Gda sem se nekteru večerku malje sprehajala po svoja sela, putec mi je svietil mladi Mesec. Bil je tak tienjki, reklji bi negda ljudi, kak las. Gruntam si hu sebe kak su ljudi prie pune več lukalji h Mesec kakef je, radi toga kaj su za njega važile sakojačke šege i zaščepi.
Pune je toga prešlje kre ljudi, a da h svoje spomenke niesu mlajšem povedalji pak unda se pune toga denes več nezna. One kaj sem ja zapamtila kaj se Meseca dotikavlje vam poviem.
Gda je bil mladi Mesec teklje se z hiže van z pobelarem, lukalje h Mesec, gladilje pobelar i ropalje z dinari. Pri tomu se lučeči h Mesec govorilje:
„Kak rasteš Mesek ti, tak nek raste i moj pobelar.“

Če nie čovek pri sebe imel pobelara unda je prema Mesecu pokazal prazni žep. Hu sebe je poželjel takaj da mu ga Mesec napuni.

Ljudi su prie navieke po ruka imelji bradavice. Največ su jih imela deca jer se na nje nie preveč pazilje kud hodilju i po čemu se prčkaju. Bradavice su rasle dece jer se poviedalje da si ruke pereju h vode tera je bila h posuda prirejena za živinu. Kak nie saka hiža imiela zdenec, z vodu se šparalje, alji živina je navieke morala imeti vodu za piti. Posude gde je bila dotakana voda bile su se zamazane i nie bilje rietke da su si deca hu te zasmrajene vode poplaknulji ruke prie jela. Prčkala su deca po blatu, po gnjoju, a i h igre su zamazalji ruke. Unda njim je bilje najlježe oprati ruke h posude z vodu za živinu, kaj baš niesu zamazanami rukami prielji h ruke kruh ilji žljicu. Prie je bilje rietke videti detece tere nie imelje po ruka bar par bradavic. Ljiečilje se te sakojačkem vračstvem, a največ su babe decu z hiže vljiekle van gda je bil mladi Mesec.Dece bi gladile bradavičke i govorile:

„Ti Mesec rasti se veči i veči, a vi bradavičke ote se menjše i menjše.“
Tak bi se te delalje saki put gda je bil mladi Mesec, se dok bradavičke nej prešle.
Ljudi su h večerka si skup sedelji h kuhnje, e bilje ljete ilji zima. Familjija je bila na kupu i vodil se spominek o tomu kaj se je čez dan delalje i kaj bu triebalje druge dane hasniti. Nedej bog da je nešče z hiže lukal h nebe i rekel:
„Joj kak je vanje puni Mesec ilji mladi.“

Bila je te veljika grehota za stare, a za mlade da i ne poviem. Stari su se nadalji nekakve zloče, a če bi lukalji mladi h mesec z hiže, veruvalje se da več ne nigdar rasel. Radi toga se z mesecem i o mesecu moglje spominati same vanje.

Denes je ostala šega same za puni Mesec tak kaj ljudi veljiju da nie moči spati gda on svietlji. Če bi se i zaprlji fižu i zamračilji Mesec senek smieta.

I negda su ljudi reklji da su nervozni gda je puni Mesec. Alji su puni Mesec koristilji i za nektere druge posle.Ja se zmisljim da je moj dedek znal reči da se jedva čaka da bu puni Mesec. Znal se z pajdaši spominati kak je grde gda je puni Mesec, alji da njim dobre dojde kaj njim nabrusi britve i željete. Moj je dedek gda je bil puni Mesec, metal pred oblok kupicu, a h kupicu je del otprtu britvu i stare željete. Znal me je opomenuti da nejdem k tomu kaj se nej poriezala. Te bi ostalje tak se dok je bil puni Mesec. Unda bi jih zel i probal ž njimi prerezati las teri si bi spuknul na glave. Pri tomu je znal reči da su britva i željete bile dobre obrnjene prema Mesecu jer su oštreše. Bilje je pak i cajte gda je bil hud na babicu da mu je sigurne obrnula kupicu z željetam jer su i dalje ostale tupe.

A one kaj bi denes sem dobre došlje je te kaj se mladomu Mesecu reklje:
„Aj, mladi Mesek pomladi ti mene kak si sebe!“