Špampet ilji postelja od vajkada je bilje meste gde su ljudi otpočinjalji, alji ruku na srce i največ delalji na svoje nasljednike. Kak se mienjaju cajti mienjalji su se i špampeti. Oni niesu bilji navieke isti za sakuga čoveka. Negda se dobre znalje kakvi su bilji sirotinjski špampeti, a kakve kraljefski ilji bogatuševi. I denes se špampeti med sobu razlikuju. Hnogi, teri dielaju špampete faljiju svoju robu kak je najljepša i najbolša. A unda gda ga tirbaš kupiti ispadne sikak i sakak. Če kupuješ špampet tek vidiš kak je te kak da kupuješ mačka h vreče. Ščem se odlučiš napraviti kupiček unda h čudu lušeč pri kupičku.

Špampet ilji postelja odnavieke je imiela sklajdnjice, okvir i deske na tere su se metalji strožaki. Denes gda kupiš špampet kupiš jednu ilji dvie skladnjice i deske tere dojdu ze strani. I te bi triebala biti postelja. Če pak očeš na nje spati unda moraš kupiti još podnice kaj bi se postelja mogla rabiti. A unda na podnice sakojčke moderne madrace za teruga se teške odlučiti. Gruntaš i gruntaš teruga da kupiš kaj bi ravniejše i zdraviejše spal. Takef špampet gda ga i pri hiže imaš nie teške saki dan malje poravnati i on je napravljen za spati. Negda su ljudi imelji drugačke špampete, tere su babe morale dopeljati zamuža. Tišljer je sake puce, po naruđbe starce, napravil postelju i romar. Pri bogate familjije bile su naručene dvie postelje i dupljit romari. K tomu su išlji još i natkasljini, malji stoljek, a i psiha. Se te bil je mebljin i po njemu se šacala saka sneha tere je došla zamuža. Najvežnejšei su senek hu tem mebljinu bilji špampeti.

Oni su bilji čvrsti i teške jih je bilje resklenuti. Saki špampet je imel svoju podnicu napravljenu od desiek. Na deske je došel strožak. Strožak je bil zešit od jutovine i punil se z perinjem, sake ljete z friškem. Z gornje strani strožaka bila je rupa čez teru se h jutre rašile perinje tak kaj je strožak stršal. Na strožak se diela tuhica od perja. Sake postelje ilji špampetu pripadalji su tri vanjkuši. Če su bile dvie postelje unda je triebalje šest vanjkuše. Gda su se narašilji strožaki tuhica na nje se diela rušica. Na rušicu su se posložilji vanjkuši jeden do druguga. I oni su moralji biti dobre narašeni i jednak poravnani. Poravnana postelja prekrila se z pokrivaljem od cinfrastoga platna. Bogatieše snehe su dopeljale zamuža pokrivale teri su po kraje imele zešite fradđe. Franđe su trake z resicami. Na postelju i na prekrivalje na sredinu gde su bile glave del se još cinfrasti vanjkuš. On je bil napravljen od matlas svile. Po sebe je imel rožice ilji kakvu živinicu. Na napravljene postelje ilji špampete niese čez dan ljiegalje. Babe su jedne drugem poluknule čez obločeke da vidiju e su postelje napravljene. Po selu bi bilji prešlji veljiki špoti da postelje niesu bila porihtane kak spada. Ljudi su si čez dan poležavalji, po ljetu po senjake, a po zime po kluplja tere su bile h kuhnje ilji na zbite drvene postelje tere sme zvalji „priče“. Ja sem si kak diete misljila da se tak zoveju radi doga kaj me je mati znala držati h krilu, sediela „priča“i pripoviedati priče. Nišče negda, a denes još menje znal reči, radi čega se tak ta drvena postelja ilji špampet zvala.

Negda su špampeti bilji krajši, ne radi toga kaj bi ljudi bilji pune menjši nek radi toga kaj su spalji na nasložene vanjkuše pod glavu, skore sedeči. Kak su špampeti bilji menjši i vužeši, ljudi su se več med sobu stiskalji. Več su se morti imelji i radi. Morti?! Tak si ja misljim. Kak su denes postelje veljike, muži i babe moreju spati saki na jednem karju, a da se ne dotekneju. Gda se nedotikavaju unda i jedni na druge pozabiju. Tak se unda ljudi odvadiju jedni od druge i če se dotekneju mam jeden drugomu smietaju. Unda kaj si nej smietalji prejdeju na drugu postelju, h drugu komoru. Brze tak pozabiju na cajte gda su njihovi špampeti škripalji od skupne huncutarije. Nekak si denes gruntam da su za se kaj se mladem ljudem dogaja, kaj nečeju skupa spati i biti, krivi špampeti. Denes su špampeti preveljiki i ima ih preveč. Radi toga bi triebalje delati menje špampete i pune vužiše. Dvoje, teri hu njem skupa spiju inda bi poslušalji kak diela srčeke onuga drugiga. Morti unda nebi tak brze pozabilji na ljiepe i cinfraste cajte, tere se tak brze odrekneju.