Jahke rane, h sobotu h jutre rada idem h veljiki štacun. Unda nie preveljika gužva i dok još nie vručina. Tak je bilje i jednu subotu prie tjeden, dva. Gda sem se peljala prema štacunu, zmisljila sem se cajta gda sem, kak detece, išla h štacun z jajcami h mrežice i pazila, da mi nej tere, čez nju opalje. Negda se išlje h štacun takaj h suboti, alji ne saku. Dima se neselje frtaj kile cukara, deci dva vuoljiča kaj je ovisilje e bu kakef veljiki crkveni svetek, tuj i tam črljena paprika, sol, biks i če je ostalje za par diek bombona, grizičuga ilji slatkuga i črljenuga, zgleda kak himper. I denes se ide največ štacun h subotu, gde je več cajta, makar se kupuje i čez tjeden.

Tak sem i ja stala pred jeden štacunem i dok sem zakljiepala svojuga šplehnatuga ljubimca čula sem glasni dieči glas. Išel je jeden malji panjkrat z svojem starci prema štacunu i veselje je brbotal. Imel je oko pet ljiet. H njegvem brbotanju sem razonala da je nabrajal kaj se oče da mu kupuju. Ščem sme došlji h štacun, malji se panjkrat mam zaletel k stalže z igračkami. Za čas je h ruka imel kamionček, traktorek i štel je da mu ga kupiju.

Mama je govorila, dosta glasne, da ima doma nekaj sljične i da ima dosta igrački, alji malji huncut nie odustajal. Gda je videl da ne dobil z mirem one kaj oče, počel je galamiti, krljesieriti i vudirati z nogami po podu.. Pod oke sem poluknula i vidla da si je oča čepil k njemu i nekaj mu šeptal. Zgledi da ni te nič nie pomoglje, jer se za kratki cajt h njihove košare našl traktorek teruga je štel. Kak h štacun dojdu i moji pajdaši tak sem se h štacunu ž njimi zestala i malje pobrbrala. Bri brbranju sem z jednem vuhem čula, malje malje, kak malji huncut beči i srdi se. Unda je postalalje se tihe. I tak par put. Kak po dogovoru zestalji sme se skup h redu pri kase. Njihova koljica same kaj se niesu respukla od kaj česa.

Bilje je tuj sakojačke igrački i slatkiše. I k tomu semu, malji nie bil zadovoljen. Nekaj je još štel kaj nie hu tem štacunu bilje. Kušuvalji su ga tata i mati na mienjanje i uveravalji da peju i h drugi štacun. Otec je med kušuvanjem i draganjem toga maluga panjkrata govoril:
„Naj biti žalosten. Se bu tebe tvoj tata kupil.“
Gda sme bilji gotovi i oni i ja krenulji sme z štacuna. Sela sem si h altu i mam sama sebe pošpotala.
„Vrabec odnesi moj spomenek z pajdaši i bevenje okol. Im sem pozabila kupit melju.“
Nazaj sem štiela ziti z alte van. Kak je več se bilje pune alti, a jeden je stal tik kre mene, poljehku sem otvrzla vrace alte kaj nej vudrila luckuga šplehnatuga ljubimca. Vrate pri susednomu alteku bile su na pol otprte. Z zica se poljehku pridigala starica. Pripomagala se i nie imela dosta maha pak je završila nazaj na stolcu.
„Nu stara! E buš več jemput zišla! Ti B..a, kuljike ti trieba da zideš van.!“

Nekaj me pri srcu stisnulje. Lukala sem tu staricu tera se poklje par put uspiela zvljieči z alte. Stiha je zaprla vrate, popravila si kuklju tera je se radi vručine priljepila za tielje i krenula prema štacunu. H ruke je imiela stari, pohabani pobelar. Sin je išel pred nju kaj soldat.

„Zemi si koljice i požuri se. Nemam ciel dan nameru z tobu biti h štacunu!“, čula sem ga kak je je govoril dok je pred menu jemala koljica. Miljila mi se.Mam bi je ja koljice rievala tere su je i prazne bile preteške. Išla je poljehku kre stalaži. Pod oke sem ju lukala. Za nju je te se bilje preveljike i preveč. Nie se mogla snajti. Hodila sem za nju i tuj i tam ju pitala kaj je trieba. Sin je malje malje došel i pital ju:
„E buš več jemput gotova. Im ne moraš kupiti cielji dučan!“

I nie štiela kupiti cilji štacun. Kupuvala je one kaj je je od vajkada trebalje, meljice, cukara, solji, prah za žuljenje…
Stiha i poljehku došla je do blaganje. Njenji sinek več je nervozne pred štacunem pušil. Rievala je koljica prema alte.
„Kaj se vljiečeš kaj megla“, rekel je sin teri je stal kre alte.

Niesu dugi cajti od gda je i ta starica hgajala svojemu sineku kak i oni na početku moje priče. Za kraj nie trieba nič reči, nek same gruntati.