Još kratki cajt nam je do Božiča, svetka teruga najrejše dočakame. Tak je radi toga kaj je rođenje navike i h familjije najveseljieši cajt jer je pod krof došlje nove življenje. Unda je te tak od vajkada veselji dan gda slavime rođenje Isusekove. Hnoge su nove šege za tie svetek porinule stare šege. Stare šegi ja se navike rada zmisljim, našrajbam jih kaj se nej pozabile. Če se oče nekaj nafčiti mora se i opetuvati kaj ostane h pometi, tak i moje šrajbanje o te neše stare šege tere nam očeju nove i lucke strirati.

Žal mi je navike kaj se pune toga oče pozabiti, te je diel življenje naše pretke teri su nam ostavilji ljiepu i zdravu Zemljicu i svoje šege. Kak sme počelji životariti, pitanje je e bume kaj poštenuga mi ostaviljisvojam svojem pokoljenjam.

Dok lučem kak stiha snieg curi, maček mi tuče po obloku štel bi fižu, gruntam si i misljim na cajte prie prec ljiet gda je skore saki Božič, kak i cajti prie njega, bil bielji. Biela dvoriščeca bila su sprekrižana z maljemi tiricami tere su bilji puteci kud se hodilje. Od štalskuga stanja i hiž, se se pririhtavalje cielji prosinec mesec na veljiki svetek. Ribale su se po hiža prsnice, klupi i podi. Najprie su se zmele saje h šparete kaj bi bilji dobri cugi pri kurenju kaj bi se gibenje ščem bolje i ljepše spekle. Kak nie bilje prie štacune kaj bi se hunji kupouval kinč za hižu i cimer, se se je delalje doma. Saku su večerku puce, alji i starieši delalji kinče za cinfrati hiže, krizbane ilji cimere. Kinče se je delalje od papiera, perinja, perja, slame i kaj česa druguga kaj se doma imelje. Bile su te rožice sakejačke felje i farbe. Saki gdoj je rožicu delal makar po istem, rožice su bile drukčeše. Pri bogate ljudie su se rožice smakale h rastopljeni vosek kaj su mogle duže zdržati. One su se spravljale za druge ljete jer su mogle opstati. Plelji su se lanci tere su se zvezalji od sredine lampe po ciela prsnica. Saki kipec na zidu je oko sebe imel spleteni lanček, a respelčeka su imele venček od rožic. Z srebrnu farbu farbalji su se orehi i bažulj h komušinja z terem se cinfral ilji kitil krizban.. Hganjale su se med sobu puce tera bu napravila ljepši kinč i čieva bu hiža bolje porihtana i pocinfrala. Po hiža su hodilji snuboki nalukavat kakva je pri hiže puca. Baš hu te cajte gda nie bilja vanje posla ljudi su hodilji jedni k drugem. Hodilje se i nalukavat tera bi bila dobra sneha. Lukalje se po prsnica, pode, kluplja i šamrljine, e su dobre zribani. Lukala se i posuda e je dobre oprana. Če je se bilja kak spada, puca je imiela več snuboke i unda je mogla brebirati budučuga muža. Presnice po ganjke, komora i kuhnje cinfralji su ljusteri napravljeni od slame, koruze i bažulja. Jeden se ljuster nie mogel napraviti same jednu večerku pak je pajdašuvanje bilje več večerki. Se cinfe, pranje hiže i hadri moralje je biti gotove do Badnjaka. Šenička tera se posiejala na sv. Luciju bila je več prec zelena. Stolček teruga su muži delalji od Brbarenja moral je biti gotof. Veruvalje se da se z toga stolčeka more videti gdoj je h selu coprnica. On gdoj je napravil stolčeka zel ga je sobu na polnočku. Gda je bilje podiganje h cierkve, stalje se na tie stolček i polukne po cierkve. On gdoj stoji na stolčeku mogel je videti tera je baba coprnica. Puce su pak prie nek su išle na polnočku zele h ruke jabuku, obieljile ju tak kaj niesu koru prekinule. Cielu koru hitile su prek glave kaj je opala na pod. Obieljena kora složila se na podu h slove z kakvem bu počelje ime budučoga dečka i muža.

Od cajta prie Božiča, na prvi dan zime je najduža noč. Poklje se velji da ide saki dan dukši za tuljike kuljike kokot more zevnuti.