Denes se rietke čuje da se za nekuga velji da je lakoten. Zgledi onak na prve lukanje kak je denes malje onie za tere bi se reklje da su lakotni. Hitihlje se, ne govori se i zgledi kak da je zdej se cinfraste i ljiepe i da takvi ljudi več po svietu ne plaziju. H negdašnjem spomenku med pajdaši i susedi retke bi bil spominek bez da se za nekuga nie reklje da je lakoten.

„Lakotnjak jeden. Oče polakomesati cielji Sviet“, znalji su ljudi reči za čoveka teromu nigdar ničega nie bilje dosta. Znalje se, ne rietke, dogoditi da se je preorala susedova njiva, da se je po trnacu pobrl lucki sad, pak se za takve rekljeda su lakotni.

„Viš kak je lakoten. Gubec mu navike zieva kaj bi ščem več pozijal. Gornja lalafka mu po stolu ljiže, a donja po zemlje ruje. Nigdar mu nie dosta“, pripoviedalji su ljudi med sobu.

One kaj je čudne h življenju ljudi da su največ lakotni bilji oni teri su pune imelji. Imelji su več nek njim je triebalje, alji nigdar niesu bilji zadovoljni. Lakotesalji su i dalje. Več kak diete sem gruntala kak je teške lakotnem ljudem. Furt su bilji h brige e njim bu gdoj kaj zel i da neju nekomu nekaj dalji, a njim bu zmenjakalje. I baš radi toga rietke su komu kaj rade dalji ilji pomoglji. Furt su misljilji da njim ne dosta. Melju su njim črvi jelji, alji siromaku za kruh nigdar nej podalji.

Moja babica, za teru si znam misljiti da me nafčila životne mudrosti, znala je reči:
„Viš Mimek, kak je zlo lakotnomu. On je strahu kaj mu nej gdoj z nakle zel jabuku. Takvi ti ni hmiru nemraju spati. Furt su na „čake“ kaj njim nej nešči nekaj zel. Lakotnjaki su i škrti. Oni ti ni nej dalji vragu bata kaj bi se hbil.“

Kako god da se denes več retke nekomu velji da je lokoten, senek z nami oni i dalje pajdašujeju. Sikud se vljiečeju, alji ljudi su si pustilji mira i lokotnomu nečeju reči kaj ga sljeduje. Gruntam si tak da se je riečica, lakoten i lakotnjak malje zagubila, alji da lakotne ljudi i lakotesanja ima se več. Grabiju gde i kud stgneju, rievaju se sikam kaj rubača h vrit i njihove lakomosti nema konca. I lakotni se držiju one povede tera velji:
„H ljubavi i h ratu nema pravila“. Njihova ljubaf je pune imeti.

Ne same da nema pravila nek se i ne prebira po načinu kak kaj polakomiti.

Nekteri denes miešaju skrbljenje i lakotesanje. Te jedne z drugem ne bi smelje i nema veze. Skrbeti trieba saki čovek. Onie do nie skrben nie bog zna kakef gazda. Razljika med skrbnem i lakotnemi ljudmi je hu tem da skrben pribira za svoju gospodaru po pravice kak bi reklji da Bog zapovieda. Pri tomu ne „gazi“ po drugomu i ne jemlje drugem z zubie. Lakotnjaki pak grabiju same za sebe i ne lučeju okol, e bi morti triebalje nekaj dati drugomu.

Hu te lakomosti čoveku življenje tak brze preleti. Se kaj polakoteše nemre dobre ni videti. Hu takvem nalakotesanomu nemre se ni vžiti ljepote. Gda si malje gruntam o življenju čoveka, kaj i gda diela unda navieke dojdem na iste. Čovek na ovomu Svietu živi same, reklji bi ljudi za rit. Živi i diela za one kaj i gde bu pojel i kaj bu del na se. Istina i bog košta, obljeka i bajtica h tere se živi su one radi čega su ljudi več put lakotni. Pune put pozabiju da nemreju več pojesti nek h žaludec stane, nemreju biti histem cajtu na pune kate i sobi, a da na sebe moreju imeti histe vrieme same jeden kaput i kuklju. Preveč toga čovek lakotesa za sebe, a na kraju na iste dojde kak i onie teri je čez življenje pricukava kraj z krajem. Saki bi čez svoje življenje moral voditi brigu kaj bu ostavil za svoje pokoljenje. Ne same kuljike bu ostavil hižic, kuljike debelji pobelar nek i kaef bu glas ostal poklje njega. Negda več znači reči za čoveka ljiepu rieč nek se stečene bogatstve. Si sme same ljudi i rade kažeme z prstem na druge, pripoviedame o druge jer i te je zerica našuga življenja. Nu če misljime onak po pravice za svoje hnuke i prehnuke nie dosta da njim prec sega ostavime.

Dobre je za sobu ostaviti i dobri glas. Nie i ne ljiepe za čujti gda bu nešče rekle:
„Te ti je čer ilji sin, hnuka ilji hnuk čievi su tata, mama, dedek ilji babica bil fejst lakoteni!“