Baš mi je nekteri dan oke zapelje na krafski jarem, teri je bil obiešen na jednem, negdašnjem, štalskem stanju. Po tomu kak je veljike štalske stanje, kak je još navike zgledne more se slobedne misljiti da je tuj negda bila ljiepa i veljika gospodara. Dobra i veljika gospodara i dober gazda, merilji su se po veljičine kočaka i svinjami tere su nutre bile, kak i po broju blaga h štalje. Konji i blage h štalje garantieralji su ljiepe življenje onuga gdoj jih je imel.

Kak i denes ljudi su se po siromačije i bogatstvu razljikuvalji. Srečniejši su bilji oni teri su imelji blage z terem su moglji delati sakojački posel. Da bi blage moglje pripeljavati kaj česa k domačije; vljieči plužece, krmu, slamu i ljestinu moralje se hpreči. E se blage hplelje h kolce, plužec, brane, sejaču ilji kaj druge, na vrat mu se del jarem, dupljični ilji enfag. E je bil dupljični ilji enfag jarem je bil jarem i blage je tiščal. Gda se prvi put metal blagu za vrat blage je norilje, dukalje, i štelje ga hititi sebe z vrata.

Radi toga se nigdar nie histe vrieme h jarem metalje blage tere se prvi put zaprieže. Navieke se mlada kravica tera se triebala privikavati na jarem zapregla z kravicu tera je bila vična poslu. Dok bi prveščica norila, stareša bi mirne stala i čvrste držala glavu h jarmu. Nie se dala mlade navljieči na noriju nek se mirne vuprla i postala dok se mlade marše nej smirilje. A to mlade marše gda je vidlje da nie pomoči, da jarem nemre sebe hititi, poljehku se smiruvalje i prielje jarem kak normalnu stvar. Tuj i tam bi se još znalje pobuniti, gda bi ga jarem tiščal, a unda je i pekel i boljel, se dok se na vratu nebi napravilji šinjaki.

Če je blage imelje šinjake od jarma unda ga več nie tak jahke jarem žuljal, a nie ni tak boljel. Jarem je bil napravljen od drvenuga gornjuga diela teri je imel depši diel kaj nej fejst tiskal krafski šinjak. Doljni drveni diel, podbradinje bil je tenjši. Gornji i doljnji diel jarma z nutršnje strani je imel drvene teljege. Krava je metala glavu med teljege i teliežnjake. Z vanjske strani je bil željiezni teljiežnjak. Teljižnjaki su delani pri kovači i znalji su biti pri gornjem kraju sakak sfrkani kaj bi ljepše zgledalji. I z jedne i druge strani jarem je bil isti.H sredine je bil z dvemi omčami, jednu od napre, a drugu odotraga z željeznem kljinem pričvrščen za rude.

Gda se blage hpriezalje h jarem i vučilje se na njega navieke se vodila briga na teri kraj se prvi put zapreglje. Tak se je blage nafčilje na svoju stran i gda se pustilj z štale kaj bi se hpregnulje kaj po komande, kravice su stale saka na svoju stran. One tere su bile mirne i dobre, ljehke su se hpregnule. Bila je ljepota takvu kravicu sprezati jer je i sama podavala glavu kaj si je lježe del jarem za vrat. Bilje je i onie tere su se teške na jarem privadile. Navieke su bile juncljive i trdokorne pri zapriezanju. Več put je pri takvomu blagu imel posla i bič. Prie dok nie par put fijuknul bič po zraku ilji po gupcu nie bilje huncutljivu kravicu ilji teljičku moči zapreči.

Denes več nie kravic po polju na paše. Nie jih več moči videti zaprežene h jarmu. Ne čuje se več duge fučkanje biča po zraku ilji one:
„Hoj Cveta, Ljisa hoj! Šti Cveta, Ljisa, šti!“

Kak spomenek na te cajte, ostalji su tuj i tam same po zide veseti jarmi. Jarmi tere je čovek snel blagu, jer mu več ni blage ni jarmi ne triebaju. Nu kak da su jedni jarmi ostalji. Ne baš oni pravi z podbradinjem, teljiežnjaki i teljegami. Ostalji su jedni drugi jarmi, alji ne blagu na vratu. Drukčeši jarmi obesilji su se i na drukčeše vrate. Na vrate ljudi. Pritiščeju jarmi odzgor, drukčeše teljege i teljiežnjaki ze strani. Hičeju ljudi z glavami, alji jarem nikak neče opasti. Nekak je znam zapisane da nešče naveke mora nositi jarem. Kak te več nie blage unda su te ljudi. H jarem su je zapreglji oni teremi su veruvalji. Teri su kakti delalji dobre za nje. Kak je ispalje delalji su dobre, alji same za sebe. Kak su nekteri se več spinjalji vojke h ruka, tak je jarem na vratu ljudi bil se teži i teži. Za nadati se da se buju jemput i ljudi kak i blage riešilji svojuga jarma. Unda buju tak krafski i čovieči jarmi viselji na zidu, same kak spomenek na teške i grde cajte.