Več je dosta cajta od gda sem se odrekla grde navade, klenja. Da kunem, sigurne bi „snela se svece z neba“, kak su negda znalji ljudi reči. Klela bi radi toga kaj sem se tak hdrla h paljec na noga kaj se mam ves rescvel, a krf je pošiknula na se strane. Niesem klela, nek sem same stisnula zube, a unda i paljec z terem sem se heznula po stolcu, teruga sem diela na štalska najža. H par sekundi mi je čez glavu preletelje se one kaj sem z tem stolcem prešla. On je več bil par put pririhtan za ciepanje kaj ga bi skurila. Nikak niesem mogla najti pile i sekire z teru bi te napravila.

Jemput sem ga pristavila k kante za smeče da ga otpeljaju smetlari. Kak te ne spada h kučne smeče ostal je kaj žandar kre prazne kante. Gda sem ga zagledala znala sem da ga se nem tak ljehke riješila. Nanašala sem ga z jednuga kraja dvorišča na drugi i na kraju ga odnesla na štalske stanje. Stoljec kak da se nie dal od hiže. I gda sem ga nosila na stanje kak da je bil gizdav i kak da je znal da ga nem mogla nigdar hititi. Bil je te stoljec teruga je moja mati dobila za dar od svoje sestre Ljube gda je išla zamuža. Kupil je ga svak Karljin na siemu h Stubice. Kak je išla zamuža h Kotarice on je rekel da se nek vidi po boljem stolcu da je došla sneka z Dubrave. Za unda je te bil stoljec teruga si je malje gdoj mogel privuščiti. Te je stoljec naslonjač, okruglji, a meste na terem se sedelje je bilje tapicierane. Ispod črljenuga platna bilji su fedri.

Tak je moja mati k mebljinu dobila i takef „fini i gospodski stoljec“. Njenji mebljin je bila još postelja, romar, stol, jeden natkasljin i još jeden obični stoljec naslonjač. Sega toga več je davne nestalje. Mati je podeljila ves svoj mebljin, alji su stolci ostalji. Obični naslonjač se je ves rezbabil i završil je negde na ognju, a ovie se nie dal. Baš radi toga sem ga pospravila na štalske najže da ga bum malje porihtala gda bum na cajtu. Kak sme furet h nekakve gužve teške se cajti najdeju, a gda je cajta unda se ne zmisljim.Zate sem se hunjuga heznula kaj bi me opomenul da je vrieme da ga dam porihtati, kaj bi bil kak svedok jednuga življenja.

Denes gda naše fabrike i tišljeri dielaju sakojačke stolce, kaj bi se na nji moglji ščem bolje počinuti, teške je zamisljiti da je stoljec h negdašnjem življenju bil tak fejst važen. Ljudi su pri hiža imelji klupi, i te največ obrtače. One su bile po danu pri stolu kaj se na nje sedelje, a po noči se naslon obrnul prema stolu. Meste gde je čez dan bilje za sied, za noč je bila postelja za najmlajše detece.

Stolce pri hiže je retke gdoj imel. Bilji su te same pri peči malji šamrljini na tere se sedelje dok bi baba redila, kurila pri ognju ilji se ružđila koruza. Tam negde oko šezdesetuga ljeta hu onem vieku počelji su se pri nas delati štokrljini. Bilji su te stolci bez naslona. Dobre se znalje gdoj h selu ima takef stoljec. Gda su bile gosti, krstitke ilji pak krmine hodilje se po selu posujavat štokrljine. Veljike veselje bilje je i gda se na prščenju na Bistrice kupil stolček teruga se moglje sklopiti. On se je nosil sobu na pašu, gda se je blage moglje pasti širem. Oni teri niesu imelji sreče da ga kupiju, h polju su si napravilji stolčeca od tri depše komada vrbovine oko tere si splelji šibovje. Stoljec je bil meste za počinek, alji iste tak i cajt gda si je čovek sedeči lježe delal kakef posel. Bilji su i tak zvanni štalski stolčeki. Oni su bilji napravljeni od nekakve deske na tere su se dele tri ilji četiri cape.Na takvem stolčeku su babe sedele dok se dojilje. Stolci i stolčeki bilji su važni h življenju ljudi i pri šega. Tak se reklje da se od sv. Lucije počne delati stolček na tri cape i mora biti gotof do polnočke. Na polnočku se zeme sobu h cirkvu, na njega se stane i luče po cirkve. Onie gdoj je stal na njemu mogel je videti babe tere su bile coprnice.I denes se još velji da se nesme histe vrieme sedeti na dva stolce. Gdoj tak diela moglji bi mu se posmeknuti i unda opadneš na pod pak ne sediš ni na jednomu. Večina se te velji za dečke teri imaju histe vrieme dvie puce i obrnjene.Sediela sem si tak i gruntala o stolce dok sem držala ranjeni paljec. Dok sem gruntala o stolčeke prestalje me boljeti. Mamin stoljec diela sem nazaj h čošek najža. Naj bu same tuj i dalje kak spomenek na negdašnje cajte. Gda bum imiela cajta bum ga porihtala.