Vanje je se nekak čudne za ovie diel h ljetu. Po drievlja još ima sakojačkuga listja, cvieteju prtuljietne rožice. Trava je još zelena i niesem mogla veruvati gda sem vidla na paše kravu, tam kak se ide h Brlekove. Več je denes čudne videti kravu, a još je čudneše na koncu jedanajstuga meseca videti pastira teri mirne sedi na stolčeku dok mujcica mirne pase travicu. Če se pak ima kaj za štuljiti po dvorišča moreš delati h kratke rukave. Baš po ničem nemreš znati da su četiri tjedni do najveseliešuga svetka pri nas katoljike, Božiča, i da su počelji cajti došašča. Zname da su se ljudi zmenilji, alji se borme fejst zmenila i priroda. Kak da nam se oče osvietiti radi toga kaj se ž nju „igrame“ i miešame se h njenji posel.

Nie bilje tak deljejke kaj je važila ona: “Sveta Kata, snieg na vrata“. Pravuga snega ne same da nie za Katarenje nek ga skore nie ni cielu zimu. Kak unda dece povedati kaj bi moglji razmeti, kak je negda u ovem cajtu, gda su počele zornice, kitje i drievlje pucalje od zime. Se naokol bljesikalje se od sunca tere je tuj i tam resladilja glavicu h, bar pol metra, zapadnenjem sniegu. Se oko nas bilje je zamotane h sniežnu bielu plahtu po tere su se same na rietke moglji videti tragi zajčeka ili srnice če bi išlji iskat hrane. Ljudi su se držalji pri svoja hiža, a male tiri po dvorišča bile se od hiže prema štalskem stanju, kopiče, kopam ilji prema ljese i prielaze čez tere su h večerke susedi hodilji jedni k drugem.

Počele su po našem kalendaru zornice, fejst rane meše. Denešnja deca i mladi nemreju znati i imeti h svoja srca takvu radost kak negda ljudi i deca gda su išlji k zornica. Nie se bilje teške rane h jutre zbuditi i obliči h mrzla komora čez čieve obločece nie bilje nič videti. Po nji je mraz i zima našarale takve slikarije kaj ni jeden umetnik nemre napraviti. Toplje obljiečeni i z par surki na sebe, noge zamotane h nuče, išlje se od doma k zornice kak god da je cirkva bila deljejke. Starši su navieke išlji napre i delalji tiri. Nekteri su i h ruka neslji karabiterice kaj bi posvitljile po putecu če nie bila mesečina. Išlje se prema cirkve z sakuga breščeka i jarka, a brbotanje, moljitva ilji pesma stišavala se gda se došle bljiže cirkve. Kak da denes poviem svoje hnuke, a da bi me razmela, kak su mi palci na noga bilji mrzli i ozeblji, alji da sem senek rada išla na zornicu? Kak da razme kak mi je bilje ljiepe iti za babami i mužmi teri su imelji kožnate naboksane škornje, a oni su pri sakomu koraku zaškripalji. Škripanje škornji po sniegu davne je pozabljena mužika, alji još navike igra h moja vuha. A h cirkve tiskanje i gužva tera nas je se griela. Nišče nie z nosem frkal gda mu je nosnice dražila duha po štalje, kočaku ilji košte. H stiske jeden prema drugem grelji su se ljudi za miešne vrieme i tak zgreti poklje meše krenulji prema domu.

Sveti Mika, teri je h prvem tjednu Došašča, dece je na okna h škornju ostavil malje cukara i pomaranđu. K zločestem je znal dojti Kramus z košem i lanci kaj jih je malje poplašil. Unda nie bilje plavuga teljefona kaj bi prijavilji muža teri je hodil po sela plašit huncuta. A od takve „presenečene“ huncute denes su senek nektri doktori, profešuri, akademiki...

Teške je reči kaj bi denes triebalje deti h škorenje ilji cipul dece kaj bi ji tak fejst razveseljilje kak nas negda, napoljitanka“Jadranka“, ljizanka ilji športska čokoladica.

A hu tem cajtu Došašča sakojački su godi tere ljudi svetkujeju. Jeden od njih je i sv. Barbara. Negda se na tie svetek odriezala kitica z čriešnje. Če je do Božiča kitica čriešnje precviela, znalje se da bu sljedeče ljete rodne i plodne i da mu se trieba raduvati.