Kak sem se zmisljila najža svoje babice, niesem se htegnula doteknuti svojuga najža. One kaj je na najžu moje babice i mojuga iste, je same te kaj nosnice draži duha posmujenoga mesa. Več duge na moja najža nie maščenjake, koruze, bažulje i kaj česa kaj je na najža negda bilje. Tuj su zdej sakojaki drugi čački i hadranine tere več nišče ne rabi, alji mi se senek teške od njih restati. Oni su dielec mojuga življenja i gda bi završilji negdena smetnjaku bilje bi te kak da sem na smetnjak hitila dieljec svojuga življenja. Tuj su sakojački papereki tere su po prvi put šarale noje pucke. Najde se i njhove obljeka h tere su bile na prve prišesti, fierme, gda su bile maturanti ilji pak diplomanti.

Saki komaček nečega ima svoju priči. Gda si jih poluknem, kak da čujem njihove koškanje med sobu. Po kljine na moja roženička viesiju još i sakojačke stvari od starce i če jih poluknem zmisljim se na življenja tere je spisalje trege na mom životnom putecu. H ščošku pod strehu na moja najža je kindrpet h terem se odgajbalje mnoge detece. Ti je kinderpet star pedeset osem ljiet. Prvi put je hu njem spal moj Branek. Od unda je putoval od hiže do hiže, od familjije do familjije. Morem se još navieke zmisljiti malje panjkarte teri su se prvi put pustilji z gitri kindrpeta i delalji sami prve korake. Z druge strani najža, takaj pod strehu, prekrita, stoji „Singerica“ moje mame.

Pune put, gda mi misel dojde na starce, zmisljim se i mamine „Singerice“, mašine za šivanje. Pitam se kak bi bila duga priča kad bi ju mašina znala spripoviedat. dugi je bil njenji put dok je došla do mojuga najža. Dok sem ju malje z nogu potirala, zmisljila sem se cajta gda je došla prvi put h našu fižu. Sigurna sem i denes da je te bil jeden od najljepših cajtof h življenju moje matere. Navieke je pripoviedala, dok je na ruke nekaj krpala ilji šivala, kak si želji mašinu. Imiela je volju vučiti se za šnajdericu, alji je doma niesu dalji. Morala je plaziti po gruntu i za švielju nie imeila cajta. Nu dok su drugi vudienčilji znala je duknuti prek plota k susede, vrsne šnajderice, teru su zvalji Muzierka. Mati je je pomagala nekaj hieftati, a ona ju je malje podvučavala kak se nekaj skraja i more zašiti. Če se i kaj nafčila nie imiela gde zašiti jer ni jedna šnajderica nikomu nie dal da je nešče prčka po mašine. Same su bogate puce zamuža mogle dobiti mašine za šivanje če i niesu bile švielje. Moja mati nie imiela tu sreču. Gda su naši ljudi počelji hoditi služit h stranjski sviet, največ h Njemačku k domu su donašalji kaj česa, pak i šivače mašine. Šparala je moja mati za nju i nakanila ju je kupiti. J

emput, siečam se dobre, gda je pripustila kravicu moljila je Boga da telece dojde sreče kaj si bi za prodane teljčeke mogla kupiti mašinu. Bog ju je posluhnul i za teljeke je dobila tuljike penez kaj je za nju mogla kupiti mašinu. Z njemačke ju je donesel Matek Kuzelof. H večerku sme išle mama, ja i strina Holja z tačkami k njemu dima po nju. Dopeljale sme ju i dele h kuhnju h tere su več čakale i druge susede i šnajderica Anka. Ona je triebala pokazati kak se mašina navaja i ž nju štieplje. Dok je ona siedala za mašinu se oči su gledele hu nju i Singericu. Mašina je bila rabljena i bog zna gdoj je ž nju služil kruheka. Več su bila malje zguljena zlatna slova i cinfre, alji je još furt bila ljiepa. Šnajdericu Anka navajala konec na mašinu, a unda namotala konec na špuljicu. Zela je h ruku krpu teru je mama pririhtala i unda se čula najljepša mužika za vuhe moje mame: štep.šteš, štep...

Mašina je počela štiepati najprie poljehku, a unda se brže i brže i brže....A pod nju su se vidlji jednaki štiepi. Babe su se same mudrile i gda je Anka preštiepala krpu do kraja, zdigla se od mašine i posela za mašinu moja mati. Matere su vusnice bile suhe, a ruke mokre od švica. Zadrhtale su je gda je prvi put na svoje mašine spustila kapicu na platne i stiha počela tirati z nogami mašinu. Spominek je htihel i se su babe polušale kak ljiepe štieplje mašinka. Od gda je mašinka došla fižu, saki cajt teri je mogla mati je bila za mašinu. Navieke je nekaj poštiepala, zešila nam, a i svojem pajdašicam. Čez ruke moje matere i njenje mašine prešlje je na hiljede i hiljede naramenic tere je doma šivala za fabriku, a od zaslužene penez gospodarila i školuvala mene i sestru. I kak unda da, tu dragu Singericu hitim stare željeze. Ona bu i dalje na moja najža kak dragi spomenek, na mene drage i ljiepe cajte.