiče i čakati božje milosti!“