Od vajkada znam da sreču nie trieba iskati, da je furt oko nas, same ju trieba prepoznati. Nekterem trieba za sreču pune i unda ne vidiju gda sreča prejde kre njih, a da ju niesu polovilji. Kak za sreču, tak i za žalost, trieba je same malje. Iste tak nekomu trieba pune grdobe da se ražalosti, a nekomu je trieba same zerica nečega i da pri srcu ciepa i tišči, a žalost je dugocajtna.

Ja spadam pod ove druge kuljike god bi štiela da se držim one starinske:
„Jie svoj kruh i ne vodi tuđu brigu“, nemrem si pomoči.

One kaj me je rastužilje i o čemu več dva tjedne gruntam baš mi ne paše hu ove svete i vesele cajte. Veselje i radost pokvrila sem si jedne rane jutre h jednem našem veljikem štacunu. Ja h štacun idem dosta rane dok se ne zbudiju „selebriti“ i ne dielaju gužvu po dučane. One kaj mi je za oke zapelje mam ščem sem h štacun došla bilje je dvoje dece z njihovem tatu. Bila je te pucica oko deset, a dejček oko šest ljiet. Takva se deca baš ne budiju rane, pak me je mam malje začudilje kaj su tak rane bilji h štacunu. One kaj me je još več čudilje, kaj se mene, kak mame i babice retke more kaj se dece tiče presmeknuti, da je pucica bila fejst tiha, a dejček je glasne nekaj spitaval oca. Jotkalji su mi nekak brze po štacunu, a otec jih je furt štaljieral. Kaj su stalji, kaj su nekaj delji h košaru, za kaj nejdeju z ove ilji one strani koljic...

Čuden mi je bil ti mladi čovek z svoju dečicu i hu tem skakanju i dukanju po štacunu nie njim rekle ni jednu ljiepu rieč, nek je furt nekaj prigovaral. Gda su stalji iza mene i čakalji na red za plačanje, pucica ga je nekaj skore stiha pitala, na kaj je on hude rekel da kaj bevi nek si naj skoči i donese. Ona se razletiela ljieve, desne i na kraju se vrnula z prazne ruk. Ocu je rekla da je te po kaj je išla ne triebalje. Kak sme duk čas čakalji h redu, otec je nazval svojuga pajdaša. Očeš nečeš,moraš čujti spominek. A spominek z pajdašem je bil tak gizdavi, slatkerečivi, da bi čovek rieč rekel. Bil je te spominek za pajdašuvanje i kapnul je dogovor za zestanek, pod balonem h pol tri vure.

Gda je te dejček čul veselje je poskočil i reke:
„Tata ja pem z tobu!“
Unda se čul tihi skore srameči glas pucice: „Tata, ja nebi štiela iti. Mene je tam dosadne.“
A potem, kak da si del šibicu h benzin, gda je otec počel svoje larmanje.
„Kaj je vam. Pak kaj vi mislite da vas bum same razvažal. Zdej k njoj jednuga pak druguga. Dogovorete se. Ilji oba dva idete z menu pod balon ilji vas obadva peljam k njoj!“

Dieče oči niesu bile suzne, alji su bile tak žalosne kaj bi sakomu bilje teške. Lukalji su malje h košaru, a maljeh pod. Gda sem naklala svoje stvari h ceker, prie nek sem zišla van, poluknula sem prema tem dragem malem stvorenjem. Njihove glave i dalje su bile spuščene. Niesem mogla, a da ne razmem kaj njim se h duša i srca dagaja. „Otpeljati k njoj“, značilje je da tata i mama ne živiju skupa, a da su deca, po semu viđenomu ocu same teret, a pajdašuvanje ž njimi spunjavanje forme. Nikakvi puni škornji sačeka za Mikulinje, nikakvi paketi pod borem nemreju njim deti radost h srce. Za veselje diečih srčeka trieba pune več. I dok sem gruntala i gruntam o te drage male dečice, zmislila sem se cajta gda su moja deca ostala bez oca. Ne same bez oca, nek i pajdaša h igre i h sakojačka hamulija. Gda je najmlajša čer bila fejst huda kaj nam se te pripetilje h jednem spomenku sem je rekla:
„Budi srečna da si i h tak kratkem cajtu imiela oca teri vam je bil vaša radost i veselje. Nekteri imaju živučuga oca pune ljiet , alji same na papieru.“