Je da je več Fašunjek za nami, alji još furt nekteri nosiju lafre. Moderni su cajti tak su i moderne lafre. Duge trieba lukati da bi mogel čovek znati e nekteri na ljica imaju lafre ilji su te za zbiljič njihova ljica.

Negda su se ljudi oblačilji h mačkare i metalji na sebe lafre jemput, dvaput ilji morti tri četiri put h ljetu. Lafre su metalji nase za Fašunjek i Pepelnicu. Na ljice su metalji lafre i gda se išlje po mačkare h gosti. Ljudi su metalji lafre po sebe kaj bi bar na jeden kratki cajt bilji nešče drugi. Največ su se oblačilji h ciganice ilji cigane, h živinu, mladeniče ilji pak h sirotinju vekšu nek su bilji. Lafre su se delale doma od canjke, dronjke, drieva, perja, papiera ilji onuga kaj se našlje pri ruka. Kak po navade muži su se rade oblačilji h babe, a babe pak h muže. Tak su muški imelji na sebe svitreke, kiklje, štunfe z štrunpantljini. Njihove slukave noge bile su smieha vriedne, pak se mam znalje da se pod lafru babe, skriva muški. Zabadave su ceki od perja bilji mehki i rupci zavezani kak se šika, senek se mam znalje da kosmata ruka pripada nekteremu selskomu mužu.

Hicne babe se niesu dala mužem pod pete pak su i one na sebe metale lafre i oblačile se h muže. Moglje se tuj videti babe h muške ancuge i škrljakem na glave. A za škrljak kak se šika bila je zapičena rožica ilji kakva zelena kitica.

Spretnejši su pak za Fašunjek delalji lafre od drieva kak glave, konjske ilji teruga druguga živinčeta, i unda ga oponašalji. Tak su fšničke povorke bile popračene z mužiku, alji i z roktanjem svinj, kukurikanjem kokota, bečanjem kaj kravica ilji pak z ropanjem kaj da beži konj. Ljudi su se veseljilji, hodilji od hiže do hiže, popievalji, a za nagradu dobilji piti i kakef krafljin. Z sobu bi nosilji slamnatoga Fašunjka teruga bi na kraju gda su obhajalji se svoje pajdaše i hiže, vužgalji. Z vužiganjem Fašunjka nekak su si štelji olakšati dušu i skuriti se one kaj jih je tiščalje. Poklje takve norije ljudi su snelji lafre sebe i krenulji dalje. Lafre su se metale na sebe i unda gda je bil običaj hoditi h gosti po mačkare. Negda niesu bile veljike i preštimavane gosti kak denes. Pri ženidbe h mala trošna hižica h gosti su išlji same najbljiži rod. Pajdaši teri su štelji pocinfrati ženidbu svojuga pajdaša oblačilji su se h mačkare i došlji si zatancati dvie tri poljke ilji valjčeka. Za svoje prihajanje h gosti, dobilji su nekaj za zagriznuti i pogutnuti. Če se nej h čieve gosti došlje po mačkare bila je sramota. Istina i bog da je znalje biti več klap teri su se obljiklji h mačkare i na sebe delji lafre pak su se znalji med sobu i potuči. Znalje se iti dima i z potrenem nosem, pak je takef još par dane imel „lafru“ na sebe. Bilje kak bilje ljudi su se raduvalji sakomu kratkomu cajtu gda su delji na sebe lafru. Z lafru na ljica bilji su vrijedni smieha, a te su i štelji napraviti. Poklje takve hincljive cajte če su imeljim napravljene lafre, spravilji su je na kljin nekam h komoru ilji na najže i rabilji jih gda su drugi put triebalji. Oni pak, teri su metalji na sebe lafre narisane z sajami, zgoretemi šibicami ilji pak črljenem papierem teri je puščal farbu, dobre su zepralji ljice i z čistem išlji dalje. Poklje Fašunjka, Pepelnice ilji goste niesi več mogel drugi dan videti lafru ni na jednem ljicu.

Denes, kak da su Fašunjek i Pepelnica prešlji i z datuma i dana. Dobre se zna da oni sake ljete miejnjaju datum, alji da su navieke Fašunjek h tork, a Pepelnica h sriedu. Nu zdej , kak te čovek malje bolje luče, nie su same na te dane lafre ljudem na ljica. Nekak, zgledi kak da jih furt nosiju na sebe. Gda je jemput na sebe deneju teške jih snimljeju. Unda gda jih dug cajt nosiju več bez njih nemreju biti. Lučeš onak oko sebe pak neznaš e nekteri imaju na sebe lafru ilji njim je ljice lafra. Čoveku je morti draže da mislji da mu nešče kre njega ima na sebe lafru i da ju bu snel. Ražalosti se saki unda gda vidi da pred njim nie lafra nek praf za praf prave ljice, lafra teru nie moči sneti.