Zvonec je zazvonil za konec škole. Konec jednuga ljeta h školske klupe. Konec jednuga cajta življenja. Jeden list knjige je prečitan i obrača se nova stranica. Nu dok se bu nova stranica knjige h življenju dece počela čitati, date njim je da si malje počineju. Deca, mladi na terem se od vajkada zna da ostaje sviet, moraju si malje predehnuti od žmehkuga i grduga šlolskuga ljeta gde su se borilji, nekteri z kaj česem. Misljil si bi čovek da buju na jeden cajt pobeglji od onuga kaj njim je deset mesece furt viselje na glava. Čovek si mislji da buju zdej polja, begi, trnaci i dvorišča brunčalji od dieče glase. Nekak čakaš da se bu hvečer, gda bu počel mesec dozavati zviezde, čulje dozavanje materi tere oveju decu da dojdu k domu.

Nu nič se več prec ljiet takvuga ne dogaja. Vuljcie su puste. Retke se h terem dvorišču čuje glama pajdaše teri su se hkralji od starce i dielaju nekakvu huncutariju. Prešlji su cajti gda se jedva dočakalje da deca buju na feriju. Starci su za nje imelji sakojačke poslje. Od hodanje z blagem na pašu, sušenje krmi, okapanje koruzi i kaj česa još. Kak su se poslji mienjalji tak su deca bila pri sakomu i pomagalji kuljike su moglji. A gda su stariejši vudienčilji, deca su imelji cajte same za sebe. Pljiezale se poskrivečki po luckem sadu, ranami čriešnjami, mergetami jabukami i slivami.. Dukalje se z murve na murvu, a gda je bila veljika pripeka skočilje se h potok ilji rieku reshladiti. Voda h tere su se kupala selska deca bila je sa kaljužna. Skaljile su je ruke i noge onie teri niesu znalji plavati pak su se brčalji po pljičaku. Dima se znalje iti bolje fljuden nek gda se je išlje kupat. A če se nie dece dalje iti do vode unda su se sakojačke huncutarije i igre delale za vugljiči hiž, suša ilji h hladu pod kakvem drievem.

Gda nie bilje fejst vruče po prašnjave selske pute korutalji su se željiezni obruči. Obruči su se potiravalji z koljekem i čievi se duže korutal tie je bil pobednik. Od fosljina i pienja napravile su se žukalke kre hiž, a h polju med vrbam, od kitja vrbi tere su se zvezale skupa. Deca su negda furt bila na kupu i nigdar njim nie bilje teške prebiejžati z sela h selje. Masljikuvanje, verisanje, kopčanje bile su nektere od dieče igri. Spretneši i fljetneši navieke su bolje prešlji h sake igre.

Ljica dece bila su navieke črljena, hlačnice i druga obljeka rezdrapana ilji poštopana. Palci na noga rezbiti na nekakvem kamenu teri se našel na putu, baš na mestu na terem nie triebal biti. Koljina na noga imele su na sebe skule sake felje. Jedna bi zacieljala, a kre nje ilji na nje napravila se druga. Ni lakti niesu bolje prešlji. I oni su bilji furt rezdrapani i skulavi. Meste cipul deca su imelji trde poplate tere su si napravilji od hodanja bose po strnišča i šudrane pute. Retke je tere detece unda moglje imeti plantfus gda je svoje noge „viežbalje“ po selske pute.

Kuljike je radosti i života bilje hu te dece tera su več put dan zbavila z šniticu kruha i masti zaljejana z šaljicu mljieka. A denes su, zglancana i pocinfrana dvorišča i trnaci tihi i prazni. Po vuljica je rietke videti i čujti galamu dece. Oni denes imaju druge šege. Njihove pajdašuvanje z modernemi mašinami je se. One su njim pajdaši h igre. One su njim več nek bilje gdoj h življenju. Ž njimi se spominaju z svojemi pajdaši, ž njimi se budiju gda je več sunce visoke.

Pri temi modernemi napravami hloviju jih mesec i zviezde i zoveju h postelju teru, ne rietke, poiščeju gda več jutre kuca na vrata. Življenje denešnje deca drugačke je nek negda. Oni niesu nafčeni da je pajdašuvanje z pajdašem negde pod nekterem sadem nekaj kaj mu pomaže da zdraveše odrasta. Deca več niesu nafčena jedni na druge jer su pre malje poklje škole skupa.

Veljiki se trudiju da njim daju se kaj moderni sviet prodaje. One kaj je najjeftinieše denes delati je pajdašuvanje med decu, alji se te nemre kupiti. I gda su jeden cajt fraj od škole deca su malje skupa. Unda gda dojdeju skupa, jeden prema drugomu ne diela nič nek se kosturi. Denešnja deca dok su na feriju imaju sakojačke hamuljije. Ipak nemaju one kaj bi triebalji imeti, igre i pajdašuvanje z pajdaši. Ferije je za nje cajt gda se baviju z modrni mašini i poklje ferija vračaju se h školske klupe „zeleni“, spiti i trudni, več put gorše nek gda idu h školu.