Z cvietnu nedelju, punu sakojačke rožic, kitic palmi, masljini i skore pozabljenoga drinjka, počela je najvekša priprava k veljikomu svetku Vuzmu. Pri nas je drinjek več skore ocvel. Nekak sem si misljila da je te napravil pri nas nasmaret gda ga več retke gdoj na cvietnu nedelju samuga nese na blagoslof kak negda. Dok sem ocvielu kiticu drinjka držala h svoja ruka, zmisljila sem se cajta kak se negda dan prie Cvietne nedelje išlje po kitice drinjka k onomu gdoj ga je imel ilji čak fustu gde je za krajem znal cvesti. Kitice drinjka stiha su se hplele h jeden ljipi kitnjasti pleter kaj nej preveč stršale, a unda se i strgale. Tak hpleteni, nesel se na mešu i poklje blagoslova i prešecije donesel k domu. Z kiticu se k domu i gospodare donesel blagoslov i nada da bu čez ljete se došle k sreče.

A unda se z prve dane poklje Cetne nedelje hasnilje se po vrta, trsja i njiva kaj bi ves veljiki posle bil gotof do Veljikuga četrtka. Na Veljiki četrtek poklje devete nie se smelje po zemlje nič rovari. Veruvalje se da gda ruješ po zemlje, kak da ruješ po tielu ranjenuga Isusa. Ves posel teri se je delal na Veljiki četrtek i dalje, bil je po hiža, dvorišču i štalskem stanju. Se se čistilje, frižalje i pripravljale za veljiki svetek. Zelena dvorišča nie bilje trieba kositi jer je retke de i stigla zrasti visoka trava. Se je te stigla „pokositi“ živinica tera je dukala po dvorišču i punila putače z mladu i friškuzeljenjavu. Kak nie bilje furt prec jela, tak su se si raduvalji svetku, jer se za njega nie šparalje. Želja za finu koštu bila je još vekša jer se na Veljiki petek nie mrisilje, a bil je te i veljiki post. Same malje dece i betžnikem nie se branilje da pojieju nekaj kaj se je jelje saki dan. Si drugi niesu smelji jesti nič ilji čistam malje. Nie se jiela nikakva zamjenska nemrsna košta. Tie dan h ljetu postilje se i te je bila kak žrtva za zmišljavanje ne življenje i križni put Isusof. A unda na Veljiku subotu kak da je se živnulje. Več za rana se kadelje z rafunga, a duha se širila ne same po hižica nek prek na dvorišče i po cieljem selu.

Bila je te nektera druga duha teru je denes več teške najti. Nie te duha teru denes rabiju naše hiže, a ide z sakojačke cinfraste flašic. Te nove duhe po cvetju sake felje stirale su z naše hižic tak dobre stare šnjofe. Denešnji nosi nemreju podnesti duhu dima, duhu podvujene šunke i sega onuga kaj je negda bilje diel življenja. Se lucke, bez duhe i žmaha, nekak je denes mlajšem pune boljše. Stariejši se pak ne vračaju starem šegam i duham nek rajše očeju hgajati mledem nosem i želučekem. Tak da mlajši ni neznaju kakva je fina negdašnja duha, domače prave košte. Posel za pripravljanje za Vuzem denes se takaj diela na brzinu, pak se negdašnji žmahi i duha, če bi i bilji, nemaju cajta zavljieči po hiža.

Negda se pak za ran čulje vudirnje mužara h terem se tukel mak, šumele su žrvi, a žerafka je skakala z rafunga kak da naveščuje veljike veselje tere se pri hiža pririhtava. H loncu na šparetu kipela je posmujena šunka, a njenja duha dražila je nosnice ljudi, a da nie bilje ropanja po hiža čulje bi se i skruljenje h želuce. Dišale su hiže pečena gibanica od orehe, maka sira, a pri bogatieše i po režičkove i gibanice od fig. Vuzem bez kugljiva nie mogel prejti kak i bez pofarbane jajec ilji pisanic. H večerku na Veljiku sobotu h grdencu, h komore ilji pak na samem stolu bila je pririhtana košta za Vuzmeni obrok. Senek, nie se načinjala gibenica za jesti nek su se kosalji pokoštaljci teri bi se speklji h pojme ilji malje kostroljice. Makar su curele sljine od želje senek se nišče nie vufal zeti nekaj od košte kaj nie bil red. H večerku se složila košta, sega po malje h košaru i hjutre rane nesla na blagoslof. H cirkeve se miešala duha friške pečenuga gibenja i šunke, z duhu zašvicane ženjski tere su se žurele h brieg k cirkve. Našlje se tuj duhe i po blagu i kočaku. Nu nišče nie frkal z nosem. Bile su te duhe bez tere na stolu nej moglje za Vuzem biti kajčesa. Vuzem, ni pri siromaku, nie bil bez kokošine juhice z domačami riezanci, kuhane šunke z friške naribanem hrenem teri je piškal nosnice, kuhanje jajec. H radosti kaj još navike pred mojami nosnicami špancieraju mene tak dragi starinski žmahi i duhe, željim vam:
SREČEN VUZEM!